Kpe Wayo Nɛ Maa Ye Bua Wɔ Kɛ Po Huɛ Bɔmi Nɛ Ngɛ Waa Kɛ Mawu Wa Kpɛti ɔ He Piɛ
1. Mɛni ji blɔ nya tomi ko nɛ Yehowa guu nɔ kɛ yeɔ bua wɔ konɛ wa tsu sane kpakpa fiɛɛmi nítsumi nɛ a ngɔ wo wa dɛ ɔ?
1 Yehowa kɛ mi mi jɔmi tsɔɔ wɔ níhi nɛ sa kaa waa le, nɛ e tsɔseɔ wɔ, nɛ e woɔ wɔ he wami konɛ wa kɛ tsu nítsumi nɛ e ngɔ wo wa dɛ, nɛ ji sane kpakpa a fiɛɛmi ɔ. (Mat. 24:14; 2 Tim. 4:17) Kpe wayo nɛ wa peeɔ daa jeha a ji níhi nɛ e haa wɔ ɔ a kpɛti kake. Ngɛ Sɔmɔmi jeha 2010 blɔ nya tomi ɔ mi ɔ, munyuyi nɛ a maa sɛsɛ he ji, “Poo Huɛ Bɔmi Nɛ Ngɛ O Kɛ Mawu Nyɛ Kpɛti ɔ He Piɛ,” nɛ a kɛ da Romabi 8:5 kɛ Yuda 17-19 nɔ. A maa je sisi ngɛ February 8 otsi ɔ mi ngɛ jeha 2010.
2. (a) Mɛni blɔhi a nɔ wa ma ná kpe wayo ɔ he se ngɛ? (b) Mɛni blɔhi a nɔ kpe wawihi nɛ a pee kɛ be ɔ ye bua mo ngɛ o fiɛɛmi nítsumi ɔ mi?
2 Bɔnɛ Wa Ma Ná He Se Ha: Kpe ɔ ma kai wɔ ngɛ oslaahi kaa níhi nɛ gblaa wɔ se nɛ a puɛɔ wa be, nɛ́ a jeɔ wa juɛmi kɛ jee níhi nɛ he hia a nɔ ɔ a he. Wa maa kase bɔnɛ wa ma plɛ kɛ te si kɛ wo su nɛ haa nɔ peeɔ nɔ́ nɛ dɛ blɔ, nɛ wa ma susu nɔ́ nɛ tsɔɔ kaa nɔ ko he wa ngɛ Mawu jami mi ɔ hu he. Munyuyi nɛ a gba mi nɛ a maa sɛsɛ he ngɛ Hɔgba blɔ nya tomi ɔ mi ɔ maa tsɔɔ wɔ níhi nɛ ni kakaakahi kɛ wekuhi maa pee konɛ a kɛ Mawu kpɛti huɛ bɔmi ɔ mi nɛ wa ngɛ be nɛ haomihi ngɛ nɔ puee, nɛ́ waa kɛ kahi nɛ nya wa ngɛ kpee nɛ ɔ mi. Blɔ nya tomi ɔ maa ye bua wɔ konɛ waa po wa tsui kɛ huɛ bɔmi nɛ ngɛ waa kɛ Mawu wa kpɛti ɔ he piɛ, konɛ wa ha nɛ jɔɔmihi nɛ Mawu kɛ maa dloo nihi nɛ poɔ huɛ bɔmi nɛ ngɛ a kɛ Mawu kpɛti he piɛ ɔ nɛ hi wa juɛmi mi.
3. Mɛni be nyɛ maa ya nyɛ kpe wayo ɔ, nɛ mɛni e sa kaa o mwɔ o yi mi kpɔ kaa o maa pee?
3 Ke o ná le be kɛ he nɛ nyɛ maa pee nyɛ kpe wayo ɔ ngɛ ɔ pɛ, to blɔ nya nɛ o ya ligbi enyɔ ɔmɛ tsuo konɛ o bu tue. Mo ná nɔ mi mami kaa, nɔ nɛ ngɔɔ mɔde bɔmi kɛ tsuɔ ní saminya a, Yehowa jɔɔ lɛ.—Abɛ 21:5.
4. Mɛni wa heɔ yeɔ kaa wa nine maa su nɔ ngɛ kpe wayo nɛ wa maa ya a?
4 Ngɛ anɔkuale mi ɔ, Yehowa ji nɔ nɛ ha wɔ nike ní kpakpa nɛ ɔ. Blɔ nya nɛ ɔ nɛ tsɔlɔ anɔkualetsɛ kuu ɔ to ji nɔ́ nɛ wa hia bɔnɛ pee nɛ waa ba wa je mi kaa Kristofoli. Wa naa Yehowa si kaa e jee suɔmi mi nɛ e toɔ blɔ nya nɛ ɔmɛ haa wɔ konɛ ‘waa pɛtɛ wa hɛ kɛ nɔ fɔmi ɔ he odase nɛ wa yeɔ ɔ he wawɛɛ.’—Heb. 10:23-25; Yak. 1:17.