Dɛ Womi Ehe Ɔmɛ Ngɛ Fɛu!
1. Mɛni ní ehehi nɛ a ngɛ fɛu lɛ a pee kaa wa kɛ tsu ní ngɛ fiɛɛmi mi?
1 A je dɛ womi ehe enuɔ kpo ngɛ 2013 “Mawu Munyu ɔ Ji Anɔkuale!” Kpe Ngua a sisi. Jehanɛ hu ɔ, a ngɔ Matsɛ Yemi Sɛ Gbi 38, nɛ e yi ji “Anɛ Nihi Nɛ A Gbo ɔ Maa Ba Wami Mi Ekohu Niinɛ Lo?” ɔ kɛ piɛɛ dɛ womi ɔmɛ a he. A pee dɛ womi ekpa nɛ ɔmɛ tsuo ehe. Mɛni yi mi tomihi a he je nɛ a pee mɛ ehe ɔ? Ke waa kɛ ngɛ hae ngɛ wehi a mi ɔ, mɛni blɔ nɔ nɛ wa maa gu kɛ ná bɔ nɛ a pee mɛ ha a he se saminya?
2. Mɛni yi mi tomi he je nɛ a pee dɛ womi ɔmɛ ehe ɔ?
2 Mɛni He Je Nɛ A Pee Mɛ Ehe ɔ?: Blɔ eywiɛ nɛ ɔmɛ a nɔ nɛ wa maa gu ɔ ma ha nɛ wehi a mi fiɛɛmi maa nu tso: (1) Bi sane nɛ ma ha nɛ wetsɛ ɔ ma je e juɛmi kpo. (2) O kɛ lɛ nɛ susu Ngmami ɔ he. (3) O kɛ womi ɔ nɛ ha lɛ konɛ e kane. (4) Bi lɛ sane ko nɛ o ma ba ha heto ke o ba pee se, nɛ o to be nɛ o maa kpale kɛ ba. Bɔ nɛ a pee dɛ womi ehe ɔmɛ ha a ha nɛ e yi kaa wa maa nyɛɛ blɔ eywiɛ nɛ ɔmɛ a se.
3. Mɛni blɔ nɔ wa maa gu kɛ ha dɛ womi ehe ɔ eko ngɛ fiɛɛmi mi?
3 Bɔ Nɛ Waa Kɛ Dɛ Womi Ɔmɛ Ma Tsu Ní Ha: (1) Ke o nga wetsɛ ɔ, ngɔɔ sane bimi slɔɔto ɔmɛ nɛ ngɛ dɛ womi ɔ hɛ mi ɔ kɛ tsɔɔ lɛ nɛ o bi lɛ e juɛmi ngɛ a he. (2) Mo bli dɛ womi ɔ mi nɛ o kɛ lɛ nɛ susu “Nɔ́ Nɛ Baiblo ɔ De” ɔ he. Moo kane ngmami ɔ kɛ je Baiblo ɔ mi tɛɛ ke si fɔfɔɛ ɔ maa ngmɛ blɔ. Ke wetsɛ ɔ ngɛ be ɔ, nyɛ susu “Bɔ Nɛ O Ma Ná He Se Ha” a he. (3) Mo ha lɛ dɛ womi ɔ, konɛ o wo lɛ he wami nɛ e kane nɔ́ nɛ piɛ ɔ. (4) Loko o maa je ɔ, moo ngɔ sane bimi nɛ ngɛ “Mo Susu He Nɛ O Hyɛ” sisi ɔ kɛ tsɔɔ lɛ, nɛ o to blɔ nya nɛ o kɛ lɛ ba susu heto nɛ Baiblo ɔ ha a he ngɛ be kpa mi.
4. Mɛni blɔ nɔ wa maa gu nɛ waa kɛ womiyo ɔ ma tsu ni ke wa kpale ya slaa nɔ ko?
4 Se kpalemi kɛ ya slaa nɔ ko hu he wɛ kulaa. Moo ngɔ ngmami nɛ a tsɛ ngɛ dɛ womi ɔ se ɔ kɛ ha sane bimi nɛ o si loko o je ɔ heto. Loko o maa je ɔ, moo tsɔɔ lɛ Sane Kpakpa womiyo ɔ he foni ɔ, nɛ o tsɔɔ lɛ womiyo ɔ kɛ he nɛ a tu nɔ́ nɛ nyɛ ngɛ he susue ɔ he munyu ngɛ, nɛ o ngɔ womiyo ɔ kɛ ha lɛ. Ke e ngɔ ɔ, o to blɔ nya nɛ o kɛ lɛ ya susu womiyo ɔ he be kpa nɛ o maa ya a. O je Baiblo mi ní kasemi sisi ji lɔ ɔ nɛ! O ma nyɛ ma ha lɛ dɛ womi kpa ngɛ womiyo ɔ nɛ o kɛ ma ha lɛ ɔ nane mi, nɛ moo to blɔ nya konɛ o kpale ya slaa lɛ nɛ nyɛ susu he.
5. Mɛni se námi lɛ ngɛ dɛ womihi a he ngɛ wa fiɛɛmi ní tsumi ɔ mi?
5 Waa kɛ dɛ womi tsu ní ngɛ wa fiɛɛmi ní tsumi ɔ mi pe jeha 130. E ngɛ mi kaa a klemi kɛ bɔ nɛ a pee mɛ ha a ngɛ ekpaekpa mohu, se ke waa kɛ tsu ní ngɛ fiɛɛmi mi ɔ, e nuɔ tso wawɛɛ. Nyɛ ha nɛ waa kɛ dɛ womi ehe nɛ ɔmɛ nɛ tsu ní saminya konɛ wa kɛ gbɛ Baiblo mi nile kɛ fiã je kɛ wɛ.—Abɛ 15:7.