Munyuhi Nɛ A Fiaa Nɛ A Buɔ Tue—Bɔ Nɛ Waa Kɛ Ma Tsu Ní Ha
1. Ngɛ womihi nɛ asafo ɔ ngmaa nɛ wa kaneɔ ɔmɛ a se ɔ, mɛni hu nɛ a pee nɛ maa ye bua wɔ?
1 Nihi fuu suɔ kaa a maa kane anɔkuale munyu ngɔngɔɛhi nɛ ngɛ jw.org nɔ ɔ. (Fiɛlɔ 12:10) Anɛ o ngɔ munyuhi nɛ a fiaa nɛ a buɔ tue ɔ kɛ ngɛ ní tsue lo? E yeɔ bua wɔ nɛ wa buɔ níhi nɛ a fia kɛ fɔ wa intanɛti ní tsumi he ɔ nɔ ɔ tue. Kɛ wa ma plɛ kɛ ná munyuhi nɛ a fiaa nɛ a buɔ tue ɔ he se ha kɛɛ?
2. Mɛni blɔ nɔ wa maa gu nɛ waa kɛ munyuhi nɛ a fiaa nɛ a buɔ tue ɔ ma tsu ní ngɛ wa dɛ he, loo wa weku ní kasemi mi?
2 E Maa Ye Bua Wɔ Ngɛ Wa Dɛ He Kɛ Wa Weku Ní Kasemi Mi: Bɔ nɛ pee nɛ waa kɛ wa be nɛ tsu ní saminya a, wa ma nyɛ maa fia Baiblo ɔ, aloo womi tɛtlɛɛ ɔmɛ, aloo womi kpahi a mi munyuhi nɛ waa bu tue ke wa ngɛ blɔ hiae, aloo ke wa ngɛ nɔ́ kpa ko pee. (Efe. 5:15, 16) Ke wa ngɛ wa weku Mawu jami pee ɔ, wa ma nyɛ maa fia womi nɛ wa ngɛ kase ɔ mi munyu ɔmɛ konɛ waa nyɛɛ se ngɛ womi ɔ mi. Ke wa suɔ nɛ waa le ní kanemi saminya, loo waa kase gbi ko ɔ, munyuhi nɛ a fiaa nɛ a buɔ tue ɔ nɛ wa maa bu tue ngɛ wa dɛ he ní kasemi mi ɔ maa ye bua wɔ.
3. Mɛnɔmɛ nɛ a ma nyɛ ma ná womihi nɛ a fiaa nɛ a buɔ a mi munyuhi tue ɔ he se ngɛ wa zugba kpɔ ɔ mi?
3 Waa Kɛ Maa Ye Bua Nihi Ngɛ Fiɛɛmi Mi: Nihi nɛ a ngɛ wa zugba kpɔ ɔ mi nɛ a be deka nɛ a kɛ maa kane ní ɔ, a bua maa jɔ he kaa a maa bu munyuhi nɛ a fiaa nɛ a buɔ tue ɔ tue. Nihi nɛ a tuɔ gbi kpa hu a bua maa jɔ kaa a maa nu Matsɛ Yemi sɛ gbi ɔ ngɛ mɛ nitsɛmɛ a “je gbi mi.” (Níts. 2:6-8) Ngɛ he komɛ ɔ, nihi suɔ nɔ́ tue bumi. Kaa nɔ hyɛmi nɔ́ ɔ, ngɛ Hmong bi a kusumi nya a, a sɛɛɔ blema sanehi kɛ haa a bimɛ, nɛ jokuɛwi ɔmɛ hu a hɛ ji jamɛ a munyu ɔmɛ a nɔ. Ngɛ Afrika mahi fuu a nɔ ɔ, a guɔ ní sɛɛmi nɔ kɛ tsɔɔ nihi ní.
4. Mɛni sanehi nɛ wa ma nyɛ ma bi wa he ke wa suɔ kaa wa maa ye bua nihi nɛ a ngɛ wa zugba kpɔ ɔ mi ɔ?
4 Anɛ o ma nyɛ maa fia munyuhi nɛ a fiaa nɛ a buɔ tue ɔ eko kɛ ha wetsɛ ko ngɛ lɛ nitsɛ e je gbi mi ngɛ nyɛ zugba kpɔ ɔ mi lo? Anɛ o le nɔ ko nɛ e ma nyɛ ma ná wa womihi nɛ a fiaa a mi munyu ɔmɛ nɛ a buɔ tue ɔ he se, nɛ o maa mane lɛ eko ngɛ intanɛti ɔ nɔ lo? Anɛ o ma nyɛ maa gbla womi ko nɛ a kane e mi munyuhi kɛ fɔ jw.org nɔ ɔ kɛ fɔ apawa nɔ, nɛ o kɛ piɛɛ womi ɔ he kɛ ha wetsɛ ko nɛ e bua jɔ sɛ gbi ɔ he lo? Ke o gbla womi, loo womiyo, loo dɛ womi, loo womi tɛtlɛɛ, nɛ a pee kɛ fɔ intanɛti ɔ nɔ ɔ eko kɛ ha nɔ ko ngɛ fiɛɛmi mi ɔ, o ma nyɛ maa bu he akɔtaa. A pee womihi nɛ a fiaa a mi munyuhi nɛ a buɔ tue ɔ konɛ e ye bua wɔ ngɛ wa ní kasemi mi, nɛ wa kɛ du Matsɛ Yemi he anɔkuale wu ɔ hulɔ.—1 Kor. 3:6.