KPALE YA SLAA NIHI NƐ A BUA JƆ MUNYU Ɔ HE
NÍ KASEMI 8
Moo To O Tsui Si
Sisi Tomi Mlaa: “Suɔmi toɔ e tsui si.”—1 Kor. 13:4.
Nɔ́ Nɛ Yesu Pee
1. Moo hyɛ VIDEO ɔ, aloo moo kane Yohane 7:3-5; kɛ 1 Korinto Bi 15:3, 4, 7. Lɔ ɔ se ɔ, mo susu sane bimihi nɛ nyɛɛ se ɔmɛ a he:
Sisije ɔ, kɛ Yesu nyɛminyumu ɔmɛ pee a ní ngɛ sɛ gbi nɛ e fiɛɛ ɔ he ha kɛɛ?
Mɛni tsɔɔ kaa Yesu kɔni mi jɔ̃ we ngɛ e nyɛminyumu Yakobo he?
Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?
2. E sa nɛ waa to wa tsui si ejakaa ni komɛ kplɛɛɔ sɛ gbi ɔ nɔ oya nɔuu se ni komɛ hu lɛɛ e heɔ mɛ be.
Moo Kase Yesu
3. Mo tsake blɔ nɔ nɛ o guɔ ɔ kɛ fiɛɛɔ ɔ. Ke nɔ ɔ sume kaa o kɛ lɛ nɛ je Baiblo ɔ kasemi sisi oya nɔuu ɔ, koo nyɛ e nɔ. Ngɛ be nɛ sa mi ɔ, moo ngɔ videohi aloo ní kpahi kɛ ye bua lɛ nɛ e nu bɔ nɛ waa kɛ nihi kaseɔ Baiblo ɔ ha, kɛ bɔ nɛ e ma ná he se ha a sisi.
4. Koo ngɔ nihi nɛ o kɛ mɛ kaseɔ Baiblo ɔ kɛ to a sibi a he. E slo bɔ nɛ a ti nɔ fɛɛ nɔ ngɛ ha. Ke o weku no aloo nɔ ko nɛ o kpale ya slaa lɛ ɔ ngɛ e nane si gblae kaa e maa kase Baiblo ɔ aloo e maa kplɛɛ Baiblo tsɔɔmi ko nɔ ɔ, mo susu nɔ́ he je nɛ e ngɛ e ní pee jã a he. Anɛ jami mi tsɔɔmi ko ngɛ nɛ e bua jɔ he wawɛɛ aloo e he ye lo? Anɛ e weku li aloo nihi nɛ e kɛ mɛ ngɛ kpɔ ɔ mi ɔ teɔ si kɛ woɔ lɛ lo? Moo ngmɛ lɛ blɔ nɛ e susu nɔ́ nɛ o kɛ lɛ ngɛ kasee ɔ he konɛ e na se nami nɛ ngɛ nɔ́ nɛ Baiblo ɔ de ɔ he.
5. Moo sɔle ha nɔ nɛ e ngɛ munyu ɔ he bua jɔmi ɔ. Mo bi Yehowa nɛ e ye bua mo nɛ o ná hɛ kɛ nɔ fɔmi nɛ jehanɛ se hu, o kɛ hɛ si kami nɛ tsu ní. Moo sɔle konɛ Yehowa nɛ e ye bua mo nɛ o le be nɛ sa nɛ o kɛ nɔ nɛ be munyu ɔ he bua jɔmi hu ɔ ma kpa ní ɔ kasemi.—1 Kor. 9:26.