Poo O Juɛmi He Piɛ
1. Mɛni ji kpe wayo nɛ wa maa pee ngɛ 2013 sɔmɔmi jeha a mi ɔ munyuyi, nɛ mɛni ji yi mi tomi heje nɛ a to kpe ɔ he blɔ nya ngɛ?
1 Yesu tsɔɔ e kaseli ɔmɛ kaa a suɔ Yehowa kɛ a tsui tsuo, a klaa tsuo, kɛ a juɛmi tsuo. (Mat. 22:37, 38) A to jeha nɛ ɔ kpe ɔmɛ a he blɔ nya nɛ a ye bua wɔ konɛ waa wo bɔnɛ wa ji ha ngɛ wa tsui mi ɔ mi he wami. Ke wa ma kai ɔ, wa kpe ngua a munyuyi ji ‘Poo O Tsui He Piɛ!’ Ligbi kake kpe klɛdɛɛ ngɛ 2013 sɔmɔmi jeha a mi ɔ munyuyi ji, ‘Poo O He Nile He Piɛ.’ Nɛ kpe wayo nɛ wa maa pee ngɛ jeha nɛ wa maa sɛ mi ɔ yi ji, ‘Poo O Juɛmi He Piɛ,’ nɛ a kɛ da Mateo 22:37 nɔ. A to kpe nɛ ɔ he blɔ nya nɛ e ye bua wɔ nɛ waa hyɛ wa susumihi saminya konɛ wa ha nɛ a sa Yehowa hɛ mi.
2. Ke wa ya kpe ɔ, mɛni sane bimihi a heto e sa kaa wa hla?
2 Níhi Nɛ A Maa Tu A He Munyu: Ke wa ya kpe ɔ, e sa nɛ waa bu tue saminya, nɛ wa hla sane bimihi nɛ ɔmɛ nɛ jeɔ oti ɔmɛ kpo ɔ a heto:
• Kɛ wa maa pee kɛɛ konɛ wa ko susu níhi a he kaa bɔnɛ ‘nɔmlɔ adesa susuɔ’ níhi a he ɔ?
• Kɛ wa ma plɛ kɛ je hɛ mi hami nɔ́ ɔ ngɛ nihi nɛ a he we yi ɔ a juɛmi nɔ ha kɛɛ?
• Mɛni juɛmi wa suɔ nɛ waa hɛɛ?
• Mɛni ji se namihi nɛ ngɛ yi mi tɛ nɛ a pueɔ ngɛ ní kpakpahi a he ɔ he?
• Kɛ wa ma plɛ kɛ ha nɛ Yehowa nɛ kudɔ wa susumi kɛɛ?
• Mɛni blɔ nɔ hunomɛ, yigbayi, fɔli kɛ bimɛ maa gu kɛ ha nɛ bua jɔmi nɛ hi weku ɔ mi?
• Kɛ wa ma plɛ kɛ dla wa he kɛ ha Yehowa ligbi ɔ kɛɛ?
• Ke a ke waa pee wa juɛmi klaalo kɛ ha nítsumi ɔ, mɛni lɔɔ tsɔɔ?
• Nihi nɛ a kɛ níhi nɛ a kaseɔ ɔ tsuɔ ní ɔ, mɛni se a náa?
3. Mɛni heje nɛ e sa nɛ waa ya kpe ɔ ligbi enyɔ ɔ tsuo, waa bu tue, nɛ waa kɛ nɔ́ nɛ wa kase ɔ nɛ tsu ní ɔ?
3 Satan ngɛ mɔde bɔe kaa e ma puɛ wa juɛmi. (2 Kor. 11:3) Enɛ ɔ heje ɔ, e sa nɛ waa bɔ mɔde nɛ wa ha nɛ wa susumihi nɛ a sa Yehowa hɛ mi. E he hia nɛ waa ya nɔ nɛ waa hɛɛ Kristo juɛmi ɔ konɛ waa hwu kɛ si je yaya nɛ ɔ. (1 Kor. 2:16) Lɔɔ he ɔ, moo to blɔ nya konɛ o ya kpe wayo ɔ ligbi enyɔ ɔ tsuo. Bu munyu ɔmɛ tue saminya. Ke waa kɛ munyuhi nɛ wa maa nu ɔ tsu ní ɔ, e maa ye bua wɔ nɛ waa dla wa juɛmi konɛ wa kɛ kã nɛ tsu Matsɛ Yemi fiɛɛmi nítsumi ɔ.—1 Pet. 1:13.