Níhi Nɛ Waa Kɛ Tsɔɔ Ní
1. Ngɛ mɛni blɔ nɔ nɛ sane kpakpa fiɛɛli ngɛ kaa ga ní tsuli?
1 Ga ní tsuli ngɛ ga dade slɔɔtohi nɛ a kɛ tsuɔ ní. A ngɔɔ ga dade ɔmɛ ekomɛ kɛ tsuɔ ní ngɛ be pɔtɛɛ komɛ a mi, nɛ ekomɛ hu lɛɛ a ngɔɔ kɛ tsuɔ ní be fɛɛ be. Ga ní tsuli nɛ a he be ɔ hɛɛɔ ga dadehi nɛ a kɛ tsuɔ ní be fɛɛ be ɔ ngɛ a he, nɛ a le lɔ ɔmɛ kɛ ní tsumi wawɛɛ. Baiblo ɔ woɔ Kristofo no tsuaa Kristofo no he wami kaa e bɔ e he mɔde ngɛ sɔmɔmi ní tsumi ɔ mi konɛ e pee ‘ní tsulɔ kpakpa nɛ e gbo we zo.’ (2 Tim. 2:15) Mɛni ji ga dade nɛ he hia pe kulaa nɛ e sa nɛ e hi wa dɛ be fɛɛ be? Lɔ ɔ ji Mawu Munyu ɔ, ejakaa e ji womi titli nɛ waa kɛ ‘peeɔ nihi kaseli.’ (Mat. 28:19, 20) Enɛ ɔ he ɔ, e sa nɛ waa bɔ mɔde nɛ waa kɛ he bemi nɛ ‘tsɔɔ anɔkuale ɔ saminya.’ Se wa ngɛ ní kpahi nɛ wa pɔɔ kɛ ní tsumi nɛ e sa kaa Kristofohi tsuo nɛ a le lɔ ɔmɛ hu kɛ ní tsumi saminya, konɛ a kɛ tsɔɔ nihi anɔkuale ɔ.—Abɛ 22:29.
2. Mɛni womihi nɛ wa pɔɔ kɛ ní tsumi ngɛ fiɛɛmi mi?
2 Níhi Nɛ Wa Pɔɔ Kɛ Ní Tsumi: Ngɛ Baiblo ɔ se ɔ, mɛni womi kpahi nɛ waa kɛ tsuɔ ní? Womi nɛ waa kɛ tsuɔ ní titli ji Mɛni Tutuutu Ji Baiblo ɔ Tsɔɔmi? womi ɔ. Ke waa kɛ Baiblo mi ní kaselɔ ko kase Baiblo Tsɔɔmi womi ɔ ta a, waa kɛ lɛ kaseɔ “Nyɛɛ To Nyɛ He Ngɛ Mawu Suɔmi ɔ Mi” womi ɔ konɛ e le bɔ nɛ e kɛ Baiblo mi sisi tomi mlaahi ma tsu ní ha ngɛ e si himi mi. Enɛ ɔ he ɔ, e sa nɛ waa le bɔ nɛ waa kɛ womi enyɔ nɛ ɔmɛ maa tsɔɔ ní ha saminya. E sa nɛ waa hɛɛ womiyo komɛ hu ngɛ wa he be fɛɛ be. Womihi nɛ waa kɛ jeɔ Baiblo mi ní kasemi sisi ɔ kake hu ji Sane Kpakpa Nɛ Je Mawu Ngɔ! womiyo ɔ. Ke nihi nɛ a ngɛ wa zugba kpɔ ɔ mi ɔ nyɛ we nɛ a kaneɔ ní saminya, aloo wa be womihi fuu ngɛ a je gbi mi ɔ, wa ma nyɛ kɛ mɛ maa kase Bu Mawu Tue aloo Bu Mawu Tue Nɛ́ O Hi Si Kɛ Ya Neneene womiyo ɔ. Nɔ́ nɛ waa kɛ tsɔɔ Baiblo mi ní kaseli blɔ kɛ baa asafo ɔ mi ji Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ? womiyo ɔ. Video komɛ kaa Mɛni He Je Nɛ E Sa Kaa Waa Kase Baiblo ɔ?, Mɛni A Peeɔ Ngɛ Matsɛ Yemi Asahi A Nɔ?, kɛ Does God Have a Name? (Anɛ Mawu Ngɛ Biɛ Lo?) ɔ ma nyɛ maa ye bua wɔ konɛ waa pee nihi kaseli. Enɛ ɔ he ɔ, e sa nɛ waa le bɔ nɛ waa kɛ ní nɛ ɔmɛ ma tsu ní ha saminya.
3. Mɛni nɛ Wa Matsɛ Yemi Sɔmɔmi ɔ mi munyuhi nɛ maa ba pee se ɔ maa ye bua wɔ nɛ waa pee?
3 Pee se ɔ, Wa Matsɛ Yemi Sɔmɔmi ɔ maa tsɔɔ bɔ nɛ waa kɛ womihi nɛ wa pɔɔ kɛ ní tsumi ngɛ fiɛɛmi mi ɔ ma tsu ní ha ngɛ he bemi mi. Ke wa bɔ mɔde nɛ wa ngɔ níhi nɛ waa kɛ tsɔɔ nihi ní ngɛ fiɛɛmi mi ɔ kɛ tsu ní saminya a, lɔ ɔ tsɔɔ kaa waa kɛ Baiblo ɔ mi ga womi nɛ ɔ ngɛ ní tsue. E de ke: “Hyɛ mo nitsɛ o he nɔ saminya; nɔ́ nɛ o ngɛ tsɔɔe ɔ hu hyɛ nɔ bɔ nɛ sa. Ejakaa ke o pee jã a, o ma he mo nitsɛ o yi wami, kɛ nihi nɛ buɔ mo tue ɔ hulɔ.”—1 Tim. 4:16.