Sane Bimi He
◼ Anɛ e sa kaa Yehowa Odasefoli nɛ a gba kasɛtihi nɛ a nu munyuhi nɛ a tu kɛ wo a nɔ, aloo womihi nɛ a ngma munyuhi nɛ a tu ngɛ a nɔ ɔ kɛ ha nihi lo?
Baiblo mi munyuhi nɛ a tuɔ ɔ woɔ wɔ he wami nɛ e fiaa wɔ kɛ maa si. (Níts. 15:32) Enɛ ɔ heje ɔ, wɔ tsuo wa suɔ nɛ waa kɛ nihi nɛ a bɛ kpe ɔ eko ɔ nɛ sɛɛ munyuhi nɛ a tu ngɛ kpe ɔ sisi ɔ he ní. Mwɔnɛ ɔ, akɛnɛ klama munomunohi ngɛ nɛ a kɛ nuu munyuhi heje ɔ, e yi kulaa kaa wa maa nu munyuhi kɛ wo kasɛtihi a nɔ nɛ wa gba kɛ ha nihi. Ni komɛ ngɛ kasɛtihi nɛ a nu munyuhi nɛ a tu blema kɛ wa mwɔnɛmwɔnɛ ɔ be mi munyu komɛ kɛ wo a nɔ, nɛ akɛnɛ a suɔ nɛ munyu nɛ ɔmɛ nɛ wo a huɛmɛ he wami heje ɔ, a baa kasɛti nɛ ɔmɛ kɛ haa mɛ konɛ a fia, aloo a peeɔ a henɔhi kɛ haa mɛ. Ni komɛ hu bli mɛ nitsɛmɛ a Internet nɛ a ngɔ munyu nɛ ɔmɛ kɛ wo lejɛ ɔ konɛ nihi nɛ a nu kɛ je lejɛ ɔ.
Ke wa nu munyuhi nɛ a tu kɛ wo kasɛtihi a nɔ nɛ́ wɔ nitsɛmɛ, aloo wa weku mi bimɛ maa fia nɛ a bu tue ɔ, tɔmi ko be he. Jehanɛ se hu ɔ, asafo mi nikɔtɔmahi ma nyɛ maa to blɔ nya konɛ a nu munyuhi kɛ wo kasɛtihi a nɔ kɛ ha nihi nɛ a be nɔmlɔtso mi he wami nɛ a nyɛ we nɛ a ya kpehi ɔ. Se wa ngɛ yi mi tomi kpakpahi a heje nɛ e sɛ kaa wa gbaa kasɛtihi nɛ wa nu munyuhi nɛ a tu kɛ pue a nɔ, aloo womihi nɛ wa ngma munyuhi nɛ a tu ngɛ a nɔ ɔ kɛ ha nihi.
Akɛnɛ hiami níhi nɛ ngɛ he nɛ a tu munyu ko ngɛ ɔ nɔ lɛ a daa kɛ tuɔ munyuhi heje ɔ, ke a nu munyu ko kɛ fɔ kasɛti nɔ, aloo a ngma kɛ fɔ womi nɔ nɛ a gba kɛ ha wɔ ɔ, wa be munyu ɔ mi oti ɔmɛ a sisi nue ejakaa, wa li hiami níhi a nɔ nɛ a da kɛ tu munyu ɔ. Jehanɛ se hu ɔ, e he maa wa kaa wa maa le nɔ nɛ tu munyu ɔ kɛ be nɛ e tu munyu ɔ, konɛ wa ná nɔ mi mami kaa munyu nɛ e tu ɔ kɛ anɔkuale ɔ sisi numi nɛ wa ngɛ mwɔnɛ ɔ kɔ. (Luka 1:1-4) Jehanɛ se hu ke a gba kasɛtihi nɛ a nu munyuhi nɛ a tu kɛ fɔ a nɔ, loo womihi nɛ a ngma munyuhi nɛ a tu ngɛ a nɔ kɛ ha nihi ɔ, lɔɔ ma nyɛ ma ha nɛ ni komɛ kɛ bumi, loo hɛ mi nyami slɔɔto ko ma ha munyu tulɔ ɔ.—1 Kor. 3:5-7.
Tsɔlɔ anɔkualetsɛ kɛ ní lelɔ ɔ ngɛ dengme gboe wawɛɛ konɛ e ha Mawu webi a mumi mi niye ní ngɛ “be nɛ sa mi.” (Luka 12:42) Blɔ komɛ a nɔ nɛ e guu kɛ peeɔ enɛ ɔ ji, e toɔ blɔ nya nɛ a tuɔ munyuhi ngɛ Yehowa Odasefoli asafohi a mi, nɛ a ngɔɔ munyuhi nɛ a fiaa nɛ a buɔ tue hu kɛ woɔ Internet ɔ nɔ ngɛ jw.org. Wa ngɛ nɔ mi mami kaa tsɔlɔ anɔkualetsɛ kɛ ní lelɔ ɔ kɛ e Nɔyemi Kuu ɔ ma ha wɔ níhi nɛ wa hia bɔnɛ pee nɛ wa hemi kɛ yemi mi nɛ wa.—Níts. 16:4, 5.