Moo Ngɔ O Be Kɛ Tsu Ní Saminya Ngɛ Fiɛɛmi Mi
Ngɛ 2014 sɔmɔmi jeha a mi ɔ, Yehowa Odasefohi ngɔ ngmlɛfia 1,945,487,604 kɛ fiɛɛ. Enɛ ɔ tsɔɔ kaa waa kɛ wa be tsuo ngɛ Yehowa sɔmɔe niinɛ! (La 110:3; 1 Kor. 15:58) Akɛnɛ ‘be nɛ piɛ ɔ pi hu’ he je ɔ, anɛ o ma nyɛ maa ngɔ be nɛ o ngɛ ɔ kɛ fiɛɛ kɛ ha nihi fuu lo?—1 Kor. 7:29.
Wa be nɛ waa kɛ ma tsu ní ngɛ nile mi ɔ biɔ nɛ waa pee tsakemi komɛ. Kaa nɔ hyɛmi nɔ́ ɔ, ke o kɛ o he woɔ fiɛɛmi ní tsumi ɔ fa ko mi nɛ o yeɔ kaa ngmlɛfia kake loo enyɔ nɛ o nɛ́ nɔ ko nɛ o maa fiɛɛ ha a, anɛ o ma nyɛ maa pee tsakemi konɛ o hla nihi fuu nɛ o kɛ mɛ nɛ sɛɛ ní lo? E ngɛ mi kaa e slo bɔ nɛ zugba kpɔ tsuaa zugba kpɔ ngɛ ha mohu lɛɛ, se ga womi nɛ nyɛɛ se nɛ ɔmɛ maa ye bua mo nɛ o ngɔ o be kɛ tsu ní saminya konɛ o kó pee kaa “nɔ ko nɛ ngɛ kɔɔhiɔ gbee.”—1 Kor. 9:26.
Wehi A Mi Fiɛɛmi: Jehahi babauu ji nɛ ɔ, mɔtu ji be nɛ fiɛɛli fuu pɔɔ fiɛɛmi ngɛ wehi a mi. Se akɛnɛ nihi fuu yaa ní tsumi mɔtu he je ɔ, o ma nyɛ maa ye odase ngɛ wehi a mi piani loo gbɔkuɛ nya si, nɛ o hyɛ kaa lɔ ɔ maa wo yiblii lo. Be nɛ ɔ ji be nɛ nihi fuu pɔɔ a he mi jɔɔmi ngɛ we mi. Ke fiɛɛli ye odase ngɛ gbɛjegbɛhi a he, juahi a nɔ, loo ní tsumi hehi kɛ je mɔtu kɛ yaa piani mi ɔ, e woɔ yiblii wawɛɛ.
Ma Nɔ Odase Yemi: Nyɛ ma nyɛ maa to womihi ngɛ atsɛ̃sehi loo okplɔɔhi a nɔ ngɛ hehi nɛ nihi beɔ ngɛ wawɛɛ ngɛ nyɛ zugba kpɔ ɔ mi. (Hyɛ July 2013 Wa Matsɛ Yemi Sɔmɔmi ɔ bf. 5.) Ke e ba kaa nihi fuu kpa bemi ngɛ he ko nɛ nyɛɛ kɛ atsɛ̃se loo okplɔɔ tsuɔ ní ngɛ ɔ, nyɛ Asafo Mi Sɔmɔmi Ajla Toli ɔmɛ ma nyɛ maa to blɔ nya konɛ nyɛɛ ngɔ okplɔɔ ɔ loo atsɛ̃se ɔ kɛ ya ma he kpa nɛ nihi beɔ ngɛ wawɛɛ ngɛ nyɛ zugba kpɔ ɔ mi.
Nihi A Slaami Kɛ Baiblo Mi Ní Kasemi Peemi: Ke fiɛɛmi ní tsumi ɔ fa ko wui yiblii ngɛ be pɔtɛɛ ko mi ɔ, eko ɔ, e maa hi kaa nyɛ maa ngɔ jamɛ a be ɔ kɛ ya slaa nihi nɛ a ná munyu ɔ he bua jɔmi ɔ, aloo nyɛ ma ya pee Baiblo mi ní kasemi. Kaa nɔ hyɛmi nɔ́ ɔ, ke nyɛ pɔɔ nihi nami ngɛ we mi Hɔ mɔtu ɔ, nyɛ ma nyɛ ma ya pee Baiblo mi ní kasemi piani loo gbɔkuɛ nya si. Ke nyɛ kpale yaa slaa nihi ɔ, nyɛ ma nyɛ maa to blɔ nya konɛ nyɛɛ slaa nihi tsuo nɛ a ngɛ kpɔ kake mi loko nyɛɛ je kɛ ho he kpa ya.
E ngɛ mi kaa be tsuaa be nɛ wa maa ya fiɛɛmi ɔ, waa ngmaa ngmlɛfia abɔ nɛ waa kɛ fiɛɛɔ ɔ mohu lɛɛ, se ke wa ní tsumi ɔ wo yiblii ɔ, wa bua jɔɔ wawɛɛ. Ke o to he hɛ kaa o sɔmɔmi ní tsumi ɔ fa ko wui yiblii kpakpa ngɛ be pɔtɛɛ ko mi ɔ, o ma nyɛ ma tsake o fiɛɛmi ní tsumi ɔ hɛ mi. Moo sɔle nɛ o kpa Yehowa nɛ ji “ngmɔtsɛ ɔ” pɛɛ konɛ e ye bua mo nɛ o ngɔ o be kɛ tsu ní saminya ngɛ fiɛɛmi mi!—Mat. 9:38.