‘Niye Ní Ngɛ Be Nɛ Sa Mi’
1. Mɛni blɔ nɔ ligbi kake kpe klɛdɛɛ nɛ a pee lingmi nɛ ɔ ye bua mo kɛ ni kpahi ngɛ?
1 Ke wa ya wa ligbi kake kpe klɛdɛɛ ɔ, nɔ́ nɛ wa pɔɔ demi ji, “Munyu nɛ ɔ ba ngɛ be nɛ sa mi!” Kpokpa nɔ hyɛlɔ ko bɔ amaniɛ kaa benɛ ni komɛ nɛ a ngɛ e kpokpa a mi ɔ ya ligbi kake kpe klɛdɛɛ nɛ a pee lingmi nɛ ɔ, a tsɔɔ kaa a suɔ nɛ a pee babauu ngɛ sɔmɔmi nítsumi ɔ mi. Kpokpa nɔ hyɛlɔ ko hu de ke, “E ye bua wɔ nɛ wa susu níhi a he saminya ngɛ be nɛ wa ngɛ mi nɛ ɔ mi.” Kpokpa nɔ hyɛlɔ kpa ko hu de ke, “Fiɛɛli babauu tsɔɔ kaa ligbi kake kpe klɛdɛɛ ɔ ji nɔ́ nɛ kai mɛ nɛ a na kaa e sa kaa a ngɔ a juɛmi kɛ fɔ nɔ́ nɛ he hia wawɛɛ nɛ ji sɔmɔmi nítsumi ɔ nɔ.” Mɛni blɔ nɔ ligbi kake kpe klɛdɛɛ ɔ ye bua mo ngɛ?
2. Mɛni ji munyu komɛ nɛ wa ma ya nu ngɛ ligbi kake kpe klɛdɛɛ nɛ a maa pee ngɛ sɔmɔmi jeha nɛ ma a mi?
2 Ligbi kake kpe klɛdɛɛ nɛ a maa pee ngɛ sɔmɔmi jeha nɛ ma a mi ɔ hu maa ye bua wɔ saminya. Kpe ɔ munyuyi ɔ ji “Moo Sa We Ngɛ Yehowa Ngɔ,” nɛ a kɛ da La 118:8, 9 ɔ nɔ. Munyu komɛ nɛ a maa tu ngɛ kpe ɔ ji nɛ ɔ nɛ: “Mɛni Blɔ Nɔ Yehowa Ji Wa Wesa He Ngɛ Fimi Be Mi Ngɛ,” “Moo Ye Bua Nihi Konɛ A Sa We Ngɛ Yehowa Pɛli Ɔmɛ A Sisi,” “Moo Kase Yehowa Nɛ O Pee Wesa He Kɛ Ha Nihi,” “Nihewi Kɛ Yihewi, Nyɛɛ Ngɔ Nyɛ Hɛ Kɛ Fɔ Yehowa Nɔ!” kɛ “Wa Mumi Mi Paradeiso ɔ Ji Wesa He Nɛ Yehowa To He Blɔ Nya Ha Wɔ.”
3. Mɛni blɔ nɔ wa ma nyɛ maa gu kɛ ná ligbi kake kpe klɛdɛɛ nɛ wa maa ya a he se?
3 Bɔnɛ Pee Nɛ O Ná He Se: Ke a ná nɛ a tsɔɔ be nɛ a kɛ maa ya ligbi kake kpe klɛdɛɛ ɔ, moo to blɔ nya pɔtɛɛ nɛ o ya, bɔɔ mɔde nɛ o fɔ o Baiblo kaseli ɔmɛ hu nine nɛ a piɛɛ o he kɛ ya. Bɔnɛ pee nɛ wa nyɛ nɛ waa kɛ ‘tsui si tomi nɛ wo yiblii ɔ,’ e sa kaa waa kɛ nɔ́ nɛ wa ma ya nu ɔ nɛ tsu ní. (Luka 8:15) Enɛ ɔ he ɔ, ke o ya kpe ɔ, moo bu tue saminya nɛ o ngma otihi kɛ blɔ tsɔɔmihi nɛ o to kaa o kɛ ma tsu ní ngɛ o si himi kɛ o fiɛɛmi nítsumi ɔ mi ɔ kɛ fɔ si. Ke a gbe kpe ɔ nya a, mo hla be konɛ o kɛ o weku ɔ nɛ susu munyuhi nɛ nyɛ ya nu ngɛ kpe ɔ a he, konɛ nyɛɛ hyɛ blɔhi pɔtɛɛ a nɔ nɛ nyɛ ma nyɛ maa gu konɛ mo kɛ o weku ɔ tsuo nyɛɛ kɛ munyu ɔmɛ nɛ tsu ní.
4. Mɛni heje nɛ e sa kaa waa hyɛ ligbi kake kpe klɛdɛɛ nɛ wa maa ya a blɔ?
4 Kaa bɔnɛ e biɔ níhi a he susumi kɛ mɔde bɔmi loko a kɛ hooɔ niye ní ngɔngɔɛ nɛ haa nɔ he wami ɔ, jã kɛ̃ lɛ a kɛ suɔmi kɛ níhi a he susumi dla jeha nɛ maa ba a ligbi kake kpe klɛdɛɛ ɔ kɛ ha wɔ. E ba mi kaa Yehowa maa jɔɔ mɔde nɛ o ngɛ bɔe kaa o maa ya kpe nɛ ɔ konɛ o ná ‘niye ní nɛ a kɛ ha Kristofoli ngɛ be nɛ sa mi’ nɛ ɔ he se ɔ nɔ.—Mat. 24:45.