Yeyeeye Peemi Ngɛ Oslaa He

Alona de ke: “Ke i nu bɛ nɛ nya wa nɛ a kɛ bɔɔ ma bi kɔkɔ ngɛ oslaa ko he ɔ, ye tsui poɔ wawɛɛ, nɛ i tuɔ fo kɛ ya sɛɛ tsu ko nɛ poɔ nɔ he piɛ kɛ jeɔ oplɛmi he ɔ mi. Se ke i ngɛ jamɛ a tsu ɔ mi po ɔ, i yeɔ gbeye. Ke i ngɛ kpo nɔ nɛ i nɛ́ he ko nɛ ma laa ye he ngɛ ɔ, lɛɛ e pa hí kulaa. Ligbi ko nɛ i ngɛ nyɛɛe ngɛ gbɛjegbɛ ɔ nɔ nɛ bɛ ɔ pɛ ɔ, i bɔni ya fomi, nɛ i nyɛ we mumi womi. E se kɛ bɔɔ loko ye tsui nɔ ye mi. Kɛkɛ nɛ bɛ ɔ bɔni pɛmi ekohu.”

Pi ta hwumi pɛ nɛ kɛ nɔ woɔ oslaa mi. Kaa nɔ hyɛmi nɔ́ ɔ, ke nɔ ko ná le kaa hiɔ ko nɛ ngɛ gbeye ngɛ e he loo e suɔlɔ ko he ɔ, e ma nyɛ ma ha nɛ e hao wawɛɛ. Ngɛ ni komɛ a blɔ fa mi ɔ, hwɔɔ se he gbeye yemi ma nyɛ ma ha nɛ a pee yeyeeye. A biɔ a he ke, ‘Anɛ wa bimɛ loo wa bibimɛ maa hi je nɛ ta hwumi, awi yemi, mu, kɛ gbenɔ hiɔ hyi lɛ tɔ mi lo?’ Kɛ wa maa pee kɛ da haomi nɛ ɔmɛ a nya kɛɛ?

Akɛnɛ ní yayahi ma nyɛ maa ba he je ɔ, ‘ke ní lelɔ na oslaa nɛ ma a, e ya laa e he.’ (Abɛ 27:12) Kaa bɔ nɛ wa bɔɔ mɔde kaa wa maa po wa nɔmlɔ tso ɔ he piɛ saminya a, jã kɛ̃ nɛ e sa kaa waa po wa juɛmi kɛ wa tsui he piɛ. Hɛja jemihi nɛ yi wu tso ní peepeehi hyi lɛ tɔ, kɛ níhi gbeyegbeye nɛ a jeɔ ngɛ tiivi nɔ amaniɛ bɔmihi a mi ɔ ma nyɛ ma ha nɛ o kɛ o bimɛ maa pee yeyeeye. Ke nɔ ko sume kaa e maa hyɛ ní nɛ ɔmɛ ɔ, lɔ ɔ tsɔɔ we kaa e fɔɔ. Mawu bɔɛ wa kalegbɔ ɔ kaa e hi ní yayahi a he susue. Mohu ɔ, e sa nɛ wa susu ‘níhi nɛ ji anɔkuale, níhi nɛ da, níhi nɛ he tsɔ, kɛ níhi nɛ ngɛ fɛu’ a he. Ke wa pee jã a, “he jɔmi Mawu ɔ” maa wo wa bua nɛ wa ma ná tue mi jɔmi.​—Filipi Bi 4:8, 9.

SƆLEMI HE HIA WAWƐƐ

Hemi kɛ yemi nɛ mi wa yeɔ bua wɔ nɛ wa daa yeyeeye peemi nya. Baiblo ɔ wo wɔ ga ke ‘wa hɛ nɛ ka si, konɛ wa nyɛ nɛ waa sɔle.’ (1 Petro 4:7) Wa ma nyɛ ma bi Mawu konɛ e ye bua wɔ, nɛ e ha wɔ nile, kɛ kã konɛ wa nyɛ nɛ waa da wa nyagba amɛ a nya, nɛ wa ná he kɛ nɔ fɔmi kaa ‘níhi nɛ wa biɔ lɛ ɔ, e ma ha wɔ.’​—1 Yohane 5:15.

Baiblo ɔ tsɔɔ kaa Satan Abosiami nɛ ngɛ “je ɔ nɔ matsɛ yee” se pi Mawu. (Yohane 12:31; 1 Yohane 5:19) Lɔ ɔ he ɔ, benɛ Yesu tsɔɔ kaa waa sɔle ke, “je wɔ kɛ je nɔ yayami ɔ dɛ mi” ɔ, e ngɛ tsɔɔe kaa Abosiami ngɛ nitsɛnitsɛ. (Mateo 6:13) Alona de ke, “be tsuaa be nɛ ma nu bɛ ɔ, i deɔ Yehowa kaa e ye bua mi konɛ ma nu ye tsui. Jehanɛ hu, ye huno ɔ kɛ mi sɔleɔ. Sɔlemi yeɔ bua mi wawɛɛ.” I nuɔ he kaa bɔ nɛ Baiblo ɔ de ɔ. E de ke: ‘Nɔ tsuaa nɔ nɛ tsɛɔ Yehowa ngɛ anɔkuale mi ɔ, Yehowa hɛɛ lɛ kɛ suu e he.’​—La 145:18.

HƐ NƆ KAMI NƐ WA NGƐ

Ngɛ Yesu Yoku ɔ Nɔ Fiɛɛmi ɔ mi ɔ, e tsɔɔ e se nyɛɛli ɔmɛ nɛ a sɔle ke: “O matsɛ yemi ɔ nɛ ba.” (Mateo 6:10) Mawu Matsɛ Yemi ɔ ma je adesahi a haomihi tsuo kɛ je kɛ ya neneene. Mawu maa gu Yesu nɛ ji, ‘Ganɔ nɛ e yi nɔ jɔ’ ɔ nɔ, nɛ e ma ‘ha nɛ tahi a se maa po ngɛ je ɔ mi tsuo.’ (Yesaya 9:6; La 46:9) Mawu ‘ma dla je mahi babauu a kpɛti. Je ma amɛ be ta hwue hu gblegbleegble; a be dlae kɛ ha ta hu kɔkɔɔkɔ, nɛ nɔ ko be nɔ ko he gbeye woe.’ (Mika 4:3, 4) Wekuhi ma ná bua jɔmi, nɛ a “maa po wehi, nɛ mɛ nitsɛmɛ a maa hi mi; a maa pee wai ngmɔhi, nɛ mɛ nitsɛmɛ a maa ye a mi yiblii.” (Yesaya 65:21) “Nɔ ko nɔ ko be dee hu ke: ‘I be he wami.’”​—Yesaya 33:24.

Ngɛ mɔde nɛ wa bɔɔ kaa wa maa hyɛ wa he nɔ saminya a tsuo se ɔ, pi be tsuaa be nɛ e ngɛ gbɔjɔɔ kaa wa maa tsi ‘níhi nɛ wa li nɛ baa tlukaa’ a nya, aloo wa maa yu wa he ngɛ oslaa he. (Fiɛlɔ 9:11, NW) Jeha lafahi abɔ ji nɛ ɔ nɛ ta hwumi, awi yemi, kɛ hiɔ ngɛ nihi nɛ a pee we nɔ́ ko gbee. Mɛni hɛ nɔ kami lɛ ngɛ kɛ ha nimli nɛ ɔmɛ?

Nimli ayɔhi abɔ nɛ Mawu pɛ lɛ le a yibɔ ɔ maa ba wami mi ekohu. Amlɔ nɛ ɔ, Mawu hɛ ji nihi nɛ a gbo ɔ a nɔ. Lɔ ɔ he ɔ, ke be ɔ su ɔ, e ma ha nɛ nihi nɛ a gbo ɔ “maa je kpo kɛ je a yɔkɔ ɔmɛ a mi.” (Yohane 5:28, 29) Baiblo ɔ de ngɛ gbogboehi a si temi ɔ he ke: “Nɔ́ nɛ wa ngɔ wa hɛ kɛ fɔ nɔ nɛ ɔ ngɛ kaa osɛkɛ nɛ nu wɔ kɛ da si kpɛii.” (Hebri Bi 6:19) Mawu ‘tle Yesu si kɛ je gbeje kɛ ma enɛ ɔ nɔ mi.’​—Bɔfo Ɔmɛ A Ní Tsumi 17:31.

Amlɔ nɛ ɔ, nihi nɛ a ngɛ mɔde bɔe kaa a maa sa Mawu hɛ mi ɔ hu kɛ nyagbahi maa kpe. Akɛnɛ Paul, kɛ Janet, kɛ Alona sɔleɔ daa, nɛ a hemi kɛ yemi ngɛ Mawu si womi ɔmɛ a mi ɔ mi wa he je ɔ, a nyɛ nɛ a ngɛ níhi nɛ haa nɛ a peeɔ yeyeeye ɔ nya dae. ‘Mawu, nɔ nɛ haa nihi tsuo hɛ kɛ nɔ fɔmi ɔ nɛ ha nɛ nyɛ hyi tɔ kɛ bua jɔmi, kɛ he jɔmi tsuo ngɛ nyɛ hemi kɛ yemi ɔ nya’ kaa bɔ nɛ e pee ha Paul, Janet, kɛ Alona a.​—Roma Bi 15:13.