‘Ha Mawu Biɛ ɔ He Nɛ Tsɔ’
1. Kpe wayo nɛ a maa pee ngɛ sɔmɔmi jeha 2012 ɔ yi ji mɛni, nɛ mɛni nɔ a kɛ da?
1 E ji he blɔ ngua nɛ wa ná kaa a kɛ Yehowa, nɛ ji Je Mluku ɔ Matsɛ ɔ biɛ tsɛɔ wɔ! Mawu nitsɛ lɛ e kɛ e biɛ ɔ wo wɔ, nɛ titli ɔ, kaa Yehowa Odasefoli ɔ, a le wɔ kɛ Yehowa biɛ nɛ ngɛ slɔɔto nɛ ɔ kɛ je jeha 1931. (Yes. 43:10) Yesu, nɛ ji Mawu Bi kake ɔ ngɛ bumi nɛ mi kuɔ kɛ ha e Tsɛ ɔ biɛ ɔ, nɛ lɔɔ ji nɔ́ kekleekle nɛ e wo ta ngɛ sɔlemi he nɔ hyɛmi nɔ́ nɛ e pee ɔ mi. (Mat. 6:9) Wa ngɔ jeha 2012 kpe wayo ɔ yi ɔ kɛ da Yesu munyu ɔ nɔ. Kpe ɔ yi ji, ‘Ha Mawu Biɛ ɔ He Nɛ Tsɔ.’
2. Mɛni ji munyu komɛ nɛ wa maa nu ngɛ kpe ɔ?
2 Munyuhi Nɛ Wa Maa Nu: Munyu nɛ e yi ji “Akɛnɛ Be Tsuo Sɔmɔli Ji Nyɛ Heje ɔ, Nyɛ Ha Nɛ Nihi Nɛ A Le Mawu Biɛ ɔ” nɛ a maa tu Hɔ ɔ maa tsɔɔ wɔ nɔ́ heje nɛ be tsuo sɔmɔmi nítsumi ɔ ji nítsumi nɛ haa nɔ bua jɔmi ngɛ si himi mi. Jehanɛ se hu wa maa bu munyuyi nɛ a gba mi nɛ e yi ji, “Hyɛ Nɛ Hi Nɛ O Ko Ha Nɛ A Gbe Mawu Biɛ ɔ He Guɛ” ɔ tue, nɛ lɔɔ maa ye bua wɔ konɛ waa yu wa he ngɛ níhi eywiɛ nɛ ma nyɛ maa pee oslaa ha wɔ ɔ a he. A ma ha wɔ sane bimihi nɛ ji, Mɛni maa ye bua wɔ konɛ waa kɛ kã nɛ fiɛɛ kɛ tsɔɔ nihi nɛ a bua jɔɛ munyu ɔ he kpakpa ko ɔ? kɛ Mɛni maa ye bua wɔ konɛ wa tsu wa sɔmɔmi nítsumi ɔ kɛ pi si saminya? a heto ngɛ munyu nɛ a maa tu nɛ e yi ji, “Nɔ́ Heje Nɛ E Sa Kaa A Tsɔ Mawu Biɛ ɔ He” ɔ mi. Hɔgba a, wa maa nu munyuyi nɛ a gba mi eywiɛ nɛ maa tsɔɔ wɔ bɔnɛ wa ma plɛ kɛ tsɔ Mawu biɛ ɔ he ha kɛ gu níhi nɛ wa susuɔ, wa munyu tumi, wa juɛmi nya si mami kɛ wa je mi bami nɔ. Ni hehi titli a bua maa jɔ magbɛ nɔ munyu nɛ a maa tu nɛ e yi ji, “Yehowa Ma Tsɔ E Biɛ Ngua a He Ngɛ Harmagedon” ɔ he.
3. Mɛni he blɔ wa ngɛ, nɛ mɛni blɔ nɔ kpe wayo ɔ maa ye bua wɔ nɛ waa pee jã ngɛ?
3 E be kɛe nɛ Yehowa ma tsɔ e biɛ ɔ he. (Eze. 36:23) Se loko e maa su be nɛ Yehowa maa pee enɛ ɔ, wa ngɛ he blɔ ngua kaa wa ma tsɔ Yehowa biɛ klɔuklɔu ɔ he. Wa he ye kaa kpe nɛ ɔ maa ye bua wɔ tsuo konɛ wa nyɛ nɛ wa tsu wa blɔ nya nítsumi nɛ he hia kaa nihi nɛ a kɛ Mawu biɛ ɔ wo mɛ ɔ he ní.