Mɛni Nɔ O Maa Kplɛɛ?

Nɔ gbami loo operation nɛ a peeɔ nɛ́ a kɛ muɔ tsu we ní ɔ ngɛ nɔ yae ngɛ hiɔ tsami hehi fuu ngɛ je ɔ mi. Anɛ o nu tsopahi nɛ muɔ be mi nɛ a kɛ tsaa nɔ blɔ nɔ tomi ɔmɛ a sisi lo? E he hia kaa o le, kɛkɛ ɔ, ke o le haomihi nɛ kɔɔ a he ɔ, o ma nyɛ maa mwɔ o yi mi kpɔ ngɛ tsopa peemi kɛ nɔ gbami blɔ nɔ tomi nɛ o maa kplɛɛ nɔ kɛ ní nɛmɛ nɛ o be nɔ kplɛɛe ɔ a he. Hyɛ video nɛ ji No Blood—Medicine Meets the Challenge ɔ. Lɔɔ se ɔ, moo sɔle ngɛ níhi nɛ o kase kɛ gu sane bimihi nɛ ngɛ sisi ɔ nɔ ɔ a he.—Kadi: Akɛnɛ nɔ gbami he fonihi bɔɔ komɛ ngɛ video ɔ mi heje ɔ, e he hia kaa fɔli nɛ ngɔ hɛ si kami kɛ tsu ní ke a kɛ a bimɛ tsɔwi ngɛ hyɛe.

(1) Mɛni ji yi mi tomi titli heje nɛ Yehowa Odasefoli ngɔɛ muɔ? (2) Mɛni ji Yehowa Odasefoli a suɔmi nya ní ngɛ hiɔ tsami he? (3) Mɛni ji he blɔ nɛ hiɔtsɛ ngɛ? (4) Mɛni heje nile ngɛ mi kaa wa maa kplɛɛ tsopahi nɛ a kɛ daa muɔ nane mi ɔ nɔ? (5) Ke muɔ be ngɛ nɔ ko he fuu ɔ, mɛni ji níhi enyɔ nɛ a he hia nɛ e sa kaa dɔkitahi nɛ pee? (6) Mɛni otihi eywiɛ a he ní tsopahi nɛ a kɛ daa muɔ nane mi ɔ tsuɔ? (7) Mɛni blɔ nɔ dɔkitahi ma nyɛ maa gu konɛ (a) a tsi muɔ bemi fuu nya, (b) a baa wami yiblii tsutsu ɔmɛ a yi, (d) a ha nɔmlɔtso ɔ nɛ ná muɔ fuu, (e) a ha muɔ nɛ maa be ɔ nɛ ko dã? (8) Moo tsɔɔ bɔnɛ blɔ nɔ tomi nɛ ɔmɛ tsuɔ ní ha (a) muɔ nɛ a kɛ tsopa futuɔ mi ngɛ nɔmlɔtso ɔ mi (hemodilution) kɛ (b) muɔ nɛ a haa e ya bɔleɔ si ngɛ klama mi (cell salvage). (9) Mɛni e sa kaa o le ngɛ tsopa nɛ a kɛ daa muɔ nane mi ɔ eko tsuaa eko he? (10) Anɛ a ma nyɛ maa pee operation nguahi nɛ a kɛ muɔ be ní tsue lo? (11) Mɛni ji tsakemi kpakpahi nɛ ngɛ nɔ yae ngɛ tsopa peeli a kpɛti?

Nɔ tsuaa nɔ maa da e he nile nɛ Baiblo ɔ tsɔse ɔ nɔ kɛ mwɔ e yi mi kpɔ keji e maa kplɛɛ hiɔ tsami blɔ nɔ tomi ɔmɛ ekomɛ nɛ je kpo ngɛ video ɔ mi ɔ nɔ. Anɛ o pee o juɛmi ngɛ tsopa peemi kɛ blɔ nɔ tomihi nɛ mo nitsɛ kɛ o bimɛ maa kplɛɛ nɔ ɔ he, nɛ o ngma ngɛ DPA womi ɔ nɔ lo? Kɛ ha sane nɛ ɔmɛ a nya tsɔɔmi fitsofitso ɔ, hyɛ “Questions From Readers” nɛ ngɛ Watchtower nɛ je kpo ngɛ June 15, 2004, kɛ October 15, 2000 mi. Lɔɔ se ɔ, moo da “How Do I View Blood Fractions and Medical Procedures Involving My Own Blood?” (Kɛji Bɔnɛ I Naa Muɔ Mi Ní Nyafinyafihi Kɛ Nɔ Gbami Blɔ Nɔ Tomihi Nɛ A Kɛ Imi Nitsɛ Ye Muɔ Ma Tsu Ní Ngɛ Mi ɔ Ha Kɛɛ?) nɛ ngɛ December 2006 Our Kingdom Ministry kpɛti ɔ nɔ kɛ mwɔ o yi mi kpɔ ngɛ níhi nɛ o maa kplɛɛ nɔ loo o ma kua a he. Nyagbe ɔ, hyɛ nɛ o ngma o yi mi kpɔ mwɔmi ɔ pɛpɛɛpɛ kɛ fɔ o DPA womi ɔ nɔ. E sa nɛ o de nihi nɛ o hla kaa a da si ha mo benɛ o be he wami ɔ, kɛ o wekuno ko nɛ pi Odasefono nɛ a nu o yi mi kpɔ nɛ o mwɔ ɔ sisi saminya.

[Daka ngɛ ba fa 2]

• Anɛ o pee o juɛmi ngɛ tsopa peemi kɛ blɔ nɔ tomihi nɛ mo nitsɛ kɛ o bimɛ maa kplɛɛ nɔ ɔ he lo?

• Ke alini oslaa ko ba ná mo tlukaa a, anɛ o hɛɛ o DPA womi ɔ nɛ o ngma nɔ ní ɔ ngɛ o he lo?