Anɛ O Ngɛ Tsɛ̃e Kɛ Ngɛ Toe Lo?
Mɛni a ngɛ tsɛ̃e kɛ ngɛ toe ɔ? Lɔɔ ji níhi nɛ o maa ngma kɛ fɔ womi nɛ a to he blɔ nya ha Odasefoli nɛ a baptisi mɛ nɛ ji DPA (Hiɔ Tsami He Mlaa Womi) ɔ nɔ. Akɛnɛ ‘o li hwɔɔ se je nami mi sane’ heje ɔ, e he hia wawɛɛ kaa o maa sɛ hlami kɛ pee o juɛmi ngɛ tsopa peemi kɛ hiɔ tsami blɔ nɔ tomi nɛ o maa kplɛɛ nɔ ngɛ oslaa be mi ɔ he, konɛ o ngma o yi mi kpɔ mwɔmi ɔ kɛ fɔ si. (Yak. 4:14; Níts. 15:28, 29) A pee video nɛ ji Transfusion-Alternative Health Care—Meeting Patient Needs and Rights konɛ e ye bua mo. Moo hyɛ video nɛ ɔ, nɛ o ngɔ sane bimihi nɛ ngɛ sisi ɔ kɛ susu níhi nɛ o kase ɔ he konɛ o sɔle ngɛ he.—Kadi: Akɛnɛ nɔ gbami he fonihi bɔɔ komɛ ngɛ video ɔ mi heje ɔ, e he hia kaa fɔli nɛ ngɔ hɛ si kami kɛ tsu ní ke a kɛ a bimɛ tsɔwi ngɛ hyɛe.
(1) Mɛni heje tsopa peeli komɛ ngɛ muɔ nɛ a kɛ tsuɔ ní ngɛ hiɔ tsami mi ɔ he susue ekohu? (2) Moo tsɔɔ operation nguahi etɛ nɛ a pee nɛ a kɛ muɔ tsu we ní ngɛ mi? (3) Tsopa peeli nɛ a ngɛ je kɛ wɛ enyɛmɛ nɛ a suɔ kaa a hyɛ hiɔtsɛmɛ nɛ a kɛ muɔ be ní tsue? Mɛni heje nɛ a suɔ kaa a pee jã? (4) Mɛni ji nɔ́ nɛ níhi a mi hlami nɛ a pee lingmi nɛ ɔ ngɛ hiɔ tsami he ɔ ha nɛ a na ngɛ muɔ nɛ a kɛ tsuɔ ní ɔ he? (5) Mɛni ji oslaa komɛ nɛ ngɛ muɔ nɛ a haa nɔ ɔ he? (6) Mɛni ji nɔ́ nɛ tsopa peeli fuu ngɛ dee ngɛ se nami nɛ ngɛ tsopahi nɛ a kɛ daa muɔ nane mi ɔ he? (7) Mɛni haa nɛ nɔ muɔ nɔ gbɔɔ? Ke nɔ ko muɔ nɔ gbɔ ɔ, e ma nyɛ maa hi si kɛ ya su mɛni be? Mɛni a ma nyɛ maa pee kɛ ye bua nɔ ko nɛ e muɔ nɔ gbɔ? (8) Mɛni ji nɔ́ nɛ a ma nyɛ maa pee nɛ́ wami yiblii tsutsu ɔmɛ maa hiɛ ngɛ hiɔtsɛ ko nɔmlɔtso mi? (9) Mɛni ji blɔ nɔ tomihi nɛ a kɛ tsuɔ ní konɛ a kɛ tsi muɔ bemi fuu nya benɛ a ngɛ operation pee? (10) Anɛ tsopahi nɛ a kɛ daa muɔ nane mi ɔ hi ha jokuɛ tsɔwi loo nihi nɛ a hiɔ ɔ mi wa wawɛɛ lo? (11) Mɛni ji hiɔ tsami kpakpa he mlaahi nɛ he hia wawɛɛ ɔ a kpɛti kake? (12) Mɛni heje e sa kaa Kristofoli nɛ sɛ hlami nɛ a mwɔ a yi mi kpɔ ngɛ hiɔ tsami nɛ a kɛ muɔ tsu we ní ngɛ mi ɔ he ɔ? Mɛni blɔ nɔ wa maa gu kɛ pee enɛ ɔ?
Nɔ tsuaa nɔ maa da e he nile nɛ Baiblo ɔ tsɔse ɔ nɔ kɛ mwɔ e yi mi kpɔ keji e maa kplɛɛ hiɔ tsami blɔ nɔ tomi ɔmɛ ekomɛ nɛ je kpo ngɛ video ɔ mi ɔ nɔ. Anɛ o pee o juɛmi ngɛ tsopa peemi kɛ blɔ nɔ tomihi nɛ mo nitsɛ kɛ o bimɛ maa kplɛɛ nɔ ɔ he, nɛ o ngma ngɛ DPA womi ɔ nɔ lo? Kɛ ha sane nɛ ɔmɛ a nya tsɔɔmi fitsofitso ɔ, moo kane “Mawu Suɔmi” womi ɔ yi 7 kɛ munyu kpahi nɛ a tsɛ se ngɛ mi ɔ. Jehanɛ se hu ɔ, kane “How Do I View Blood Fractions and Medical Procedures Involving My Own Blood?” (Kɛji Bɔnɛ I Naa Muɔ Mi Ní Nyafinyafihi Kɛ Nɔ Gbami Blɔ Nɔ Tomihi Nɛ A Kɛ Imi Nitsɛ Ye Muɔ Ma Tsu Ní Ngɛ Mi ɔ Ha Kɛɛ?) nɛ ngɛ December 2006 Our Kingdom Ministry ɔ mi ɔ. Nyagbe ɔ, hyɛ nɛ o ngma o yi mi kpɔ mwɔmi ɔ pɛpɛɛpɛ kɛ fɔ o DPA womi ɔ nɔ. E sa nɛ o de nihi nɛ o hla kaa a da si ha mo ke o be he wami kɛ o wekuli nɛ pi Odasefoli ɔ konɛ a le yi mi kpɔ nɛ o mwɔ ɔ saminya.
[Daka ngɛ ba fa 3]
• Anɛ o pee o juɛmi ngɛ tsopa peemi kɛ blɔ nɔ tomihi nɛ mo nitsɛ kɛ o bimɛ maa kplɛɛ nɔ ɔ he lo?
• Ke alini oslaa ko ba ná mo tlukaa a, anɛ o hɛɛ o DPA womi ɔ nɛ o ngma nɔ ní ɔ ngɛ o he lo?