BƆ NƐ O MAA JE NÍ SƐƐMI SISI HA
NÍ KASEMI 2
Pee Níhi Nɛ Ma Ha Nɛ Ní Sɛɛmi ɔ Maa Ya Nɔ
Sisi Tomi Mlaa: “Munyu nɛ a tu ngɛ be nɛ sa mi ɔ, hyɛ bɔ nɛ e hi ha!”—Abɛ 15:23.
Nɔ́ Nɛ Filipo Pee
1. Moo hyɛ VIDEO ɔ, aloo moo kane Ní Tsumi 8:30, 31. Lɔ ɔ se ɔ, mo susu sane bimihi nɛ nyɛɛ se ɔmɛ a he:
Mɛni blɔ nɔ nɛ Filipo gu kɛ je ní sɛɛmi ɔ sisi?
Mɛni he je nɛ blɔ nɔ nɛ e gu nɛ e kɛ nyumu ɔ je ní sɛɛmi ɔ sisi nɛ e tsɔɔ lɛ nɔ́ ehe ko ɔ sa a?
Mɛni Wa Kaseɔ Ngɛ Filipo Nɔ Hyɛmi Nɔ́ Nɛ ɔ Mi?
2. Ke wa pee níhi nɛ ma ha nɛ ní sɛɛmi ɔ maa ya nɔ ɔ, eko ɔ, lɔ ɔ ma ha nɛ nɔ ɔ maa suɔ kaa e maa bu wa sɛ gbi ɔ tue.
Moo Kase Filipo
3. Moo to níhi a he hɛ. Bɔ nɛ nɔ ɔ maa pee e hɛ mi kɛ e nɔmlɔ tso ɔ ha a ma ha nɛ o le bɔ nɛ e ngɛ ha. Anɛ o yɔse kaa nɔ ɔ bua jɔ kaa e kɛ mo maa tu munyu lo? O kɛ lɛ ma nyɛ maa je ní sɛɛmi sisi kɛ je Baiblo ɔ mi kɛ gu sane bimi kpiti nɛ ji, “Anɛ o le kaa . . . ?” nɛ o kɛ ma tsu ní ɔ nɔ. Ke nɔ ko bua jɔɛ kaa e kɛ mo maa sɛɛ ní ɔ, koo nyɛ e nɔ.
4. Moo to o tsui si. Koo nu he kaa e sa nɛ o kɛ lɛ nɛ je Baiblo mi ní sɛɛmi sisi oya nɔuu. Moo mlɛ kɛ yaa si be nɛ he blɔ ma bli bɔ nɛ pee nɛ ní sɛɛmi ɔ nɛ ya nɔ saminya. Be komɛ ɔ, enɛ ɔ ma bi nɛ o mlɛ kɛ yaa si be nɛ o ma ná he blɔ ekohu kaa o kɛ nɔ ɔ nɛ sɛɛ ní.
5. Mo tsake o munyu ɔ hɛ mi. Eko ɔ, nɔ ɔ ma ya tu nɔ́ ko nɛ o hyɛ we blɔ ɔ he munyu. Lɔ ɔ moo pee klaalo kaa o kɛ lɛ ma susu munyu ko nɛ e he maa ba se nami ha lɛ ɔ he, ke pi lɔ ɔ nɛ o kɛ dla o he po.