Mawu Munyu ɔ Ngɛ He Wami
1. Mɛni ji ligbi kake kpe klɛdɛɛ ngɛ 2014 sɔmɔmi jeha a mi ɔ munyuyi?
1 Baiblo ɔ be kaa nɔ́ ko nɛ adesahi nɛ a yi mluku pee, e ngɛ he wami nɛ e kɛ ma tsake wa si himi, konɛ e ha wa susumi kɛ wa ní peepee nɛ kɛ Yehowa suɔmi nya ní peemi nɛ kɔ. Kɛ Mawu Munyu ɔ ngɛ he wami ha kɛɛ? Mɛni blɔ nɔ nɛ wa ma nyɛ maa ngɔ he wami nɛ e ngɛ ɔ kɛ tsu ní saminya ngɛ wa si himi mi? Mɛni blɔ nɔ wa ma nyɛ maa ngɔ kɛ tsu ní saminya kɛ ye bua nihi? Wa ngɛ nɔ mi mami kaa a maa wo wɔ tsuo he wami ngɛ mumi mi be mi nɛ a ma ha sane bimi nɛ ɔmɛ a heto ngɛ ligbi kake kpe klɛdɛɛ nɛ wa maa pee ngɛ 2014 sɔmɔmi jeha a mi ɔ. Munyuyi ɔ ji, ‘Mawu Munyu ɔ Ngɛ He Wami,’ nɛ a kɛ da Hebribi 4:12 ɔ nɔ.
2. Mɛni sane bimihi nɛ e sa kaa wa hla a hetohi?
2 Mo Hla Sane Bimi Nɛ Ɔmɛ A Heto: Ke o ngɛ munyuhi nɛ a maa tu ngɛ kpe ɔ sisi ɔ tue bue ɔ, moo ngma sane bimihi nɛ nyɛɛ se nɛ ɔmɛ a heto.
• Mɛni heje nɛ e sa kaa wa ná hɛ kɛ nɔ fɔmi ngɛ Yehowa Munyu ɔ mi ɔ? (La 29:4)
• Mɛni blɔ nɔ nɛ he wami nɛ ngɛ Mawu Munyu ɔ mi ɔ ma nyɛ ma tsake wa si himi ngɛ? (La 34:8)
• Mɛni blɔ nɔ o ma nyɛ maa ngɔ he wami nɛ ngɛ Mawu Munyu ɔ mi ɔ kɛ tsu ní ngɛ o sɔmɔmi nítsumi ɔ mi? (2 Tim. 3:16, 17)
• Mɛni wa maa pee konɛ he wami nɛ ngɛ Satan je ɔ mi nɛ sisiɔ nɔ ɔ nɛ ko ná wa nɔ he wami? (1 Yoh. 5:19)
• Mɛni o maa pee kaa niheyo loo yiheyo konɛ o ye manye ngɛ mumi mi? (Yer. 17:7)
• Mɛni blɔ nɔ nɛ ke wa gbede ɔ, wa ma nyɛ ma ná he wami ngɛ? (2 Kor. 12:10)
• Ke wa ngɛ su yaya ko nɛ e kpami ngɛ yee ha wɔ po ɔ, mɛni ma nyɛ maa ye bua wɔ konɛ waa ya nɔ nɛ waa pee tsakemi? (Efe. 4:23)
3. Ngɛ munyuhi nɛ wa ma ya bu tue ɔ se ɔ, mɛni blɔ kpa nɔ wa ma nyɛ maa gu kɛ ná ligbi kake kpe klɛdɛɛ ɔ he se?
3 Wa ma ná munyuhi nɛ wa ma ya bu tue ɔ he se saminya! Jehanɛ hu ɔ, ngɛ ligbi kake kpe klɛdɛɛ ɔ sisi ɔ, wa ma ná he blɔ nɛ waa kɛ wa nyɛmimɛ nɛ a je asafo kpahi a mi ɔ ma ná huɛ bɔmi kaa bɔnɛ wa peeɔ ngɛ kpe wawi kɛ kpe nguahi a sisi ɔ. (La 133:1-3; 2 Kor. 6:11-13) Lɔɔ he ɔ, moo ngɔ be konɛ o kɛ o huɛmɛ nɛ o na mɛ kɛ ɔ nɛ bɔ, nɛ o pee huɛ ehehi. Ke kpokpa ngua nɔ hyɛlɔ aloo nyɛmi ko nɛ a tsɔ kɛ je Betel nɛ maa hyɛ nyɛ ligbi kake kpe klɛdɛɛ ɔ nɔ ɔ, moo ngɔ he blɔ nɛ ɔ nɛ o kɛ lɛ kɛ e yo ɔ nɛ sɛɛ ní. Niinɛ, wa ngɛ yi mi tomi babauu nɛ wa ma nyɛ maa da nɔ kɛ hyɛ ligbi kake kpe klɛdɛɛ ɔ blɔ!