Wa Ji Odasefoli Be Tsuaa Be
1. Mɛni wa ma nyɛ maa kase kɛ je sane nɛ kɔɔ odase nɛ Yesu ye yo ɔ ngɛ nyu vu ɔ he ɔ mi?
1 Yesu nyɛɛ ngmlɛfia abɔ. Pɔtɔ lɛ nɛ kuma hu ngɛ lɛ yee. E ya hi si ngɛ vu ko he ngɛ Samaria ma ko se konɛ e jɔɔ e he benɛ e kaseli ɔmɛ ho nɛ a yaa he niye ní ɔ. Pi fiɛɛmi heje nɛ́ Yesu ya Samaria ngɛ; e gu lejɛ ɔ kɛ yaa Galilea konɛ e ya tsa e fiɛɛmi nítsumi ɔ nɔ ngɛ lejɛ ɔ. Se kɛ̃ ɔ, e ngɔ he blɔ ɔ kɛ fiɛɛ ha yo ko nɛ ba nyu yɛmi. (Yoh. 4:5-14) Mɛni heje? Ejakaa Yesu pee e he Yehowa “odasefono anɔkualetsɛ” be tsuaa be. (Kpoj. 3:14, NW) Ke wa ji Yehowa Odasefoli be tsuaa be ɔ, lɔɔ tsɔɔ kaa wa ngɛ Yesu kasee.—1 Pet. 2:21.
2. Kɛ wa ma plɛ kɛ dla wa he kɛ ye tlukaa odase kɛɛ?
2 Dla O He Kɛ To: Wa ma nyɛ ma dla wa he kɛ ha tlukaa odase yemi ke wa hɛɛ womihi ngɛ wa he. Fiɛɛli fuu ngɔɔ dɛ womi kɛ toɔ dɛ, nɛ a kɛ haa nihi nɛ hii tsuapo nya, nihi nɛ tsuɔ ní ngɛ petrol juami he, kɛ ni kpahi nɛ a kɛ mɛ kpeɔ ngɛ ligbi ɔ mi. (Fiɛlɔ 11:6) Nyɛmiyo ko nɛ pɔɔ blɔ hiami ɔ ngɔɔ Baiblo nyafii kɛ Baiblo Tsɔɔmi womi ɔ kɛ woɔ e sika kpɛɛ nyafii ko mi be tsuaa be, nɛ e bɔɔ mɔde kaa e kɛ nihi nɛ hii si ngɛ e kasa nya a maa sɛɛ ní.
3. Kɛ wa ma plɛ kɛ je ní sɛɛmi sisi kɛɛ?
3 Moo Je Ní Sɛɛmi Sisi: Ke wa maa ye tlukaa odase ɔ, e sɛ nɛ waa ngɔ Ngmami ɔ mi munyu ko kɛ je ní sɛɛmi ɔ sisi. Yesu je we e he si kaa lɛ ji Mesia a kɛ je ní sɛɛmi ɔ sisi benɛ e kɛ yo ɔ sɛɛ ní ngɛ vu ɔ he ɔ. E ba lɛ nyu kɛkɛ, nɛ enɛ ɔ ha yo ɔ suɔ kaa e maa le níhi fuu. (Yoh. 4:7-9) Nyɛmiyo ko yɔse kaa, keji a bi lɛ kaa e yeɔ gbijlɔ ko lo, nɛ e gu blɔ kikɛ nɔ ɔ, e yeɔ bua lɛ nɛ e kɛ nihi jee ní sɛɛmi sisi. E ha we heto kaa akɛnɛ e ji Yehowa Odasefono heje nɛ e kɛ e he wui gbijlɔ yemi ko mi ɔ nɛ, mohu ɔ e deɔ ke, “Imi nitsɛ i pee ye juɛmi kaa i kɛ ye he be mi woe.” Behi fuu ɔ, nɔ nɛ ngɛ hlae nɛ́ e le nɔ́ ko ɔ, biɔ nɔ́ heje nɛ nyɛmiyo ɔ pee e juɛmi jã, nɛ enɛ ɔ haa nyɛmiyo ɔ yeɔ lɛ odase.
4. Mɛni heje Mateo 28:18-20 woɔ mo he wami?
4 E ngɛ mi kaa Yesu ngɔ kã kɛ tsu e fiɛɛmi nítsumi ɔ kɛ gbe nya ngɛ zugba a nɔ mohu, se kɛ̃ ɔ, e ngɛ fiɛɛmi nítsumi nɛ a ngɛ tsue kaa bɔnɛ lɛ hu e tsu ɔ he bua jɔmi wawɛɛ. (Mat. 28:18-20) Lɔɔ he ɔ, kaa bɔnɛ Yesu, wa Nɔ Hyɛmi Nɔ́ Peelɔ ɔ ji ɔ, wa ji Odasefoli nɛ wa dla wa he be tsuaa be kɛ to kaa wa maa jaje wa hemi kɛ yemi ɔ kɛ tsɔɔ nihi.—Heb. 10:23.