Anɛ O Ma Nyɛ Maa Ngɔ O He Kɛ Wo Gbɔkuɛ Nya Si Odase Yemi Mi Lo?
1. Kaa bɔnɛ ni lelɔ ko tsɔɔ mi ɔ, mɛni be Paulo fiɛɛ ngɛ wehi a mi?
1 Womi ko nɛ e biɛ ji, Daily Life in Bible Times ɔ tsɔɔ mi kaa, bɔfo Paulo pɔɔ wehi a mi fiɛɛmi yami “kɛ je gbɔkuɛ ngmlɛ 4 kɛ ya si nyɔ mi.” Wa li kaa ja tutuutu ji Paulo fiɛɛmi yami he blɔ nya tomi, se kɛ̃ ɔ, wa le kaa Paulo suɔ kaa ‘e maa pee enɛ ɔmɛ tsuo ngɛ sane kpakpa a heje.’ (1 Kor. 9:19-23) Enɛ ɔ ma nyɛ maa tsɔɔ kaa e to blɔ nya nɛ e ya wehi a mi be mi nɛ e nine maa su nihi babauu a nɔ.
2. Mɛni heje nɛ gbɔkuɛ nya si ji be nɛ hi saminya kɛ ha fiɛɛmi yami ɔ?
2 Ngɛ hehi fuu ɔ, fiɛɛli pɔɔ wehi a mi fiɛɛmi yami mɔtu ngɛ otsi ɔ mi. Se, anɛ be nɛ ɔ hi loloolo kɛ ha fiɛɛmi ngɛ o kpɔ ɔ mi lo? Blɔ gbalɔ ko tu e zugba kpɔ ɔ he munyu ke: “E yee kaa o maa na nihi ngɛ we mi ngɛ ligbi ɔ mi. Se nihi babauu hii we mi gbɔkuɛ nya si.” Gbɔkuɛ nya si fiɛɛmi ɔ ji he blɔ agbo nɛ waa kɛ maa fiɛɛ sane kpakpa a kɛ ha nihi, titli ɔ nyumuhi. Behi fuu ɔ, wetsɛ ɔmɛ ngɛ deka, nɛ a suɔ kaa a maa bu wɔ tue. Ke e maa hi ɔ, asafo mi nikɔtɔma amɛ nɛ a to gbɔkuɛ nya si kpe kɛ ha fiɛɛmi yami he blɔ nya.
3. Mɛni blɔ nɔ waa kɛ nɔ́ se kɔmi ma tsu ní ngɛ be nɛ wa ngɛ fiɛɛe gbɔkuɛ nya si ɔ?
3 O Kɛ Níhi A Se Kɔmi Nɛ Tsu Ní: Ke wa ngɛ fiɛɛe gbɔkuɛ ɔ, e sa nɛ waa kɛ níhi a se kɔmi nɛ tsu ní. Kaa nɔ hyɛmi nɔ́ ɔ, ke o na kaa be nɛ o ya nɔ ko ngɔ ɔ e hí ha lɛ, eko ɔ, benɛ e ngɛ ní yee ɔ, e maa hi kaa o ma de lɛ ke pee se ɔ, o maa kpale kɛ ba. Ke du bu ɔ, moo da he nɛ wetsɛ ɔ maa na mo saminya, nɛ o je o he si kɛ tsɔɔ lɛ oya nɛ o ha nɛ e le nɔ́ heje nɛ o ba lejɛ ɔ. Nile hu ngɛ mi kaa nihi maa nyɛɛ enyɔɔnyɔ loo ngɛ kuu mi, nɛ a nyɛɛ gbɛjegbɛ nɛ kane ngɛ nɔ ɔ he nɛ nɔ ko kó tsɔ e he banee. Ko ya gba wetsɛ ɔmɛ a nya benɛ je jɔ tsɔ nɛ a yaa hwɔ si ɔ. (2 Kor. 6:3) Ke kpɔ ko mi jɔɛ ke du bu ɔ, lɛɛ mo ya fiɛɛ ngɛ lejɛ ɔ be mi nɛ du bu we.—Abɛ 22:3.
4. Mɛni jɔɔmihi wa náa kɛ jeɔ gbɔkuɛ nya si fiɛɛmi mi?
4 Jɔɔmihi: Wa náa bua jɔmi wawɛɛ ngɛ fiɛɛmi nítsumi ɔ mi ke wa bɔ mɔde nɛ wa ye nihi odase. Ke wa ye odase babauu ɔ, e haa nɛ wa náa he blɔ kɛ yeɔ bua ni kpahi nɛ́ a “le anɔkuale ɔ, konɛ a he a yi wami.” (1 Tim. 2:3, 4) Anɛ o ma nyɛ maa to o be he blɔ nya konɛ o kɛ o he nɛ wo gbɔkuɛ nya si fiɛɛmi mi lo?