Anɛ O Dla O He Kɛ To Tlukaa Odase Yemi Lo?
1. Mɛni nɔ hyɛmi nɔ́ tsɔɔ kaa tlukaa odase yemi ma nyɛ maa wo yiblii?
1 Tlukaa odase yemi nyɛɔ woɔ yiblii saminya. Nɔ hyɛmi níhi fuu ngɛ Baiblo ɔ mi nɛ kɔɔ tlukaa odase yemi nɛ wo yiblii ɔ he. (Yoh. 4:7-15) Mɛni wa ma nyɛ maa pee kɛ dla wa he kɛ to odase yemi ngɛ blɔ nɛ ɔ nɔ?
2. Mɛni blɔ nɔ wa tade womi kɛ wa he dlami ma nyɛ maa ye bua wɔ konɛ waa ye odase?
2 Wa Tade Womi Kɛ Wa He Dlami: Ke wa dla wa he saminya be tsuaa be ɔ, lɔɔ maa ye bua wɔ nɛ waa kɛ nihi maa sɛɛ wa hemi kɛ yemi ɔ he ní faa. (1 Tim. 2:9, 10) Ke e peeɔ wɔ kaa wa he dlami sɛ ɔ, wa be nyɛe maa ye odase. Se ke nihi naa wɔ kaa wa dlaa wa he bɔnɛ sa a, lɔɔ ma nyɛ ma ha nɛ á bi wɔ sane. Kaa nɔ hyɛmi nɔ́ ɔ, nyumu klamɔ jalɔ ko hi si ngɛ Odasefono ko kɛ e yo a kasa nya ngɛ lɔle mi benɛ a ngɛ blɔ hiae. Nyɛmi ɔmɛ a he dlami ɔ ha nɛ nyumu ɔ bi mɛ keji Kristofoli ji mɛ lo. Enɛ ɔ bli blɔ nɛ a sɛɛ Baiblo ɔ mi ní ngmlɛfia etɛ sɔuu.
3. Kaa bɔnɛ Yesu pee ɔ, mɛni blɔ nɔ o gu kɛ je ní sɛɛmi sisi?
3 Ní Sɛɛmi Si Tlemi: Benɛ Yesu kɛ Samaria yo ɔ kpe ngɛ Yakob vu ɔ he ɔ, nɔ́ nɛ e pee kɛ je ní sɛɛmi sisi kɛkɛ ji kaa, e ba yo ɔ nɛ́ e ha lɛ nyu nɛ e nu. Jã kɛ̃ wɔ hu wa ma nyɛ ma de nɔ́ ko loo wa bi sane kpiti ko konɛ wa kɛ je ní sɛɛmi sisi. E ngɛ mi kaa be komɛ ɔ jã peemi he ma nyɛ maa wa ha wɔ lɛɛ, se ke wa ngɔ wa hɛ kɛ fɔ Yehowa nɔ ɔ, wa ma ‘ná kã’ kɛ je ní sɛɛmi sisi.—1 Tes. 2:2.
4. Mɛni blɔ nɔ wa ma nyɛ ma dla wa he kɛ to tlukaa odase yemi?
4 Mo Hla He Blɔhi: Fiɛɛli fuu guu blɔ slɔɔtohi a nɔ kɛ yeɔ tlukaa odase. Moo hyɛ bɔnɛ o si fɔfɔɛ ngɛ ha, nɛ́ o susu nihi nɛ o kɛ ma nyɛ maa kpe daa ligbi ɔ a he. Moo hɛɛ womihi nɛ sa kɛ Baiblo wayoo kɛ to dɛ. Moo to níhi a he hɛ, nɛ o je huɛ bɔmi su kpo kɛ tsɔɔ nihi nɛ o kɛ mɛ maa kpe ɔ. Ke o sɛ hlami nɛ o susu he blɔhi nɛ o ma nyɛ ma ná ngɛ ligbi ɔ mi ɔ he ɔ, o maa pee klaalo kɛ ye odase saminya.—Fil. 1:12-14; 1 Pet. 3:15.
5. Mɛni heje e sɛ nɛ waa bu tlukaa odase yemi kaa nɔ́ ko nyafii?
5 Wa ngɛ yi mi tomi enyɔ heje nɛ sa kaa wa hla he blɔhi kɛ ye tlukaa odase—suɔmi nɛ wa suɔ Mawu kɛ wa nyɛmi nɔmlɔ. (Mat. 22:37-39) Akɛnɛ be nɛ piɛ kɛ ha fiɛɛmi nítsumi ɔ pi heje ɔ, e sa kaa waa to blɔ nya kɛ ha tlukaa odase yemi. E sa nɛ waa pee klaalo kaa wa maa da he blɔ saisaa nɛ wa ma ná a nɔ kɛ ye Matsɛ Yemi sane kpakpa a he odase kɛ tsɔɔ nihi loko be nɛ be.—Rom. 10:13, 14; 2 Tim. 4:2.