Jeha 2010 Ligbi Kake Kpe Klɛdɛɛ He Blɔ Nya Tomi
1. (a) Mɛni ji ligbi kake kpe klɛdɛɛ munyuyi komɛ nɛ wa susu he ngɛ jeha bɔɔ nɛ be ɔ mi? (b) Anɛ ligbi kake kpe klɛdɛɛhi nɛ a pee kɛ be ɔ a mi munyu komɛ pɔtɛɛ ye bua mo ngɛ fiɛɛmi mi lo?
1 “Nyɛ Yɔse Níhi Nɛ He Hia Titli,” “Nyɛɛ Da Si Kpɛii Kaa Kuu Kake,” “Nyɛɛ Ya Nɔ Nɛ Nyɛɛ Ye Anɔkuale ɔ He Odase,” kɛ “Wa Ji Zu—Yehowa Ji Wa Puɛlɔ.” (Fil. 1:9, 10, 27; Yoh. 18:37; Yes. 64:8) Enɛ ɔmɛ ji ligbi kake kpe klɛdɛɛhi nɛ wa pee kɛ be ɔ a mi munyuyi komɛ nɛ wa susu he. Anɛ o pee klaalo kaa o maa ya sɔmɔmi jeha 2010 ligbi kake kpe klɛdɛɛ ɔ lo? Munyuyi nɛ a ma susu he ɔ ji: ‘Be ɔ Nɛ Piɛ ɔ Pi Hu,’ nɛ a kɛ da 1 Korintobi 7:29 nɔ.
2. Mɛni wa ma nyɛ maa pee kɛ tle kpe nɛ ɔ he bua jɔmi si?
2 Ke a fia ligbi kake kpe klɛdɛɛ ɔ he adafi ngɛ nyɛ asafo ɔ mi pɛ nyɛɛ kɛ bua jɔmi nɛ bɔni he ní sɛɛmi. Fɔli komɛ haa nɛ a bimɛ ngmaa kpe ɔ date ngɛ kalenda nɔ kɛ ní kpahi nɛ a he maa hia kɛ ha kpe ɔ kɛ fɔɔ si, nɛ a kaneɔ be ɔ kɛ ya si benɛ ligbi ɔ maa su. A peeɔ enɛ ɔ kɛ yeɔ bua a bimɛ ɔmɛ konɛ a hyɛ kpe ɔ blɔ. Nyɛ ma nyɛ maa ngɔ nyɛ gbɔkuɛ Weku Mawu Jami be ɔ eko kɛ nylɔ otihi nɛ nyɛ ngma ngɛ ligbi kake kpe klɛdɛɛhi nɛ a pee kɛ be ɔ mi. Nyɛɛ kɛ nyɛ weku ɔmɛ ma nyɛ ma susu otihi nɛ ngɛ Benefit From Theocratic Ministry School Education womi ɔ bafa 13-16 he kɛ dla nyɛ tsui bɔnɛ pee nɛ “nyɛɛ bu tue saminya.”—Luka 8:18.
3. Mɛni wa ma nyɛ maa pee bɔnɛ pee nɛ wa ná kpe ɔ he se kɛ pi si?
3 Ngɔɔ Nɔ́ Nɛ O Kase ɔ Kɛ Tsu Ní: Nɔ́ nɛ nihi pɔɔ demi benɛ a kpa kpe ji, “Kpe nɛ ɔ ngɔ!” E ji anɔkuale, ejakaa blɔ nya tomi nɛ ɔ piɛɛ ní kpakpahi nɛ Yehowa kɛ haa wɔ ɔ he. (Abɛ 10:22) Loko o ma ná munyu nɛ o ya nu ɔ he se ɔ, e sa nɛ o susu he, nɛ o ngɔ kɛ to. (Luka 8:15) Ke a kpa kpe ɔ nɛ o yaa we mi ɔ, o kɛ o weku ɔ, loo nihi nɛ o kɛ ngɛ lɔle kake mi ɔ nɛ́ sɛɛ munyuhi nɛ a tu ɔ he ní. Nyɛ susu otihi nɛ nyɛɛ kɛ fɔ nyɛ hɛ mi kɛ munyuhi nɛ maa ye bua nyɛ ngɛ fiɛɛmi nítsumi ɔ mi ɔ he. Ke nyɛ pee jã a, e ma ha nɛ munyuhi nɛ nyɛ nu ɔ maa tlɔ nyɛ juɛmi mi.—Yak. 1:25.
4. Mɛni heje nɛ kpe nɛ ɔ he maa ba se nami ha wɔ?
4 Ke nɔ ko ha wɔ nike ní ko nɛ lɔɔ tutuutu ji nɔ́ nɛ hia wɔ ɔ, wa bua jɔɔ wawɛɛ. Anɛ waa kɛ bua jɔmi ngɛ nɔ́ nɛ Yehowa dla kɛ fɔ si ha wɔ ngɛ ligbi kake kpe klɛdɛɛ nɛ wa maa ya a blɔ hyɛe lo? Wa he ye kaa wa ma ná he se ngɛ blɔhi fuu a nɔ. Wa ma nyɛ maa hyɛ blɔ kaa wa hiɔwe Tsɛ, Yehowa, ma ha wɔ nike ní nɛ ji he wami womi kɛ tsɔsemi konɛ wa kɛ tsu nítsumi nɛ e kɛ wo wa dɛ ɔ.—2 Tim. 4:2; Yak. 1:17.