Blɔ Nya Nɛ A To Kɛ Ha Mawu Sɔmɔli
1. Mɛni blɔ nya tomi ehe ko sisi lɛ a je ngɛ 1938, nɛ mɛni yi mi tomi heje nɛ a je blɔ nya tomi nɛ ɔ sisi?
1 Yehowa asafo ɔ je blɔ nya tomi ehe ko sisi ngɛ jeha 1938 ɔ mi. Blɔ nya tomi ɔ ji kaa a haa nɛ asafo komɛ blaa kɛ peeɔ zone assemblies nɛ amlɔ nɛ ɔ, a tsɛɛ lɛ ke kpe wayo ɔ. Mɛni ji yi mi tomi heje nɛ a to blɔ nya nɛ ɔ. Informant (amlɔ nɛ ɔ, a tsɛɛ lɛ Wa Matsɛ Yemi Sɔmɔmi ɔ) nɛ je kpo ngɛ January 1939 ɔ ha heto ke: “Kpe nɛ ɔmɛ piɛɛ blɔhi a nɔ nɛ Yehowa Teokrase Blɔ Nya Tomi ɔ guu kɛ hyɛɛ e Matsɛ Yemi sɔmɔmi nítsumi ɔ nɔ ɔ a he. Tsɔsemi nɛ a kɛ haa ngɛ kpe nɛ ɔmɛ a sisi ɔ he hia nɔ tsuaa nɔ bɔnɛ pee nɛ e nyɛ nɛ e tsu nítsumi nɛ a kɛ wo e dɛ ɔ.” Ke wa susu Matsɛ Yemi fiɛɛli a he hiɛmi nɛ ya hɛ mi kɛ je 58,000 ngɛ 1938 ɔ kɛ ba si nɔ́ nɛ hiɛ pe 7,000,000 ngɛ jeha 2009 ɔ he ɔ, e ngɛ heii kaa kpe wawi nɛ wa yaa a ngɛ Mawu sɔmɔli ye buae nɛ a ngɛ ‘nítsumi nɛ a kɛ wo a dɛ ɔ tsue’!
2. Mɛni ji munyu komɛ nɛ wa maa bu tue ngɛ jeha nɛ maa ba a kpe wayo ɔ sisi?
2 Munyuhi Nɛ A Ma Susu A He Ngɛ Jeha Nɛ Maa Ba a Mi: Wa ngɛ blɔ hyɛe kaa kpe wayo nɛ a maa pee ngɛ sɔmɔmi jeha nɛ ma a mi ɔ maa wo wɔ he wami wawɛɛ. Kpe ɔ munyuyi ɔ ji “Nyɛ Pi Je ɔ Mi Bi,” nɛ a kɛ da Yohane 15:19 ɔ nɔ. Mɛni ji munyu komɛ nɛ a maa tu ngɛ kpe ɔ sisi nɛ Kristofoli ma ná he se wawɛɛ? Hɔ ɔ, wa maa bu munyu nɛ ji, “Be Tsuo Sɔmɔmi Nítsumi ɔ Poo Wa He Piɛ—Ngɛ Mɛni Blɔ Nɔ?” ɔ tue. Jehanɛ se hu ɔ, wa maa bu munyuyi nɛ a gba mi etɛ nɛ e yi ji, “Ko Ha Nɛ Ní Nɛ Ɔmɛ Nɛ A Sɛ O He Mu:” “Lohwe Awi Yelɔ ɔ” “Ajuama Kpanaku ɔ,” kɛ “Jua Yeli Ɔmɛ” ɔ tue. Hɔgba a, wa maa bu munyuyi nɛ a gba mi nɛ e yi ji “Moo Suɔ Yehowa, Se Pi Je ɔ” ɔ tue. Munyu kpahi hu nɛ wa maa bu tue ɔ ji, “Nyɛɛ Ya Nɔ Nɛ Nyɛɛ Hi Si ‘Kaa Nibwɔhi Kɛ Blɔ Hiali,’” kɛ “Nyɛ Tsui Nɛ Ko Po! Nyɛ Ma Nyɛ Maa Ye Je ɔ Nɔ Kunimi.”
3. Ke wa ya kpe wayo ɔ, mɛni se nɛ wa ma ná?
3 Benɛ nyɛmiyo ko nɛ e gbɔjɔ ngɛ fiɛɛmi nítsumi ɔ mi ɔ ya kpe wayo ko nɛ a pee lingmi nɛ ɔ, e ngma ke, kpe wayo ɔ ha nɛ e susu e si himi he ekohu nɛ e ma e juɛmi nya si kaa ‘e kɛ e he maa wo fiɛɛmi nítsumi ɔ mi mohu pe nɛ e maa ngɔ níhi kɛ je e nya.’ Atsinyɛ jemi ko be he kaa kpe wayo nɛ wa maa pee ngɛ sɔmɔmi jeha ehe ɔ mi ɔ maa ye bua wɔ tsuo konɛ waa suɔ Yehowa mohu pe nɛ wa maa suɔ je ɔ. (1 Yoh. 2:15-17) Moo bɔ mɔde kaa o maa ya kpe wayo ɔ, nɛ ke o ya hu ɔ, moo bu munyu ɔmɛ a tue saminya bɔnɛ pee nɛ o ná blɔ nya nɛ ɔ nɛ a je suɔmi mi nɛ a to kɛ ha Kristofoli ɔ he se!