Wa He Nɛ Maa Be Ngɛ Fiɛɛmi Ní Tsumi ɔ Mi—Bɔ Nɛ O Maa Je Ní Sɛɛmi Sisi Ha Konɛ O Ye Odase Be Mi Nɛ O Be Fiɛɛmi Tso Mi

Nɔ He Je Nɛ E He Hia: Behi fuu ɔ, ke wa ngɛ fiɛɛe ngɛ wehi a mi ɔ, wa pɔɛ nihi nami ngɛ we mi. Se, waa kɛ mɛ ma nyɛ maa kpe ngɛ lɔlehi a mi, hiɔ tsami hehi, he jɔɔmi be mi ngɛ ní tsumi he loo sukuu, kɛ he kpahi. Yehowa suɔ kaa nihi tsuo nɛ a ná he blɔ nɛ a nu Matsɛ Yemi ɔ he sɛ gbi ɔ. (1 Tim. 2:3, 4) Behi fuu ɔ, bɔ nɛ pee nɛ waa ye mɛ odase ɔ, waa kɛ mɛ jeɔ ní sɛɛmi sisi.

Blɔ Nɔ Nɛ O Maa Gu Kɛ Pee:

Moo hla ni ɔmɛ a mi. Anɛ nɔ ɔ ji nɔ ko nɛ jeɔ huɛ bɔmi su kpo nɛ e suɔ kaa e maa sɛɛ ní lo? Anɛ si fɔfɔɛ ɔ hi kɛ ha ní sɛɛmi lo? Fiɛɛli komɛ hyɛɛ nɔ ɔ hɛ mi kɛkɛ a muɔ hɛlii. Ke nɔ ɔ hu muɔ ɔ, a bɔɔ mɔde nɛ a jee ní sɛɛmi sisi.
Ke o yee gbeye kaa o maa tu munyu ɔ, moo sɔle kpiti ngɛ o yi mi.—Neh. 2:4; Níts. 4:29.
Mo de nɔ́ ko kpiti; e ma nyɛ maa pee ngami. Be nɛ Yesu kɛ Samaria yo ɔ kpe ɔ, e sɛɛ we Matsɛ Yemi ɔ he sane kɛ je a ní sɛɛmi ɔ sisi. (Yoh. 4:7) Be komɛ ngɛ nɛ nɔ ko yi nɛ wa ma je ɔ ma ha nɛ wa maa je ní sɛɛmi sisi. O ma nyɛ ma de ke: “O bimɛ ɔmɛ baa a je mi saminya!” Sane nɛ wa ma bi ɔ hu ma nyɛ ma ha nɛ wa maa je ní sɛɛmi sisi: “Anɛ o nu hiɛ gbɔkuɛ amaniɛ bɔmi ɔ lo?”
Ke o kɛ lɛ bɔni ní sɛɛmi ɔ, o hla blɔ ko nɔ nɛ o kɛ sane kpakpa a nɛ wo nyɛ ní sɛɛmi ɔ mi, se kɛ̃ ɔ, koo ye oya kɛ pee jã. Moo to o tsui si nɛ ní sɛɛmi ɔ nitsɛ nɛ ya nɔ. Eko ɔ, o ma nyɛ ma de nɔ́ ko nɛ ngɛ bua jɔmi nɛ ma ha nɛ e bi mo he sane. Kaa nɔ hyɛmi nɔ́ ɔ, ke nyɛ ní sɛɛmi ɔ kɔɔ weku he ɔ, o ma nyɛ ma de ke: “I kane bi tsɔsemi he ga womi kpakpa ko lingmi nɛ ɔ.” Ke nyɛ ngɛ sane ko nɛ ba he ní sɛɛe ɔ, o ma nyɛ ma de ke: “Lingmi nɛ ɔ, i pɔɔ sane kpakpa komɛ kanemi nɛ haa i naa bua jɔmi wawɛɛ.” O kɔni mi ko wo nyu ke o yí nɔ ɔ odase nɛ nyɛ ní sɛɛmi ɔ nɔ po.
Moo hɛɛ dɛ womihi loo womi kpahi nɛ o ma nyɛ ma ha nɔ ko nɛ ma je bua jɔmi kpo ɔ.

Moo Ka Enɛ ɔ Ngɛ Nyɔhiɔ ɔ Mi:

Daa otsi ɔ, ke e hí kulaa a, moo je ní sɛɛmi kake sisi kɛ yi mi tomi ɔ kaa o maa ye nɔ ko odase be mi nɛ o be fiɛɛmi tso mi.