Bɔ Nɛ O Kɛ Dɛ Womihi Maa Je Ní Sɛɛmi Sisi Ha

Kɛ je January 2018 ɔ mi ɔ, wa naa ní sɛɛmi he nɔ hyɛmi níhi ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ hɛ mi. A wo wɔ he wami kaa waa kɛ nihi nɛ sɛɛ ní mohu pe nɛ waa maa hi nihi womi hae kɛkɛ. A pee ní sɛɛmi he nɔ hyɛmi ní nɛ ɔmɛ a he videohi nɛ tsɔɔ bɔ nɛ waa kɛ Baiblo ɔ maa je ní sɛɛmi sisi ha konɛ e ye bua fiɛɛli nɛ a nyɛ nɛ a tsake a ní sɛɛmi ɔ hɛ mi. Se anɛ enɛ ɔ tsɔɔ kaa e sɛ nɛ waa kɛ womihi nɛ tsu ní kulaa ke wa ngɛ fiɛɛe ngɛ wehi a mi lo? Dɛbi! Kaa nɔ hyɛmi nɔ́ ɔ, wa ma nyɛ maa ngɔ dɛ womihi kɛ je ní sɛɛmi sisi. Wa ma nyɛ maa gu blɔ nɛ nyɛɛ se nɛ ɔmɛ a nɔ ke waa kɛ dɛ womihi ngɛ ní tsue ngɛ fiɛɛmi mi:

1. Mo bi sane bimi ɔ kɛ heto ɔmɛ nɛ a ha ngɛ dɛ womi ɔ hɛ mi ɔ.

2. Moo tsɔɔ heto nɛ Baiblo ɔ kɛ ha ngɛ ngmamihi nɛ a tsɛ se ngɛ ba fa enyɔ ɔ yi nɔ ɔ. Ke be ngɛ ɔ, moo kane munyuhi nɛ a ngɛ dɛ womi ɔ mi ɔ ekomɛ nɛ nyɛ susu he.

3. Ngɔɔ dɛ womi ɔ kɛ ha wetsɛ ɔ nɛ o wo lɛ he wami konɛ e kane nɔ́ nɛ piɛ ɔ.

4. Loko o maa je ɔ, moo ngɔ sane bimi nɛ ji, “Mo Susu He Nɛ O Hyɛ” ɔ kɛ tsɔɔ lɛ, nɛ o to blɔ nya nɛ o kɛ lɛ nɛ ya susu heto nɛ Baiblo ɔ kɛ ha a he be kpa.

Ke o kpale ya slaa lɛ ɔ, o kɛ lɛ nɛ susu heto ɔ he nɛ o si lɛ sane bimi kpa nɛ nyɛ ma ba susu he pee se. O ma nyɛ maa hla sane bimi ko ngɛ wa wɛbsaiti ɔ nɔ aloo ngɛ womi ɔ nɛ a tu he munyu ngɛ dɛ womi ɔ se ɔ mi. Ke e maa hi ɔ, mo ha wetsɛ ɔ Sane Kpakpa Nɛ Je Mawu Ngɔ! womiyo ɔ aloo Baiblo kasemi womi kpa ko nɛ piɛɛ Ní Tsɔɔmi Ga Dade Ɔmɛ a he ɔ eko.