**Wa He Nɛ Maa Be Ngɛ Fiɛɛmi Ní Tsumi ɔ Mi—Moo Ngɔ Baiblo Tsɔɔmi Womi ɔ Kɛ Ha Ngɛ Fiɛɛmi Mi**

Nɔ́ He Je Nɛ E He Hia: Baiblo Tsɔɔmi womi ɔ ji womi titli nɛ waa kɛ tsɔɔ nihi ní. Se loko waa kɛ nɔ ko maa kase ɔ, e sa kaa waa sɛ hlami nɛ wa ha lɛ womi ɔ eko. Enɛ ɔ he ɔ, e sa nɛ wɔ tsuo waa bɔ mɔde nɛ waa le bɔ nɛ waa kɛ Baiblo Tsɔɔmi womi ɔ ma ha nihi ngɛ fiɛɛmi mi ha. (Abɛ 22:29) Wa ma nyɛ maa gu blɔhi fuu a nɔ kɛ ha womi ɔ. E sa nɛ fiɛɛli nɛ a gu blɔhi nɛ ke a kɛ tsu ní ɔ, e woɔ yiblii nɔ kɛ ha womi ɔ.

Blɔ Nɔ Nɛ O Maa Gu Kɛ Pee:

Mo bi wetsɛ ɔ sane ko nɛ e bua maa jɔ he, nɛ o tsɔɔ lɛ yi nɛ nyɛ maa na heto ɔ ngɛ ngɛ womi ɔ mi. O ma nyɛ maa ngɔ sane bimihi nɛ ngɛ yi tsuaa yi sisije ɔ eko kɛ tsu ní. Ke wetsɛ ɔ tsɔɔ e juɛmi ɔ, kane ngmami ko nɛ kɔ sane bimi ɔ he, nɛ o tsɔɔ lɛ kuku nɛ nyɛ maa na sane bimi ɔ heto ngɛ, nɛ o kɛ lɛ nɛ susu he.
O kɛ wetsɛ ɔ ma nyɛ ma susu munyuhi nɛ ngɛ womi ɔ ba fa 3 kɛ ya si 6 mi ɔ eko he, konɛ e bua nɛ jɔ ní kasemi ɔ he. Lɔ ɔ se ɔ, moo tsɔɔ lɛ he nɛ a da Baiblo ɔ nɔ kɛ ha sane bimi ɔmɛ a heto ngɛ ngɛ womi ɔ mi. Kaa nɔ hyɛmi nɔ́ ɔ, o ma nyɛ maa tu oslaa ko nɛ ba lingmi nɛ ɔ he munyu, nɛ o tsɔɔ lɛ kaa nihi fuu suɔ kaa a maa le sane bimihi nɛ ngɛ ba fa 3 ɔ a heto. O ma nyɛ ma de lɛ hu kaa o kɛ nihi nɛ ngɛ kpɔ ɔ mi ɔ ngɛ ní kpakpahi nɛ maa ba hwɔɔ se ɔ he susue. Lɔ ɔ se ɔ, moo ngɔ fonihi nɛ ngɛ ba fa 4-5 kɛ tsɔɔ lɛ, nɛ o bi lɛ ke, “Si womi nɛ ɔmɛ a kpɛti te nɛɛ lɛ ke e ba mi ɔ, o bua maa jɔ?” Jehanɛ se hu ɔ, o ma nyɛ ma de lɛ kaa wa ngɛ nihi slaae ngɛ a kpɔ ɔ mi konɛ waa ye bua mɛ nɛ a ná sane bimihi nɛ a he hia amɛ a heto. Lɔ ɔ se ɔ, moo ngɔ sane bimihi nɛ ngɛ ba fa 6 kɛ tsɔɔ lɛ nɛ e hla kake nɛ e bua jɔ he.
O kɛ wetsɛ ɔ nɛ je Baiblo mi ní kasemi sisi tɛɛ. O ma nyɛ ma de ke: “Waa kɛ nihi nɛ a ngɛ kpɔ nɛ ɔ mi ɔ ngɛ Baiblo kasemi womi nɛ ɔ he susue. Anɛ o na eko hyɛ lo? [Ngmɛɛ lɛ blɔ nɛ e ha heto.] Ke o ngɛ be bɔɔ ɔ, ma suɔ nɛ ma tsɔɔ mo bɔ nɛ waa kɛ womi nɛ ɔ ma nyɛ maa kase Baiblo ɔ ha.”

Moo Ka Enɛ ɔ Ngɛ Nyɔhiɔ ɔ Mi:

Ke nyɛ ngɛ nyɛ weku Mawu jami pee ɔ, nyɛɛ pee bɔ nɛ nyɛɛ kɛ Baiblo Tsɔɔmi womi ɔ ma ha ha a he peemi kɛ tsɔɔ.
Ke o kɛ fiɛɛlɔ ko ya fiɛɛmi ɔ, mo de lɛ nɔ́ nɛ o to kaa o ma de. (Abɛ 27:17) Ke o fiɛɛmi munyu ɔ nui tso ɔ, mo tsake.