HƐ MI MUNYU: NƆ́ NƐ WA KASEƆ NGƐ MOSE HE
Mɛnɔ Ji Mose?
Ke o nu biɛ nɛ ji Mose ɔ, mɛni baa o juɛmi mi? Anɛ o kaiɔ . . .
bimwɔyo ɔ nɛ e mami kɛ lɛ wo kusii aloo kɛtɛ mi nɛ e kɛ lɛ ya laa ngɛ Nilo Pa a tue ɔ lo?
nyumuyo ɔ nɛ Farao biyo ɔ lɛ lɛ ngɛ Egipt nɛ nɔ́ ko nɔ́ ko hia we lɛ, se e hɛ ji nɔ kaa Israelno ji lɛ ɔ lo?
nyumu ɔ nɛ e hyɛ tohi a nɔ jeha 40 ngɛ Midian ɔ lo?
nyumu ɔ nɛ e kɛ Yehowaa tu munyu ngɛ mio tso nɛ ngɛ tsoe ɔ hɛ mi ɔ lo?
nyumu ɔ nɛ e da Egipt matsɛ ɔ hɛ mi nɛ e kɛ kã de lɛ ke e ngmɛɛ Israelbi ɔmɛ a he nɛ a je nyɔguɛ yemi mi kɛ ho ɔ lo?
nyumu ɔ nɛ Mawu fã lɛ ke e de Egiptbi ɔmɛ Haomihi Nyɔngma nɛ maa ba a nɔ benɛ Egipt matsɛ ɔ bui anɔkuale Mawu ɔ lo?
nyumu ɔ nɛ e nyɛɛ Israelbi ɔmɛ a hɛ mi nɛ a je Egipt ma a mi ɔ lo?
nyumu ɔ nɛ Mawu gu e nɔ kɛ gba Wo Tsu ɔ mi enyɔ ɔ lo?
nyumu ɔ nɛ ya ngɔ Kita Nyɔngma amɛ kɛ je Mawu ngɔ ba ha Israelbi ɔmɛ ɔ lo?
MOSE gu níhi nɛ a wo ta kɛ sɛ hlami ɔ kɛ ekpahi a mi. E be nyakpɛ kaa Kristofoli, Yudabi, kɛ Muslimbi tsuo buɔ nyumu anɔkualetsɛ nɛ ɔ wawɛɛ nitsɛ!
Atsinyɛ jemi ko be he kaa gbalɔ kpa ko pee we “ní nguanguahi nɛ ngɛ gbeye” kaa Mose. (5 Mose 34:10-12) Mose ngmɛ blɔ nɛ Mawu kɛ lɛ tsu nítsumi nguanguahi. Se kɛ̃ ɔ, adesa kɛkɛ ji lɛ. Kaa bɔnɛ ‘gbalɔ Eliya ji nɔmlɔ adesa kaa wɔ nɔuu’ ɔ, jã kɛ̃ nɛ Mose hu ji nɔmlɔ adesa kaa wɔ. Ngɛ nina ko mi ngɛ Yesu zugba a nɔ sɔmɔmi nítsumi ɔ mi ɔ, a na Eliya nɛ e piɛɛ Mose he. (Yakobo 5:17; Mateo 17:1-9) Mose hu kɛ haomihi nɛ waa kɛ kpeɔ mwɔnɛ ɔ fuu kpe, se e nyɛ da nya.
Anɛ o suɔ kaa o maa le bɔnɛ e plɛ kɛ da haomi nɛ ɔmɛ a nya ha lo? Ha wa susu su kpakpahi nɛ Mose je kpo ɔ a kpɛti etɛ a he, nɛ waa hyɛ nɔ́ nɛ wa ma nyɛ maa kase kɛ je e nɔ hyɛmi nɔ́ ɔ mi.
a Baiblo ɔ ha nɛ wa na kaa Mawu biɛ ji Yehowa.