Moo Ngɔ Dɛ Womi Ɔmɛ Kɛ Gbɛ Sane Kpakpa a Kɛ Fĩa
1. Kɛ Mawu webi ngɔ dɛ womihi kɛ tsu ní ha kɛɛ?
1 Yehowa webi kɛ jehahi babauu ngɔ dɛ womihi nɛ a da Baiblo ɔ nɔ kɛ ngma a kɛ tsu ní kɛ gbɛ sane kpakpa a kɛ fĩa. Ngɛ jeha 1880 ɔ, C. T. Russell kɛ nihi nɛ a piɛɛ e he ɔ bɔni Bible Students’ Tracts, (Baiblo Kaseli a Dɛ Womihi) peemi, nɛ a kɛ womi nɛ ɔmɛ haa nihi nɛ kaneɔ Hwɔɔmi Mɔ ɔ nɛ́ a gba ha nihi. A bu dɛ womi ɔmɛ kaa a he hia wawɛɛ, lɔɔ he ɔ, benɛ C. T. Russell kɛ Matsɛ Yemi ɔ he níhi nɛ a ma tsu ɔ yaa wo mlaa sisi ngɛ jeha 1884 ɔ, e kɛ munyu nɛ ji “tract” (dɛ womi) piɛɛ nítsumi ɔ biɛ nɛ ji, Zion’s Watch Tower Tract Society ɔ he, nɛ amlɔ nɛ ɔ, a tsɛ lɛ Watch Tower Bible and Tract Society of Pennsylvania. Benɛ e ke suɔ jeha 1918 ɔ, Baiblo Kaseli ɔmɛ gba dɛ womihi nɛ hiɛ pe ayɔ 300. Loloolo ɔ, dɛ womihi kɛ nítsumi ngɛ fiɛɛmi mi ɔ nuɔ tso saminya.
2. Mɛni heje nɛ dɛ womihi kɛ nítsumi nuɔ tso wawɛɛ ɔ?
2 Nɔ́ Heje Nɛ E Nuɔ Tso: Dɛ womihi ngɛ fɛu, nɛ nihi a bua jɔɔ he. Munyuhi nɛ ngɛ mi ɔ pi, e kanemi ngɛ bua jɔmi, nɛ se nami ngɛ he. Nihi nɛ a bua jɔɛ womi tɛtlɛɛ loo womi kanemi he ɔ suɔ nɛ a kane dɛ womi ɔmɛ. Dɛ womi ɔmɛ kɛ hami yi, fiɛɛli hehi kɛ jokuɛwi po nyɛɔ nɛ a kɛ haa. Dɛ womi ɔmɛ kle we, nɛ a hɛɛ mi yi.
3. Mo de mo nitsɛ o níhi a si kpami loo nɔ́ nɛ ngɛ wa womi ɔmɛ a mi nɛ tsɔɔ bɔnɛ dɛ womihi a he ngɛ se nami ha a.
3 Nihi babauu kase anɔkuale ɔ he ní kekle kɛ gu dɛ womihi a nɔ. Kaa nɔ hyɛmi nɔ́ ɔ, yo ko nɛ ngɛ Haiti ɔ na wa dɛ womi ɔ eko nɛ fɔɔ si ngɛ gbɛjegbɛ ɔ he. E wo nɛ e kane, nɛ e de ke, “I na anɔkuale ɔ!” Pee se ɔ, e ya Matsɛ Yemi Asa a nɔ, a kɛ lɛ bɔni Baiblo ɔ kasemi, nɛ a baptisi lɛ—enɛ ɔ tsuo je he wami nɛ ngɛ Mawu Munyu ɔ mi nɛ e na ngɛ dɛ womi ɔ mi ɔ heje.
4. Mɛni oti e sa kaa wa kɛ ma wa hɛ mi ke waa kɛ dɛ womi ɔmɛ ngɛ hae ngɛ nyɔhiɔ ko mi ɔ?
4 Wehi A Mi Fiɛɛmi: Akɛnɛ wa ma nyɛ maa ngɔ dɛ womihi kɛ ye odase nɛ e nu tso heje ɔ, waa kɛ maa pɔ nítsumi ngɛ nyɔhiɔ ɔ mi, wa maa je sisi ngɛ November nyɔhiɔ ɔ nɔ. Oti nɛ ngɛ wa hɛ mi ji kaa waa kɛ dɛ womi ɔmɛ maa je ní sɛɛmi sisi, se pi nɛ wa ma gba ha nihi kɛkɛ. Kekle be nɛ wa ma ya na nɔ ko nɛ ma ná munyu ɔ he bua jɔmi loo ke wa kpale ya slaa lɛ ɔ, wa ma nyɛ maa ngɔ Baiblo Tsɔɔmi womi ɔ loo womi kpa nɛ a kaseɔ kɛ pee bɔnɛ a kaseɔ Baiblo ɔ ha a he nɔ hyɛmi nɔ́. Mɛni blɔ nɔ wa maa gu konɛ waa kɛ dɛ womi ɔmɛ nɛ ha ngɛ wehi a mi fiɛɛmi ɔ mi? E slo dɛ womi ɔ eko tsuaa eko, lɔɔ he ɔ, e sa kaa waa le nɔ́ nɛ waa kɛ ma ha a mi munyu saminya.
5. Mɛni blɔ nɔ wa maa gu nɛ waa kɛ dɛ womihi nɛ ha ngɛ wehi a mi?
5 E sa kaa wa ha nɛ wa munyu ɔ kɛ dɛ womi ɔ mi munyu ɔ nɛ kɔ si fɔfɔɛ nɛ ngɛ wa zugba kpɔ ɔ mi ɔ he. Wa ma nyɛ maa ngɔ dɛ womi kɛ ha wetsɛ ɔ konɛ waa kɛ lɛ nɛ je ní sɛɛmi sisi. E ngɛ heii kaa fonihi nɛ ngɛ dɛ womi ɔ se ɔ ma nyɛ ma tle nɔ ɔ bua jɔmi si. Aloo wa ma nyɛ maa ngɔ dɛ womi slɔɔtohi kɛ tsɔɔ nɔ ɔ konɛ wa ha nɛ e hla e mi nɔ́ nɛ e suɔ. Ke wa ngɛ dɛ womi ɔ eko ngɛ gbi nɛ wa asafo ɔ tuɔ ɔ mi ɔ, lɛɛ wa ngɛ yi jee kaa nyɛɛ ngɔ kɛ tsu ní. Ke munyuyi nɛ ngɛ dɛ womi ɔ nɔ ɔ ji sane bimi ɔ, wa ma nyɛ nɛ wa bi nɔ ɔ konɛ e tsɔɔ e juɛmi ngɛ he. Aloo wa ma nyɛ ma bi sane ko nɛ ma tle nɔ ɔ bua jɔmi si konɛ wa kɛ lɛ nɛ sɛɛ ní. Ngɛ lɔɔ se ɔ, wa ma nyɛ nɛ waa kɛ nɔ ɔ nɛ́ kane dɛ womi ɔ fã ko, konɛ ke wa su he nɛ sane bimi ngɛ ɔ, wa bi lɛ nɛ e tsɔɔ e juɛmi ngɛ he. Wa ma nyɛ maa kane ngmamihi titli nɛ ngɛ dɛ womi ɔ mi ɔ kɛ je Baiblo ɔ mi. Benɛ waa kɛ nɔ ɔ susu e mi munyu ɔ ekomɛ a he ta a, wa ma nyɛ maa mwɔ ní sɛɛmi ɔ nya konɛ wa kɛ lɛ nɛ to blɔ nya konɛ waa kpale ya slaa lɛ. Ke nyɛ asafo ɔ siɔ womihi ngɛ nihi nɛ be we mi ɔ a sinyahi a nya a, nyɛ ma nyɛ ma si dɛ womi ɔ eko ngɛ he nɛ wetsɛ ɔ pɛ maa na.
6. Mɛni blɔhi a nɔ wa ma nyɛ maa ngɔ dɛ womi ɔmɛ kɛ ye odase ngɛ gbɛjegbɛhi a he?
6 Gbɛjegbɛ He Odase Yemi: Anɛ o kɛ dɛ womihi ye odase ngɛ gbɛjegbɛ he hyɛ lo? Nihi nɛ beɔ ngɛ gbɛjegbɛ ɔmɛ a nɔ ɔ ekomɛ yeɔ oya, nɛ a sume kaa a maa da si nɛ a kɛ wɔ nɛ́ sɛɛ ní. E he maa wa kaa wa maa le keji a ngɛ wa munyu ɔ he bua jɔmi. Mɛni heje nɛ wa ha we mɛ dɛ womi mohu pe nɛ wa ma ha mɛ womi tɛtlɛɛ ɔ ehe ɔmɛ eko be mi nɛ wa li kaa a maa kane loo a be kanee ɔ? Akɛnɛ fonihi nɛ ngɛ dɛ womi ɔ se ɔ ngɛ fɛu nɛ e mi munyuhi ngɛ kpiti heje ɔ, nihi maa suɔ nɛ a le e mi munyu, nɛ lɔɔ maa wo mɛ kã konɛ ke a ná be bɔɔ ɔ, a kane. Se ke a yi oya a, lɛɛ wa ma nyɛ nɛ waa kɛ mɛ nɛ susu dɛ womi ɔ mi munyu ɔmɛ ekomɛ a he.
7. Mo de níhi a si kpami nɛ tsɔɔ bɔnɛ a kɛ dɛ womi yeɔ odase benɛ a be fiɛɛmi tso mi.
7 Odase Nɛ A Yeɔ Be Mi Nɛ A Be Fiɛɛmi Tso Mi: E he wɛ kaa waa kɛ dɛ womi maa ye odase benɛ wa be fiɛɛmi tso mi. Nyɛmi nyumu ko kɛ dɛ womi bɔɔ ko woɔ e kotoku mi be tsuaa be nɛ e maa je we mi. Ke e kɛ nɔ ko kpe, kaa nɔ ko nɛ ngɛ ní juae ngɛ tsuapo mi kikɛ ɔ, e deɔ nɔ ɔ kaa e maa suɔ nɛ e ha lɛ nɔ́ ko nɛ́ e kane, kɛkɛ e ha lɛ dɛ womi ɔ eko. Benɛ gba si himi mi he piɛli komɛ yaa slaa si ngɛ New York City ɔ, a yɔse kaa a kɛ nihi nɛ je mahi slɔɔtohi a nɔ maa kpe. Lɔɔ he ɔ, a ngɔ womi wayo nɛ ji Nations ɔ kɛ dɛ womihi ngɛ gbi slɔɔtohi a mi ɔ kɛ ya. Nɛ ke a nu nɛ ní jualɔ ko nɛ ngɛ blɔ ɔ he, loo nɔ ko nɛ hii si ngɛ a kasa nya ngɛ he jɔɔmi he, loo ngɛ ní yemi he, ngɛ gbi kpa ko tue ɔ, a haa nɔ ɔ dɛ womi ngɛ e gbi ɔ mi.
8. Mɛni blɔ nɔ dɛ womihi ngɛ kaa wu nɛ a duɔ ɔ ngɛ?
8 “Du Ní”: A kɛ dɛ womihi ma nyɛ maa to wu nɛ a duɔ ɔ he. Ngmɔ hulɔ fĩaa wu fuu akɛnɛ e li e mi nɔ́ nɛ maa hi ɔ heje. Fiɛlɔ 11:6 a deɔ ke: “Du ní mɔtu kɛ gbɔkuɛ tsuo. O li a kpɛti nɔ́ nɛ maa ba; mɔtu nɔ́ ɔ jio, gbɔkuɛ nɔ́ ɔ jio. Enyɔ ɔmɛ tsuo maa hi jio, o li.” Enɛ ɔ he ɔ, nyɛ ha nɛ wa ya nɔ nɛ waa ngɔ dɛ womi nɛ́ e kɛ odase yemi nuu tso nɛ ɔ ‘kɛ gbɛ nile kɛ fĩa.’—Abɛ 15:7.
[Bua Jɔmi Munyu Nɛ A Ma Nɔ Mi ngɛ bafa 3]
Akɛnɛ dɛ womihi kɛ odase yemi nuu tso heje ɔ, waa kɛ maa pɔ nítsumi be saa be ngɛ nyɔhiɔ ɔ mi, nɛ wa maa je sisi ngɛ November nyɔhiɔ ɔ nɔ