O Ma Nyɛ Maa Ye Odase Be Mi Nɛ O Be Fiɛɛmi Tso Mi!
1. (a) Odase nɛ wa yeɔ ngɛ be mi nɛ wa be fiɛɛmi tso mi ɔ tsɔɔ mɛni? (b) Nihi enyɛmɛ lɛ a ngɛ hiɛ ɔ nɛ a ba le anɔkuale ɔ kɛ gu odase nɛ a ye mɛ se pi ngɛ fiɛɛmi tso mi ɔ nɔ?
1 Nihi enyɛmɛ lɛ a ngɛ nyɛ asafo ɔ mi nɛ a ba le anɔkuale ɔ kɛ gu odase nɛ a ye mɛ se pi ngɛ fiɛɛmi tso mi ɔ nɔ? Ke o le a yibɔ ɔ, e maa pee mo nyakpɛ. Nɔ́ nɛ odase nɛ wa yeɔ ngɛ be mi nɛ wa be fiɛɛmi tso mi ɔ tsɔɔ ji, sane kpakpa a nɛ wa fiɛɛɔ kɛ haa nihi ngɛ wa daa ligbi ní peemihi a mi—ke wa ngɛ blɔ hiae, ke wa ya slaa wa wekuli aloo nihi nɛ a ngɛ wa kpɔ ɔ mi, loo ke wa ya jua mi, loo wa ngɛ sukuu, loo wa ngɛ nítsumi he, kɛ he kpahi. Ngɛ Odasefoli nɛ a baptisi mɛ nɛ a hiɛ pe 200 a kuu ko mi ɔ, a kpɛti nihi lafa mi gbami 40 lɛ a ba le anɔkuale ɔ kɛ gu odase nɛ a ye mɛ se pi ngɛ fiɛɛmi tso mi ɔ nɔ! Enɛ ɔ heje ɔ, odase nɛ a yeɔ ngɛ be mi nɛ a be fiɛɛmi tso mi ɔ hi wawɛɛ.
2. Mɛni nɔ hyɛmi níhi lɛ wa na ngɛ Ngmami ɔ mi nɛ kɔɔ odase nɛ a ye ngɛ be mi nɛ a be fiɛɛmi tso mi ɔ he?
2 Sane kpakpa fiɛɛli nɛ a hi si ngɛ kekle jeha lafa a mi ɔ, pɔɔ nihi odase yemi ngɛ be mi nɛ a be fiɛɛmi tso mi. Kaa nɔ hyɛmi nɔ́ ɔ, benɛ Yesu hia blɔ kɛ bee ngɛ Samaria a, e ye yo ko nɛ e ngɛ nyu sae ngɛ Yakob nyu vu ɔ mi ɔ odase. (Yoh. 4:6-26) Filipo kɛ Etiopia ma nɔkɔtɔma ko nɛ ngɛ Yesaya womi ɔ kanee ɔ je ní sɛɛmi sisi nɛ e bi lɛ ke: “Nɔ́ nɛ o ngɛ kanee ɔ, anɛ o ngɛ sisi nue?” (Níts. 8:26-38) Benɛ a wo bɔfo Paulo tsu ngɛ Filipi ɔ, e ye pamitsɛmɛ a nɔ hyɛlɔ ɔ odase. (Níts. 16:23-34) Pee se ɔ, benɛ a tsi Paulo nya ngɛ we ko mi konɛ e ko je kpo ɔ, ‘e fiɛɛ Mawu matsɛ yemi ɔ he sane kɛ ha nihi tsuo nɛ ba slaa lɛ ngɛ lejɛ ɔ, nɛ e tsɔɔ mɛ Nyɔmtsɛ Yesu Kristo he ní.’ (Níts. 28:30, 31) Mo hu o ma nyɛ maa ye nihi odase ngɛ be mi nɛ o be fiɛɛmi tso mi. Mɛni blɔ nɔ o maa gu kɛ pee jã?
3. Mɛni ma nyɛ maa ye bua wɔ nɛ wa be zo gboe?
3 Bɔnɛ O Ma Plɛ Kɛ Je Sisi Ha: E yee kɛ haa wa ti nihi fuu kaa a kɛ nibwɔhi maa je ní sɛɛmi sisi. E peeɔ nihi kaa kikɛ ɔ zo po kaa a kɛ nihi nɛ a le mɛ ma susu anɔkuale ɔ he. Se ke wa susuɔ Yehowa kpakpa peemi, kɛ anɔkuale nɛ he jua wa nɛ e kɛ ha e sɔmɔli, kɛ si himi nɛ mi wa nɛ nihi nɛ a ngɛ je ɔ mi ɔ kɛ ngɛ kpee ɔ he ɔ, lɔɔ maa wo wɔ he wami nɛ wa maa ye nihi odase. (Yona 4:11; La 40:5; Mat. 13:52) Wa ma nyɛ ma bi Yehowa konɛ e “wo wɔ kã” hulɔ. (1 Tes. 2:2) Nyɛminyumu ko nɛ ya Gilead sukuu ɔ de ke: “Behi fuu ɔ, i yɔse kaa sɔlemi yeɔ bua mi ke e he wa ha mi kaa ma fiɛɛ kɛ ha nihi.” Ke o yeɔ gbeye kaa o maa fiɛɛ kɛ ha nihi ɔ, moo sɔle kpiti ngɛ o yi mi.—Neh. 2:4.
4. Kekleekle ɔ, mɛni oti lɛ e sa nɛ wa kɛ ma wa hɛ mi, nɛ mɛni heje?
4 Kaa bɔnɛ e ji ɔ, odase nɛ wa yeɔ ngɛ be mi nɛ wa be fiɛɛmi tso mi ɔ bi we kaa wa je wa he si, loo waa kane ngmami ko kɛ je ní sɛɛmi ɔ sisi. Ke waa kɛ ma wa hɛ mi kaa waa kɛ nihi maa je ní sɛɛmi gu sisi kɛkɛ se pi juɛmi ɔ ji kaa wa maa ye mɛ odase amlɔ nɔuu ɔ, lɔɔ ma nyɛ maa ye bua wɔ nɛ waa ye nihi odase ngɛ be mi nɛ wa be fiɛɛmi tso mi. Fiɛɛli babauu tsɔɔ kaa ní sɛɛmi kɛkɛ sisi nɛ a kɛ nihi jee ɔ haa nɛ a náa kã nɛ nyagbe ɔ, a nyɛɔ fiɛɛɔ sane kpakpa a kɛ tsɔɔ nihi. Ke nɔ ɔ bua jɔɛ he kaa o kɛ lɛ nɛ sɛɛ ní ɔ, e he hia we nɛ o nyɛ e nɔ. Moo po ní sɛɛmi ɔ nɔ kpoo.
5. Mɛni yeɔ bua nyɛmiyo ko nɛ e gboɔ zo ɔ nɛ e nyɛɔ yeɔ nihi odase ngɛ be mi nɛ e be fiɛɛmi tso mi?
5 Be tsuaa be ko nɛ nyɛmiyo ko nɛ e gboɔ zo ɔ yaa he ní ngɛ jua mi ɔ, e pɔɔ nihi a hɛ mi hyɛmi nɛ e muɔɔ hɛlii ngɛ e nya he. Ke nɔ ko hu muɔ hɛlii kɛ tsɔɔ lɛ ɔ, kɛkɛ e kɛ nɔ ɔ tu munyu kpiti. Ke nɔ ɔ bua jɔ munyu nɛ e kɛ lɛ tu ɔ he ɔ, e náa kã nɛ e kɛ lɛ tsaa ní sɛɛmi ɔ nɔ. E buɔ nɔ ɔ tue saminya, nɛ e bɔɔ mɔde kaa e maa le Baiblo ɔ mi munyu nɛ ke e kɛ nɔ ɔ susu he ɔ, e bua maa jɔ he. Blɔ nɛ ɔ nɔ nɛ e guu kɛ fiɛɛɔ ɔ ha nɛ e ha nihi womi fuu nɛ e je Baiblo mi nikasemi sisi.
6. Ke wa maa ye nihi odase be mi nɛ wa be fiɛɛmi tso mi ɔ, kɛ wa ma plɛ kɛ je ní sɛɛmi ɔ sisi kɛɛ?
6 Bɔnɛ O Ma Plɛ Kɛ Je Ní Sɛɛmi Sisi Ha: Loko wa maa je ní sɛɛmi sisi ɔ, mɛni wa ma nyɛ ma de? Yesu gu nyu kɛkɛ nɛ e bi yo ɔ ngɛ nyu vu ɔ he ɔ kaa e ha lɛ nɛ e nu ɔ nɔ nɛ e kɛ lɛ je ní sɛɛmi sisi. (Yoh. 4:7) Lɔɔ he ɔ, eko ɔ, wɔ hu waa kɛ nihi ma nyɛ maa je ní sɛɛmi sisi kɛ gu ngami nɛ wa ma nga mɛ nɛ wa ma je huɛ bɔmi su kpo, aloo sane nɛ wa ma bi mɛ ɔ nɔ. Benɛ nyɛ ngɛ ní ɔ sɛɛe ɔ, o ma nyɛ ma ná he blɔ kɛ tu Ngmami ɔ mi munyu ko kɛ tsɔɔ mɛ kɛ du anɔkuale wu ɔ kɛ wo a mi. (Fiɛlɔ 11:6) Ni komɛ tuɔ munyu komɛ nɛ haa nɛ nihi suɔ nɛ a le nɔ́ ko mi fitsofitso, nɛ enɛ ɔ haa nɛ a nyɛɔ nɛ a kɛ nihi jeɔ ní sɛɛmi sisi. Kaa nɔ hyɛmi nɔ́ ɔ, ke o ya hiɔ tsami he nɛ e sui o nɔ nɛ o ma ya na hiɔ tsalɔ ɔ lolo ɔ, o kɛ nɔ ko ma nyɛ maa je ní sɛɛmi sisi kɛ gu demi nɛ o ma de lɛ ke, “Ke be nɛ hiɔ ko be mi nue hu ɔ su ɔ, ye bua maa jɔ wawɛɛ” ɔ nɔ.
7. Ngɛ mɛni blɔ nɔ nɛ níhi a he hɛ nɛ wa maa to ɔ maa ye bua wɔ nɛ wa nyɛ nɛ waa ye nihi odase ngɛ be nɛ wa be fiɛɛmi tso mi?
7 Ke wa toɔ nɔ́ he hɛ ɔ, lɔɔ maa ye bua wɔ nɛ wa maa je ní sɛɛmi sisi. Ke wa to he hɛ kaa fɔlɔ ko bimɛ baa a je mi saminya a, wa ma nyɛ ma je e yi nɛ wa bi lɛ ke, “Mɛni ye bua mo nɛ o nyɛ nɛ o tsɔse o bimɛ ɔmɛ nɛ a baa a je mi saminya jã a?” Nyɛmiyo ko toɔ munyuhi nɛ nihi nɛ e kɛ mɛ tsuɔ ní ɔ tuɔ ɔ he hɛ nɛ e kɛ mɛ susuɔ níhi pɔtɛɛ nɛ a ngɛ he bua jɔmi ɔ a he. Benɛ e ná le kaa yiheyo ko nɛ e kɛ lɛ tsuɔ ní ɔ yaa sɛ gba si himi mi ɔ, e ha lɛ Awake! ko nɛ tsɔɔ bɔnɛ a plɛɔ kɛ toɔ yo kpeemi he blɔ nya ha a. Enɛ ɔ ha nɛ e nyɛ nɛ e kɛ lɛ tsa Baiblo ɔ mi ní sɛɛmi ɔ nɔ.
8. Wa ma nyɛ maa gu wa womi ɔmɛ a nɔ kɛ je ní sɛɛmi sisi ngɛ mɛni blɔ nɔ?
8 Blɔ kpa ko hu nɛ wa ma nyɛ maa gu nɔ kɛ je ní sɛɛmi sisi ji, nɛ́ wa maa kane wa womi ɔmɛ ngɛ he nɛ nihi maa na wɔ ngɛ. Nɔ́ nɛ nyɛminyumu ko pɔɔ peemi ji, e kaneɔ Watchtower loo Awake! ɔ mi munyuhi nɛ nihi a bua maa jɔ he. Ke e yɔse kaa nɔ ko ngɛ e kasa mi nɛ e ngɛ Watchtower loo Awake! ɔ nɛ e ngɛ kanee ɔ nɔ hyɛe ɔ, e biɔ nɔ ɔ sane loo e tuɔ nɔ́ nɛ e ngɛ kanee ɔ he munyu kpiti kɛ tsɔɔ nɔ ɔ. Behi fuu ɔ, enɛ ɔ haa nɛ e kɛ nihi jeɔ ní sɛɛmi sisi nɛ e fiɛɛɔ kɛ haa mɛ. Ke wa ngɔɔ wa womi ɔmɛ ekomɛ kɛ fɔɔ hehi nɛ nihi ma nyɛ maa na a, lɔɔ ma nyɛ ma ha nɛ ní tsuli, loo sukuubi nɛ a suɔ kaa a maa le nɔ́ ko ɔ ma bi he sane.
9, 10. (a) Mɛni blɔ nɔ wa maa gu kɛ hla he blɔhi kɛ ye nihi odase be mi nɛ wa be fiɛɛmi tso mi? (b) Kɛ o plɛɔ kɛ peeɔ enɛ ɔ ha kɛɛ?
9 Mo Hla He Blɔhi: Akɛnɛ be nɛ e piɛ nɛ waa kɛ ma tsu fiɛɛmi nítsumi ɔ pi heje ɔ, e sɛ kaa waa hi si nɛ waa hyɛ kaa he blɔ maa ba loko waa ye nihi odase. Mohu ɔ, e sa kaa ngɛ wa daa ligbi ní peemihi a mi ɔ, wa hla he blɔhi kɛ ye nihi odase. Moo sɛ hlami nɛ o susu nihi nɛ eko ɔ, o kɛ mɛ maa kpe kɛ blɔ nɔ nɛ o maa gu nɛ o kɛ je huɛ bɔmi su kpo nɛ o kɛ mɛ maa je ní sɛɛmi sisi ɔ a he. Moo hɛɛ Baiblo ɔ, nɛ o hɛɛ womi nɛ o kɛ nihi nɛ a bua jɔ munyu ɔ he ɔ ma nyɛ ma susu e mi sanehi a he ɔ hulɔ.—1 Pet. 3:15.
10 Nihi babauu nɛ ga ngɛ a hɛ mi ɔ na blɔhi a nɔ nɛ a maa gu konɛ he blɔhi nɛ bli kɛ ha mɛ nɛ́ a ye nihi odase ngɛ be mi nɛ a be fiɛɛmi tso mi. Nyɛmiyo ko nɛ e ngɛ kpɔ ko mi, nɛ a kplɛɛ we nɛ nihi sɛɛɔ nihi a wehi a mi ngɛ lejɛ ɔ, tɛniɔ adebɔ ní komɛ nɛ a ngɛ fɛu, nɛ a kɛ fiɛɔ kɛ ya maa hɛja jemi he nɛ ngɛ kpɔ ɔ mi ɔ. Ke nihi ba da si nɛ a de ke ní nɛ e tɛni ɔ ngɛ fɛu ɔ, e ngɔɔ he blɔ ɔ kɛ jee ní sɛɛmi sisi nɛ e deɔ mɛ nɔ́ nɛ Baiblo ɔ de nɛ kɔɔ ‘hiɔwe ehe kɛ zugba ehe’ ɔ he. (Kpoj. 21:1-4) Anɛ o ma nyɛ ma susu blɔhi a nɔ nɛ o ma nyɛ maa gu kɛ ná he blɔhi kɛ ye nihi odase be mi nɛ o be fiɛɛmi tso mi lo?
11. Mɛni blɔ nɔ wa maa gu kɛ kpale kɛ ya slaa nihi nɛ a bua jɔ odase nɛ wa ye mɛ ɔ he ɔ?
11 Kpale Kɛ Ya Slaa Nihi Nɛ A Je Bua Jɔmi Kpo ɔ: Ke nɔ ko bu mo tue nɛ o na kaa e bua jɔ munyu ɔ he ɔ, moo kpale kɛ ya slaa lɛ. Ke e maa hi ɔ, o ma nyɛ ma de nɔ ɔ ke: “Ye bua jɔ wawɛɛ kaa wa sɛɛ ní. Jije ma na mo ngɛ konɛ wa tsa wa ní sɛɛmi ɔ nɔ?” Nɔ́ nɛ fiɛɛli komɛ peeɔ kɛkɛ ji, a ngɔɔ a we address kɛ telephone number kɛ haa nihi nɛ a deɔ mɛ ke: “Ye bua jɔ kaa wa sɛɛ ní. Ke o suɔ kaa o maa le ní kpahi fuu kɛ kɔ nɔ́ nɛ wa sɛɛ nɛ ɔ he ɔ, bɔnɛ o nine ma plɛ kɛ su ye nɔ ji nɛ ɔ nɛ.” Ke mo nitsɛ o be nyɛe ma ya slaa nɔ ɔ, moo to blɔ nya konɛ asafo nɛ ma nyɛ ma ya slaa lɛ ɔ, nɛ e pee jã kɛ gu Please Follow Up (S-43) womi ɔ nɔ ní nɛ o maa ngma nɛ o ma kɛ ha nyɛ asafo ɔ mi womi ngmalɔ ɔ nɔ.
12. (a) Mɛni heje nɛ e sa kaa waa bu be nɛ waa kɛ yeɔ nihi odase be mi nɛ wa be fiɛɛmi tso mi ɔ he akɔtaa? (b) Mɛni jeɔ odase nɛ wa yeɔ nihi ngɛ be mi nɛ wa be fiɛɛmi tso mi ɔ mi kɛ baa? (Moo hyɛ daka nɛ e yi ji, “Odase Nɛ A Yeɔ Ngɛ Be Mi Nɛ A Be Fiɛɛmi Tso Mi ɔ Woɔ Yiblii!” ɔ)
12 Ke wa ye nihi odase ngɛ be mi nɛ wa be fiɛɛmi tso mi ɔ, e sa nɛ waa bu he akɔtaa. Enɛ ɔ he ɔ, ke hɛngmɛfia bɔɔ ko pɛ po nɛ o kɛ ye nihi odase ngɛ ligbi ɔ mi ɔ, moo ngma kɛ fɔ si. Mo susu nɔ́ nɛ ɔ he nɛ o hyɛ: Ke daa ligbi ɔ, fiɛɛlɔ tsuaa fiɛɛlɔ ngɔɔ hɛngmɛfia enuɔ kɛ yeɔ nihi odase ngɛ be mi nɛ e be fiɛɛmi tso mi ɔ, wa ma ná ngmlɛfia nɛ hiɛ pe ayɔ 17 kɛ piɛɛ ngmlɛfia nɛ wa náa daa nyɔhiɔ ɔ he!
13. Mɛni lɛ e sa kaa e wo wɔ he wami konɛ wa nyɛ nɛ waa ye nihi odase be mi nɛ wa be fiɛɛmi tso mi?
13 Yi mi tomi nɛ pe kulaa heje nɛ e sa kaa waa ye nihi odase be mi nɛ wa be fiɛɛmi tso mi ɔ ji, suɔmi nɛ wa ngɛ kɛ ha Mawu kɛ wa nyɛmi. (Mat. 22:37-39) Akɛnɛ wa bua jɔ suhi nɛ Yehowa ngɛ kɛ e yi mi tomihi a he heje ɔ, lɔɔ woɔ wɔ he wami nɛ wa sɛɛɔ e “matsɛ yemi ɔ we agboje” ɔ kɛ haa nihi. (La 145:7, 10-12) Ngɛ be mi nɛ nyagbe ɔ bɛ lolo nɛ ɔ mi ɔ, suɔmi nitsɛnitsɛ nɛ wa ngɛ kɛ ha nihi ɔ woɔ wɔ he wami nɛ wa ngɔɔ he blɔ tsuaa he blɔ nɛ wa náa a kɛ fiɛɛɔ sane kpakpa a. (Rom. 10:13, 14) Ke wa susuu níhi a he nɛ wa dlaa wa he ɔ, wɔ tsuo wa ma nyɛ maa ye nihi odase be mi nɛ wa be fiɛɛmi tso mi, nɛ eko ɔ, wa bua maa jɔ kaa wa ha nɛ nɔ ko nɛ e hɛɛ tsui kpakpa ba le anɔkuale ɔ.
[Bua jɔmi munyu nɛ a ma nɔ mi ngɛ ba fa 4]
Ke o kɛ ma o hɛ mi kaa o kɛ nɔ tsuaa nɔ nɛ o kɛ maa kpe ɔ maa sɛɛ ní kɛkɛ ɔ, lɔɔ ma ha nɛ o ma nyɛ maa ye nihi odase ngɛ be mi nɛ o be fiɛɛmi tso mi
[Bua jɔmi munyu nɛ a ma nɔ mi ngɛ ba fa 5]
Nihi babauu nɛ ga ngɛ a hɛ mi ɔ na blɔhi a nɔ nɛ a maa gu konɛ he blɔhi nɛ bli kɛ ha mɛ nɛ́ a ye nihi odase ngɛ be mi nɛ a be fiɛɛmi tso mi
[Daka ngɛ ba fa 5]
Ga Womihi Nɛ Kɔɔ Bɔnɛ A Ma Plɛ Kɛ Je Ní Sɛɛmi Sisi Ha a He
◼ Moo sɔle kɛ bi yemi kɛ buami konɛ o nyɛ nɛ o je sisi
◼ Mo hla nihi nɛ a yi oya nɛ a jeɔ huɛ bɔmi su kpo
◼ Moo hyɛ nihi a hɛ mi, muɔɔ hɛlii ngɛ o nya he, konɛ o tu níhi nɛ a ma ná he bua jɔmi ɔ a he munyu
◼ Moo bu tue saminya
[Daka ngɛ ba fa 6]
Odase Nɛ A Yeɔ Ngɛ Be Mi Nɛ A Be Fiɛɛmi Tso Mi ɔ Woɔ Yiblii!
• Benɛ nyɛminyumu ko ngɔ e lɔle kɛ ho lɔle dlami he ko ya nɛ e ngɛ mlɛe konɛ a dla e lɔle ɔ ha lɛ ɔ, e ye nihi nɛ a ngɛ e kasa mi ɔ odase nɛ e fɔ mɛ nine konɛ a ba bu magbɛ nɔ munyu ko tue. Jeha kake se ɔ, nyɛminyumu ko nɛ e li e mi tso ɔ nga lɛ kɛ bua jɔmi ngɛ kpe ko sisi. Nyɛminyumu nɛ ɔ piɛɛ nihi nɛ e fɔ mɛ nine ngɛ lɔle dlami he ɔ jeha nɛ be ɔ a he! Nyumu ɔ ya bu magbɛ nɔ munyu ɔ tue nɛ e bi konɛ a kɛ lɛ nɛ kase Baiblo ɔ. Amlɔ nɛ ɔ, a baptisi e kɛ e yo tsuo.
• Nyɛmiyo ko nɛ e ba kase anɔkuale ɔ kɛ gu odase nɛ a ye lɛ nɛ pi fiɛɛmi tso mi nɛ a ngɛ ɔ nɔ ɔ, fiɛɛɔ kɛ haa nihi nɛ lɛ hu e le mɛ kɛ gu e bimɛ etɛ a nɔ ɔ. E fiɛɛɔ kɛ haa nihi nɛ e kɛ mɛ ngɛ e kpɔ ɔ mi, kɛ fɔli nɛ e kɛ mɛ kpeɔ ngɛ sukuu nɛ e bimɛ ɔmɛ yaa a, kɛ kpehi nɛ tsɔɔli kɛ fɔli peeɔ ɔ ngɛ sukuu ɔ. Be tsuaa be nɛ e ma je e he si kɛ tsɔɔ nɔ ko ɔ, e jeɔ e tsui mi nɛ e deɔ nɔ ɔ kpiti kaa, Baiblo ɔ ji nɔ́ nɛ yeɔ bua lɛ ngɛ e bimɛ ɔmɛ a tsɔsemi mi, kɛkɛ lɔɔ se ɔ, e tsake munyu ɔ hɛ mi. Ke e ná nɛ e kɛ nɔ ɔ je ní sɛɛmi sisi pɛ ɔ, e yi ha lɛ hu kaa e maa tu Baiblo ɔ mi munyu kɛ tsɔɔ nɔ ɔ. Blɔ nɛ ɔ nɔ nɛ́ e guu kɛ yeɔ odase ɔ ha nɛ e nyɛ nɛ e ye bua nihi 12 nɛ a baptisi mɛ.
• Benɛ nyumu ko nɛ e tsuɔ insurance nítsumi ya slaa nyɛmiyo ko ɔ, nyɛmiyo ɔ ngɔ he blɔ nɛ e ná a kɛ ye lɛ odase. Nyɛmiyo ɔ bi lɛ kaa anɛ e maa suɔ nɛ e ná insurance ko nɛ maa po e he piɛ konɛ e ná nɔmlɔtso mi he wami kpakpa, bua jɔmi, kɛ neneene wami lo. Nyumu ɔ he nɔ ke ee, nɛ e bi nyɛmiyo ɔ kaa insurance te nɛ he munyu nɛ́ e ngɛ tue ɔ nɛɛ. Nyɛmiyo ɔ tsɔɔ lɛ si nɛ Baiblo ɔ wo ɔ, nɛ e ha lɛ wa womi ɔ eko, nyumu ɔ kane womi ɔ ta jamɛ a gbɔkuɛ ɔ nɔuu. A to Baiblo mi nikasemi he blɔ nya, nɛ e bɔni asafo mi kpehi yami, nɛ nyagbe ɔ, a baptisi lɛ.
• Benɛ nyɛmiyo ko kɛ kɔɔhiɔ mi lɛ ngɛ blɔ hiae ɔ, e kɛ yo ko nɛ e hi e kasa mi ɔ bɔni ní sɛɛmi nɛ e nyɛ nɛ e ye lɛ odase. Benɛ a ya su he nɛ a yaa a, nyɛmiyo ɔ, ngɔ e we address kɛ telephone number kɛ ha yo ɔ, nɛ e wo lɛ he wami konɛ be tsuaa be nɛ e maa na Yehowa Odasefoli ɔ, e ha nɛ a kɛ lɛ nɛ kase Baiblo ɔ. E nɔ jena a, Odasefoli enyɔ ya slaa yo ɔ ngɛ e we mi. A kɛ yo ɔ je Baiblo ɔ kasemi sisi, e ya e hɛ mi mlamlaamla, nɛ a baptisi lɛ, nɛ amlɔ nɔuu ɔ, lɛ hu e kɛ nimli etɛ bɔni Baiblo ɔ kasemi.
• Nyɛminyumu ko nɛ ye jeha 100 nɛ e hɛngmɛ yu nɛ e ngɛ he nɛ a hyɛɛ nihi nɛ a bwɔ a nɔ ngɛ ɔ pɔɔ demi ke, “Wa hia Matsɛ Yemi ɔ.” Enɛ ɔ ha nɛ nihi nɛ hyɛɔ hiɔtsɛmɛ ɔmɛ a nɔ kɛ hiɔtsɛmɛ kpahi nɛ ngɛ lejɛ ɔ biɔ lɛ sanehi nɛ e tsɔɔ mɛ nɔ́ nɛ Matsɛ Yemi ɔ ji. Yi ɔmɛ nɛ a tsuɔ ní ngɛ lejɛ ɔ a kpɛti nɔ kake bi lɛ nɔ́ nɛ e maa pee ngɛ Paradeiso ɔ mi. E ha lɛ heto ke: “Ma hyɛ nɔ́ nɛ ma nyɛɛ ekohu nɛ ma sã ye obubuafo sɛ ɔ.” Akɛnɛ nyɛminyumu ɔ hɛngmɛ yu heje ɔ, e deɔ yo ɔ konɛ e kane womi tɛtlɛɛ ɔmɛ kɛ ha lɛ. Benɛ nyɛminyumu ɔ biyo ba slaa lɛ ɔ, ní tsulɔ ɔ bi nyɛminyumu ɔ biyo ɔ konɛ e ngmɛ lɛ blɔ nɛ e ngɔ womi tɛtlɛɛ ɔmɛ kɛ ho we mi ya. Nihi nɛ a hyɛɔ nihi nɛ a bwɔ ɔ a nɔ ɔ a kpɛti nɔ kake de nyɛminyumu ɔ biyo ɔ ke: “Munyu ehe nɛ waa kɛ ngɛ ní tsue ngɛ hiɛ ɔ ji: ‘Wa hia Matsɛ Yemi ɔ.’”
• Benɛ nyɛmiyo ko piɛɛ nihi nɛ a wo zã kɛ yaa he niye ní ngɛ ní yemi he ko ɔ a he ɔ, e nu nɛ nyumu nikɔtɔma komɛ nɛ a hii si ngɛ a kasa mi ɔ ngɛ ma kudɔmi sanehi a he ní sɛɛe. Nyumu ɔmɛ a kpɛti nɔ kake tsɔɔ kaa nɔyemi ɔ be nyɛe ma tsu wa haomi ɔmɛ a he ní ha wɔ. Nyɛmiyo ɔ de e he ke, ‘He blɔ nɛ ma kɛ ye odase ji nɛ ɔ nɛ.’ E sɔle kpiti nɛ e hɛ lɛ kɛ su a he. Benɛ e je e he si kɛ tsɔɔ mɛ se ɔ, e tu Mawu Matsɛ Yemi, nɛ ji nɔyemi nɛ ma tsu adesahi a haomihi a he ní ɔ he munyu kɛ tsɔɔ mɛ, nɛ e ngɔ womi nɛ e hɛɛ ɔ kɛ ha mɛ. Lɔɔ se pɛ nɛ ní yemi he nɔ hyɛlɔ ɔ su a he. Nyɛmiyo ɔ susu kaa e ma lɛ fiemi kɛ je lejɛ ɔ. E fiee we lɛ, se mohu e de lɛ ke e bu a ní sɛɛmi ɔ tue nɛ lɛ hu e suɔ womi ɔ eko. Ní tsuli ɔmɛ a kpɛti nɔ kake nɛ lɛ hu e bu ní sɛɛmi ɔ tue ɔ su a he kɛ e hɛ mi vo nyu. E kɛ Odasefoli kase Baiblo ɔ bɔɔ nɛ e kpa, nɛ e suɔ kaa e ma tsa nɔ.