Moo Fiɛɛ Kɛ Ha ‘Nihi Tsuo’
1. Mɛni blɔ nɔ nɛ fiɛɛli nɛ a nane pi si ɔ ngɛ kaa ga ní tsulɔ ngɛ?
1 Ga ní tsulɔ nɛ e le nítsumi saminya a ngɛ nítsumi dadehi fuu nɛ e kɛ tsuɔ ní, nɛ e le be nɛ e kɛ eko tsuaa eko tsuɔ ní, kɛ bɔnɛ a kɛ tsuɔ ní ha. Jã nɔuu nɛ wɔ hu wa ngɛ nítsumi dade slɔɔtohi nɛ waa kɛ tsuɔ wa fiɛɛmi nítsumi ɔ. Kaa nɔ hyɛmi nɔ́ ɔ, a pee womiyohi nɛ a tu ní slɔɔtoslɔɔtohi a he munyu ha wɔ konɛ wa kɛ fiɛɛ kɛ ha ‘nihi tsuo.’ (1 Kor. 9:22) A ngma womiyo nɛ ɔ ekomɛ a biɛ ngɛ womi nɛ ngɛ Wa Matsɛ Yemi Sɔmɔmi ɔ kpɛti ɔ mi, nɛ a tsɔɔ nihi nɛ a pee mɛ ha, kɛ bɔnɛ wa ma plɛ kɛ ha nihi ha.
2. Mɛni be waa kɛ womiyohi ma nyɛ ma tsu ní ngɛ fiɛɛmi mi?
2 Be Nɛ E Sa Kaa Waa Kɛ Womiyo Ɔmɛ Nɛ Tsu Ní: Ke ga ní tsulɔ ko na kaa nítsumi dade ko he maa ba se nami ha lɛ ɔ, e kɛ tsuɔ ní . Jã kɛ̃ nɛ waa kɛ womiyo ko ma nyɛ ma ha nɔ ko ke wa na kaa e he maa ba se nami ha lɛ, se pi ngɛ nyɔhiɔhi nɛ a tsɔɔ kaa a kɛ womiyo ɔ nɛ haa mi pɛ. Kaa nɔ hyɛmi nɔ́ ɔ, ke Baiblo Tsɔɔmi womi ɔ ji womi nɛ a ke wa kɛ ha, nɛ wa ngɛ fiɛɛe ngɛ ma ko nɛ Kristofoli be mi, nɛ nihi nɛ a ngɛ lejɛ ɔ a bua jɔɛ Baiblo ɔ he tsɔ ɔ, eko ɔ, e maa hi kaa wa ma ha nihi womiyo nɛ sa, konɛ lɔɔ se ke nɔ ɔ ná munyu ɔ he bua jɔmi ɔ, wa ha lɛ Baiblo Tsɔɔmi womi ɔ.
3. Mɛni heje nɛ e sa nɛ waa le nítsumi dadehi nɛ waa kɛ yeɔ odase ɔ kɛ nítsumi saminya a?
3 Ngmami ɔ jeɔ nihi nɛ a le nítsumi saminya a a yi. (Abɛ 22:29) Ngɛ anɔkuale mi ɔ, mwɔnɛ ɔ, nítsumi ko be nɛ he hia pe “sane kpakpa a he nítsumi klɔuklɔu ɔ.” (Rom. 15:16, NW) E sa nɛ waa bɔ mɔde nɛ waa le wa nítsumi dade ɔmɛ kɛ nítsumi saminya, konɛ waa pee ‘ní tsuli nɛ zo pee we mɛ.’—2 Tim. 2:15.