Ja A Pue Wuhi A Nɔ Nyu Loko A Maa Wa
1. Mɛni nɔ nyu e sa nɛ a pue konɛ e wa?
1 Loko wuhi nɛ a du ngɛ ngmɔ mi maa wa a, ja a pue a nɔ nyu. Jã ji bɔnɛ e ji ngɛ anɔkuale wuhi nɛ wa duɔ kɛ woɔ nihi nɛ a ngɛ wa zugba kpɔ ɔ mi ɔ a tsui mi ɔ nɛ. (1 Kor. 3:6) Ke wa suɔ kaa anɔkuale wuhi nɛ wa du kɛ wo nihi a tsui mi ɔ nɛ a puɛ, nɛ a wa, nɛ a wo yiblii ɔ, lɛɛ e sa nɛ waa kpale kɛ ya nɛ waa kɛ Mawu Munyu ɔ nɛ ya pue okadi peemi wu nɛ ɔmɛ a nɔ nyu.
2. Mɛni wa maa pee nɛ ma ha nɛ wa ma nyɛ maa kpale kɛ ya slaa nɔ ko?
2 Mo Bi Sane: Ke o ngɛ munyu nɛ o kɛ maa ya fiɛɛmi ɔ kasee ɔ, mɛni heje nɛ o susuu we sane bimi ko nɛ wetsɛ ɔ bua ma nyɛ maa jɔ he nɛ o ma nyɛ ma si ha lɛ, nɛ́ ke o ya slaa lɛ ekohu ɔ, o kɛ lɛ ma susu he ɔ he? Ke o ya slaa nɔ ɔ kekleekle nɛ nyɛ gbe nyɛ ní sɛɛmi ɔ nya a, mo si sane bimi ko ha lɛ nɛ o to blɔ nya nɛ o kpale ya slaa lɛ. Nihi fuu na kaa e hi kaa a ma je sane bimi ɔ kɛ je Baiblo Tsɔɔmi womi ɔ mi konɛ a nyɛ nɛ a da nɔ nɛ a kɛ nɔ ɔ nɛ kase Baiblo ɔ.
3. Mɛni ji ní komɛ nɛ o ma nyɛ maa ngma ngɛ nɔ ko nɛ e bua jɔ munyu ɔ he ɔ he?
3 Moo Ngma Nɔ ɔ He Níhi: Ke o je nɔ ɔ ngɔ pɛ ɔ, mo ná tsui nɛ o ngma e he ní kɛ fɔ si. Ngmaa nɔ ɔ biɛ kɛ e adrɛs. Jehanɛ se hu ɔ, e hi kaa o maa ngma ligbi kɛ be nɛ o kɛ ya e ngɔ, nɔ́ nɛ he nɛ o kɛ lɛ nyɛ susu, kɛ womi nɛ o ha lɛ, keji o ha lɛ womi. Anɛ e de mo ke e ngɛ jami ko mi lo? Anɛ e ngɛ weku lo? Anɛ e tsɔɔ mo níhi nɛ e bua jɔ he kɛ níhi nɛ haoɔ lɛ lo? Ní nɛ ɔmɛ nɛ o maa ngma a maa ye bua mo nɛ o maa le nɔ́ nɛ o kɛ lɛ maa sɛɛ ke o kpale kɛ ya slaa lɛ. Moo ngma be nɛ e tsɔɔ kaa o ma nyɛ ma ba slaa lɛ ekohu ɔ, kɛ sane bimi nɛ o ma ya ha heto ɔ hu kɛ fɔ si.
4. Ke wa kpale kɛ ya nihi nɛ a ngɛ munyu ɔ he bua jɔmi ɔ a ngɔ nɛ wa ya nɛ mɛ ɔ, mɛni heje nɛ e sɛ nɛ wa kɔni nɛ gbo?
4 O Kɔni Nɛ Ko Gbo: Satan maa ya nɔ maa bɔ mɔde kaa e ma “je munyu ɔ” nɛ a du kɛ wo nihi a tsui mi ɔ ngɛ a mi. (Mar. 4:14, 15) Enɛ ɔ he ɔ, ke o kpale kɛ ya nɔ ɔ nɛ e ngɛ munyu ɔ he bua jɔmi ɔ we mi nɛ o ya nɛ lɛ ɔ, o kɔni nɛ ko gbo. Anɛ o ma nyɛ maa ngma sɛ womi kɛ mane lɛ loo o ngma womi ko nɔ ní kpiti kɛ wo e sinya a sisi lo? Blɔ gbalɔ ko kɛ yo ko je Baiblo mi nikasemi sisi ngɛ sinya nya se e ya nɛ lɛ ngɛ we mi hu, lɔɔ he ɔ, e mane yo ɔ sɛ womi. Nyagbe ɔ, benɛ blɔ gbalɔ ɔ ya na yo ɔ ngɛ we mi ɔ, yo ɔ tsɔɔ kaa e bua jɔ bɔnɛ wa nyɛmiyo ɔ susu e he ha a he wawɛɛ nitsɛ. Ke wa nyɛ nɛ wa pue anɔkuale wuhi nɛ wa du ɔ a nɔ nyu nɛ a puɛ, nɛ a wa, nɛ ‘a wo yiblii nyingmi etɛ kɛ nyingmi ekpa kɛ lafa a, wa bua maa jɔ wawɛɛ.’—Mar. 4:20.