Adebɔ Mi Oslaahi​—Anɛ A Tsɔɔ Kaa Mawu Yi Mi Wa Lo?

NƆ́ NƐ NIHI DEƆ: “Mawu nɛ ngɛ je ɔ nɔ yee, nɛ lɛ nɛ e haa adebɔ mi oslaahi baa; enɛ ɔ he ɔ, e yi mi wa.”

NƆ́ NƐ BAIBLO Ɔ DE: “Je ɔ, Abosiami lɛ ngɛ nɔ yee.” (1 Yohane 5:19) Baiblo ɔ tsɔɔ kaa lɛ nɔuu ji Satan. (Mateo 13:19; Marko 4:15) Anɛ sisi numi be nɔ́ nɛ Baiblo ɔ de ɔ he lo? Mo susu he nɛ o hyɛ: Ke Satan ji nɔ nɛ ngɛ je ɔ nɔ yee ɔ, lɛɛ lɛ ji nɔ nɛ woɔ adesahi he wami konɛ a fo mɛ pɛ a nɔ́ mi, nɛ a hɛ nɛ kɔ̃, nɛ a ko susu nɔ́ he kɛ ya tsitsaa kaa bɔnɛ lɛ Satan ɔ e ngɛ ɔ. Anɛ enɛ ɔ ha we nɛ waa na nɔ́ heje nɛ adesahi ngɛ zugba a puɛe ɔ lo? Ní leli fuu tsɔɔ kaa zugba a nɛ adesahi ngɛ puɛe ɔ lɛ ha nɛ adebɔ mi oslaahi ngɛ bae, aloo adebɔ mi oslaahi a mi ngɛ wae nɛ e ngɛ nihi awi yee ɔ nɛ.

Lɛɛ mɛni heje mɔ nɛ Mawu ngmɛ Satan blɔ nɛ e ngɛ Adesahi sisie ɔ? Akɛnɛ Mawu ji Nɔyelɔ nɛ Adam kɛ Hawa tsɔ atua kɛ si lɛ ɔ heje. Kɛ je lɔɔ se ɔ, adesahi babauu hu tsɔɔ atua kɛ siɔ Mawu. Akɛnɛ Adam kɛ Hawa kua Mawu Nɔyemi ɔ heje ɔ, lɔɔ ha nɛ adesahi tsuo ya je Satan nɔ yemi sisi. Yesu tsɛ Satan ke, “nɔ nɛ yeɔ je nɛ ɔ nɔ matsɛ.” (Yohane 14:30) Anɛ Satan maa ye je ɔ nɔ kɛ ya neneene lo? Dɛbi!

Yehowaa susuɔ wa he, nɛ e le kaa Satan ha nɛ wa ngɛ nɔ́ nae. Ngɛ anɔkuale mi ɔ, e dɔɔ Mawu kaa adesahi ngɛ nɔ́ nae. Kaa nɔ hyɛmi nɔ́ ɔ, benɛ Israelbi ɔmɛ kɛ si himi nɛ mi wa kpe ɔ, Baiblo ɔ de ngɛ Mawu he ke: “Benɛ e nu nɛ a ngɛ ngmlaa kpae ɔ, a ní pee lɛ mɔbɔ.” (La 106:44) Akɛnɛ Mawu naa nɔ mɔbɔ heje ɔ, e be kɛe nɛ e maa po Satan yi mi wami nɔ yemi ɔ se! E hla e Bi Yesu Kristo konɛ e ye Matsɛ kɛ ya neneene nɛ e pee nɔ́ nɛ da, nɛ́ e ko hyɛ nihi a hɛ mi.

BƆNƐ E KƆ O HE HA: Satan nɔ yemi ɔ nyɛ we nɛ e bu adesahi a he kɛ je adebɔ mi oslaahi a he, se Yesu nɔ yemi ɔ lɛɛ e maa pee jã. Be ko mi ɔ, Yesu bu e kaseli ɔmɛ a he ngɛ kɔɔhiɔ ko nɛ nya wa wawɛɛ ɔ he. Baiblo ɔ bɔ amaniɛ ke: “E nga kɔɔhiɔ ɔ yi, nɛ e de wo ɔ ke, ‘Ngmɛɛ dii!’ Kɔɔhiɔ ɔ jɔɔ fiami, nɛ wo ɔ ngmɛ dii.” E kaseli ɔmɛ bi a he ke: “Mɛnɔ ji nɛ ɔ nɛ kɔɔhiɔ kɛ wo tete buɔ lɛ tue nɛ ɔ!” (Marko 4:37-41) Nɔ́ nɛ ya nɔ nɛ ɔ ha nɛ wa ná nɔ mi mami kaa Yesu maa bu adesahi tsuo nɛ a maa pee tue bumi kɛ ha lɛ, ke e ngɛ nɔ yee kaa Matsɛ ɔ a he.—Daniel 7:13, 14.