Wa He Nɛ Maa Be Ngɛ Fiɛɛmi Nítsumi ɔ Mi—Ngmaa Nihi Nɛ A Ngɛ Munyu ɔ He Bua Jɔmi ɔ A He Sane

‘O hɛ nɛ hi o he nɔ kɛ o tsɔɔmi ɔ nɔ.’ (1 Tim. 4:16) Ga womi nɛ je Mawu ngɔ nɛ bɔfo Paulo kɛ ha Timoteo ɔ tsɔɔ kaa wa ngɛ níhi a si kpami jio, fiɛɛli hehi ji wɔ jio ɔ, e sa nɛ waa bɔ mɔde nɛ waa ya wa hɛ mi kaa sane kpakpa fiɛɛli. Enɛ ɔ he ɔ, a ma bɔni munyu nɛ e yi ji “Wa He Nɛ Maa Be Ngɛ Fiɛɛmi Nítsumi ɔ Mi” ɔ ngmami ngɛ Wa Matsɛ Yemi Sɔmɔmi ɔ mi konɛ e ye bua wɔ nɛ wa nyɛ nɛ wa tsu enɛ ɔ he ní. A maa susu ga blɔ nɛ e he hia kake he ngɛ munyu ɔ mi, nɛ a kɛ blɔ tsɔɔmi ma ha ngɛ bɔnɛ waa kɛ ma tsu ní ha a he. Ngɛ nyɔhiɔ ɔ mi ɔ, a ngɛ nɔ tsuaa nɔ he wami woe nɛ e bɔ mɔde nɛ e kɛ blɔ tsɔɔmi ɔ nɛ tsu ní. A ma ha wɔ he blɔ ngɛ Sɔmɔmi Kpe ɔ mi ní peemi ko mi ngɛ nyɔhiɔ ɔ nyagbe konɛ waa tsɔɔ se námi nɛ wa ná be mi nɛ waa kɛ ga womi ɔ tsu ní ɔ. Nyɔhiɔ nɛ ɔ mi ɔ, a ngɛ wɔ he wami woe konɛ waa ngma nihi nɛ a ngɛ munyu ɔ he bua jɔmi ɔ a he sane kɛ to.

Nɔ Heje Nɛ E He Hia: Ke wa ma tsu nítsumi nɛ a kɛ wo wa dɛ ɔ kɛ pi si ɔ, e sɛ nɛ waa fiɛɛ kɛkɛ. E sa nɛ waa kpale kɛ ya nihi nɛ a ngɛ munyu ɔ he bua jɔmi ɔ a ngɔ nɛ waa tsɔɔ mɛ ní, nɛ tsɔɔ kaa wa ngɛ anɔkuale wu ɔ nɛ wa du ɔ nɔ nyu puee. (Mat. 28:19, 20; 1 Kor. 3:6-9) Enɛ ɔ biɔ nɛ waa kpale kɛ ya hla nɔ ɔ, konɛ waa kɛ lɛ nɛ susu sanehi nɛ hia lɛ ɔ a he, kɛkɛ wa tsa ní nɛ wa sɛɛ momo ɔ nɔ. Enɛ ɔ he ɔ, ke wa na nɔ ko nɛ e ngɛ munyu ɔ he bua jɔmi ɔ, e he hia nɛ waa ngma e he sanehi kɛ to.