Kɛ O Ma Ha Heto Kɛɛ?
1. Mɛni heje ke nɔ ko bi wɔ sane ɔ, e sa nɛ waa kase bɔnɛ Yesu plɛ kɛ ha sane bimihi a heto ɔ?
1 Blɔ nɔ nɛ Yesu gu kɛ ha sanehi nɛ nihi bi lɛ ɔ a heto ɔ peeɔ nihi nyakpɛ kɛ ba si mwɔnɛ ɔ. Sane tsuaa sane nɛ a ma bi wɔ ngɛ fiɛɛmi mi ɔ, e sa nɛ waa kase bɔnɛ Yesu plɛ kɛ ha nihi heto ha a.—1 Pet. 2:21.
2. Mɛni maa ye bua wɔ konɛ wa ha sanehi nɛ nihi biɔ wɔ ɔ heto nɛ nuu tso?
2 Bu Tue Kekle: Yesu susu yi mi tomi nɛ nihi hɛɛ nɛ a kɛ biɔ lɛ sane ɔ he. Ngɛ be komɛ a mi ɔ, e sa nɛ wa bi sane nɛ ma ha nɛ waa le nɔ́ tutuutu nɛ nɔ ɔ ngɛ susue. Ke nɔ ko bi ke, “Nyɛ he ɔ Yesu nɔ yeɔ lo?” ɔ, eko ɔ, Bloonya nɛ wa yi ɔ heje nɛ e bi jã a nɛ. Ke o yɔse nɔ́ nɛ e ngɛ hlae nɛ e le ɔ, lɔɔ maa ye bua mo konɛ o kɛ lɛ nɛ susu sane ɔ he kɛ pi si.—Luka 10:25-37.
3. Mɛni wa ngɛ nɛ maa ye bua wɔ konɛ wa ha nihi hetohi nɛ sa kɛ je Ngmami ɔ mi?
3 Ngɔɔ Mawu Munyu ɔ Kɛ Ha Heto: E hi saminya kaa o maa ngɔ Baiblo ɔ kɛ ha nihi a sane bimihi a heto. (2 Tim. 3:16, 17; Heb. 4:12) Womi nɛ ji Reasoning From the Scriptures kɛ “Bible Topics for Discussion” (Baiblo Mi Munyu Tsohi Kɛ Ha Ní Sɛɛmi) nɛ ngɛ New World Translation of the Holy Scriptures mi ɔ yeɔ bua wɔ nɛ wa haa sane bimihi a heto nɛ sa. Ke nɔ nɛ bi sane ɔ he we Baiblo ɔ yi po ɔ, o ma nyɛ maa gu ga blɔ nɔ kɛ tsɔɔ lɛ nɔ́ nɛ Ngmami ɔ tsɔɔ. Wo nɔ nɛ bi sane ɔ he wami konɛ e susu ní lemi nɛ da nɛ ngɛ Baiblo ɔ mi ɔ he saminya. Ke o kase Yesu ɔ, hetohi nɛ o ma ha nihi nɛ biɔ mo sanehi ɔ maa pee kaa “sika tsu akutuhi nɛ a to ngɔ wo sika hiɔ nɔ́ mi,” nɛ bu ngɛ he, nɛ ngɛ fɛu, nɛ he jua wa.—Abɛ 25:11.
4. Mɛni behi e hi kaa wa be sane nɛ a ma bi wɔ ɔ heto hae?
4 E Sa Kaa Wa Ha Sane Bimihi Tsuo A Heto Lo? Ke a bi mo sane ko nɛ o li heto ɔ, e ko pee mo zo kaa o ma de ke: “I li, se ma nyɛ ma ya hla níhi a mi konɛ ma ba ha mo heto pee se.” O he si nɛ o maa ba kɛ wetsɛ ɔ he bua jɔmi kpo nɛ o ma je ngɛ blɔ nɛ ɔ nɔ ma ha nɛ e maa kplɛɛ nɔ kaa o ba slaa lɛ ekohu. Ke o yɔse kaa nɔ nɛ bi mo sane ɔ ji si temi kɛ wolɔ nɛ́ ngɛ hlae kaa e kɛ mo maa je atsinyɛ kɛkɛ ɔ, moo kase Yesu nɛ o ha lɛ heto kpiti. (Luka 20:1-8) Jã kɛ̃ ke nɔ nɛ be anɔkuale ɔ he bua jɔmi nitsɛ ngɛ hlae kaa e kɛ mo maa je atsinyɛ ɔ, moo po ní sɛɛmi ɔ nɔ kɛ bumi, nɛ o ngɔ be ɔ kɛ ya hla nihi nɛ hɛɛ tsui kpakpa amɛ.—Mat. 7:6.
5. Mɛni nɔ hyɛmi nɔ́ Yesu pee ha wɔ ngɛ sane bimihi a heto hami mi?
5 Yesu le kaa e hia Yehowa yemi kɛ buami wawɛɛ loko e ma nyɛ ma tsu nítsumi nɛ a kɛ wo e dɛ kaa e ‘ye anɔkuale ɔ he odase,’ nɛ́ tsui kpakpatsɛmɛ a sane bimihi a heto nɛ e ma ha hu piɛɛ he ɔ. (Yoh. 18:37) E ji he blɔ nɛ wa ná kaa wa maa kase Yesu konɛ wa ha “ni nɛmɛ nɛ a ngɛ neneene wami hlae” ɔ a sane bimihi a heto.—Níts. 13:48, NW.