Kaimi ɔ Yemi Be ɔ—He Blɔ Nɛ A Kɛ Ma Tsu Babauu Ngɛ Fiɛɛmi Nítsumi ɔ Mi!
1. Mɛni yi mi tomihi a heje nɛ e sa kaa wa susu babauu nɛ wa ma tsu ngɛ fiɛɛmi nítsumi ɔ mi ngɛ March, April kɛ May mi ɔ he?
1 Anɛ o ma nyɛ ma tsu babauu ngɛ fiɛɛmi nítsumi ɔ mi ngɛ Kaimi be nɛ ji March, April, kɛ May mi lo? Fiɛɛli komɛ nɛ a ji ní tsuli aloo sukuubi maa ya blɔ hami, nɛ a ma nyɛ maa ngɔ jamɛ a be ɔ kɛ tsu fiɛɛmi nítsumi ɔ. Ni komɛ hu ma tsu be kpiti blɔ gbali klɛdɛɛ nítsumi ɔ ngɛ nyɔhiɔhi nɛ maa ba a mi. Kɛ je April ligbi 2 ɔ nɔ kɛ yaa a, wa ma tsu nítsumi klɛdɛɛ ko kɛ fɔ nihi nɛ a ngɛ munyu ɔ he bua jɔmi ɔ nine nɛ́ a kɛ wɔ ba ye Kaimi ɔ ngɛ April 17. Lɔɔ se ɔ, wa maa ye bua nihi nɛ a ba Kaimi ɔ bɔnɛ pee nɛ bua jɔmi nɛ a ná a nɛ́ ko ba si, nɛ wa maa fɔ mɛ nine konɛ a ba bu munyu klɛdɛɛ nɛ a maa tu ngɛ otsi nɛ je sisi April 25 mi ɔ tue. Anɔkuale mi ɔ, yi mi tomihi fuu a heje nɛ e sa kaa wa susu babauu nɛ wa ma tsu ngɛ fiɛɛmi nítsumi ɔ mi ngɛ March, April kɛ May ɔ he ɔ nɛ.
2. Mɛni ji blɔ kake nɛ hi pe kulaa nɛ wa ma nyɛ maa gu nɔ kɛ bli wa sɔmɔmi nítsumi ɔ mi?
2 Blɔ Gbali A Wami Nítsumi: Blɔ kake nɛ hi pe kulaa nɔ nɛ wa maa gu kɛ pee babauu ji kaa wa maa pee blɔ gbali a walɔ. Akɛnɛ wɔ tsuo wa be deka heje ɔ, enɛ ɔ peemi biɔ nɛ waa sɛ hlami kɛ to blɔ nya, nɛ waa pee tsakemihi ngɛ wa si himi mi. (Abɛ 21:5) Eko ɔ, wa ma nyɛ maa tsɛ̃ ní komɛ nɛ wa peeɔ daa nɛ se nami be a he ɔ kɛ to be kpa. (Filip. 1:9-11) Mɛni heje nɛ o kɛ ni kpahi nɛ a ngɛ asafo ɔ mi ɔ sɛɛ we suɔmi nɛ o ná kaa o maa pee blɔ gbalɔ ɔ he ní kaa mɛ hu a maa piɛɛ o he kɛ tsu blɔ gbali a wami nítsumi ɔ lo?
3. Mɛni blɔ nya wekuhi ma nyɛ maa to konɛ a pee babauu ngɛ fiɛɛmi nítsumi ɔ mi?
3 Ngɛ nyɛ gbɔkuɛ Weku Mawu Jami nɛ maa nyɛɛ se ɔ mi ɔ, e maa hi kaa nyɛ ma susu otihi nɛ nyɛɛ kɛ maa ma nyɛ hɛ mi kaa weku ɔ a he. (Abɛ 15:22) Eko ɔ, ke nihi ngɛ weku ɔ mi ɔ pee kake ɔ, weku ɔ mi nɔ kake loo nihi fuu ma nyɛ ma tsu blɔ gbali a wami nítsumi ɔ nyɔhiɔ kake aloo nɔ́ nɛ pe jã. Nɛ ke nyɛ na kaa jã peemi be hie hu nɛɛ? Eko ɔ, weku ɔ maa to blɔ nya konɛ a pee babauu ngɛ fiɛɛmi nítsumi ɔ mi kɛ gu fiɛɛmi nɛ a maa ya gbɔkuɛ gbɔkuɛ ɔ nɔ, aloo nɛ́ a se maa kɛ ngɛ fiɛɛmi nítsumi ɔ mi Hɔ kɛ Hɔgba.
4. Ke wa pee babauu ngɛ fiɛɛmi nítsumi ɔ mi ngɛ Kaimi be ɔ mi ɔ, mɛni jɔɔmihi wa ma ná?
4 Yehowa toɔ níhi nɛ wa tsuɔ ngɛ e sɔmɔmi nítsumi ɔ mi ɔ he hɛ, nɛ e bua jɔɔ wa afɔle sami ɔ he. (Heb. 6:10) Ke wa ke Yehowa kɛ ni kpahi ní ɔ, lɔɔ haa nɛ wa náa bua jɔmi. (1 Kron. 29:9; Níts. 20:35) Anɛ o ma nyɛ maa pee babauu ngɛ fiɛɛmi nítsumi ɔ mi ngɛ Kaimi be nɛ ɔ mi konɛ o ná bua jɔmi kɛ jɔɔmi babauu lo?