Nɔ́ Nɛ He Hia Pe Kulaa Ngɛ Wa Si Himi Mi
1. Mɛni blɔ nɔ Yesu tsɔɔ kaa sɔmɔmi nítsumi ɔ he hia lɛ wawɛɛ ngɛ?
1 Yesu bu sɔmɔmi nítsumi ɔ kaa e ji nɔ́ nɛ he hia pe kulaa ngɛ e si himi mi. E gbo dengme kɛ nyɛɛ si tomi lafahi abɔ kɛ kpa Palestina tsuo nɛ e fiɛɛ sane kpakpa a kɛ ha nihi babauu. E pee e si himi kpokploo bɔnɛ pee nɛ e ná be fuu kɛ ha sɔmɔmi nítsumi ɔ. (Mat. 8:20) Benɛ nihi bɔ mɔde kaa a maa tsi e nya konɛ e tsa a hiɔtsɛmɛ ha mɛ ɔ, e de mɛ ke: “E hia kaa ma ya fiɛɛ Mawu matsɛ yemi ɔ he sane kpakpa a ngɛ ma kpa amɛ a mi hulɔ, ejakaa lɔɔ nɛ Mawu tsɔ mi ke ma ba tsu.”—Luka 4:43.
2. Mɛni heje nɛ Yesu bu sɔmɔmi nítsumi ɔ kaa e ji nɔ́ nɛ he hia a?
2 Mɛni heje nɛ sɔmɔmi nítsumi ɔ he hia Yesu wawɛɛ jã? Nɔ́ nɛ he hia lɛ titli ji kaa nɛ́ e ma tsɔ Yehowa biɛ ɔ he. (Mat. 6:9) E suɔ e hiɔwe Tsɛ ɔ nɛ enɛ ɔ he ɔ, e suɔ kaa e maa pee e suɔmi nya ní, nɛ e ye e mlaa amɛ tsuo a nɔ. (Yoh. 14:31) Jehanɛ se hu ɔ, e susuɔ nihi a he wawɛɛ nɛ e suɔ kaa e maa ye bua mɛ.—Mat. 9:36, 37.
3. Mɛni blɔ nɔ wa maa gu kɛ tsɔɔ kaa sɔmɔmi nítsumi ɔ ji nɔ́ titli ngɛ wa si himi mi?
3 Moo Kase Yesu: E be gbɔjɔɔ kaa wa maa bu sɔmɔmi nítsumi ɔ kaa e ji nɔ́ nɛ he hia kaa bɔnɛ Yesu pee ɔ, ejakaa je ɔ peeɔ níhi nɛ e kɛ ngɔ wa be konɛ e kɛ je wa juɛmi kɛ je sɔmɔmi nítsumi ɔ nɔ. (Mat. 24:37-39; Luka 21:34) Enɛ ɔ heje ɔ, e sa nɛ wa yɔse níhi nɛ a he hia saminya a, konɛ wa ná be babauu kɛ dla wa he kɛ ha fiɛɛmi nítsumi ɔ daa. (Fil. 1:10) E sa nɛ waa bɔ mɔde nɛ waa pee wa si himi kpokploo nɛ́ wa ko puɛ be ngɛ je ɔ he.—1 Kor. 7:31.
4. Mɛni heje nɛ e he hia kaa waa ya nɔ nɛ waa bu fiɛɛmi nítsumi ɔ kaa nɔ́ nɛ he hia pe kulaa ngɛ wa si himi mi amlɔ nɛ ɔ?
4 Ke nɔ ko nɛ e hɛ mi tɛ̃ le kaa e be be fuu ɔ, níhi nɛ a he hia wawɛɛ ɔ ji níhi nɛ e tsuɔ a he ní kekle. Kaa nɔ hyɛmi nɔ́ ɔ, ke e ná le kaa kɔɔhiɔ ngua ko ma fiami ɔ, nɔ́ nɛ e ngɔɔ e he wami kɛ e be kɛ tsuɔ titli ji kaa a, e peeɔ níhi kɛ buu e weku mi bimɛ ɔmɛ a he konɛ a hi si slɔkee, nɛ e bɔɔ e kpɔ ɔ mi bimɛ ɔmɛ kɔkɔ. E pee we níhi nɛ a he hia we. Be nɛ e piɛ nɛ Harmagedon kɔɔhiɔ ɔ maa fia a pi hu. (Zef. 1:14-16; 1 Kor. 7:29) Bɔnɛ pee nɛ wa he wɔ nitsɛmɛ kɛ nihi nɛ wa fiɛɛɔ kɛ haa mɛ ɔ a yi wami ɔ, e sa nɛ waa hyɛ wɔ nitsɛmɛ wa he nɔ kɛ ní nɛ wa ngɛ tsɔɔe hu nɔ saminya, wa ngɛ asafo ɔ mi jio, wa ngɛ fiɛɛe ngɛ ma a mi jio. (1 Tim. 4:16) Ngɛ anɔkuale mi ɔ, loko a ma he wa yi wami ɔ, ja wa ngɔ fiɛɛmi nítsumi ɔ kɛ pee nɔ́ nɛ he hia pe kulaa ngɛ wa si himi mi!