Nɔ́ Nɛ Maa Ye Bua Mo Konɛ O Nyɛ Nɛ O Kase Ní Daa Otsi
ANƐ e he waa ha mo kaa o kɛ bua jɔmi maa kase Baiblo ɔ daa otsi lo? Ngɛ anɔkuale mi ɔ, e baa jã ngɛ wɔ tsuo wa blɔ fã mi be komɛ. Se kɛ̃ ɔ, mo susu ní komɛ nɛ wa peeɔ be fɛɛ be ɔ he nɛ o hyɛ. Kaa nɔ hyɛmi nɔ́ ɔ, wa duɔ daa ligbi. Dumi heɔ be, nɛ e biɔ mɔde bɔmi hulɔ. Se ke wa du ta a, wa he mi jɔɔ wɔ fuaa! Jã kɛ̃ nɛ Baiblo ɔ nɛ wa kaseɔ ɔ hu haa nɛ wa he mi jɔɔ wɔ, nɛ wa si himi peeɔ kpakpa. (Efe. 5:26) Ga womihi nɛ nyɛɛ se ɔ ma nyɛ maa ye bua mo:
Moo to be. Wa le kaa Baiblo ɔ nɛ wa maa kase ngɛ wa dɛ he ɔ piɛɛ “níhi nɛ a he hia wawɛɛ” nɛ e sa nɛ waa pee ɔ he. (Filip. 1:10) Enɛ ɔ he ɔ, bɔ nɛ pee nɛ o hɛ nɛ ko je be kɛ ngmlɛfia nɛ o to kɛ ha ní kasemi ɔ nɔ ɔ, moo ngma ngɛ womi ko nɔ nɛ o kɛ fɔ he nɛ e he be wae ha mo kaa o maa na. Aloo o ma nyɛ ma set alarm ngɛ o fon ɔ nɔ konɛ e kai mo kɛ sɛ hlami be nɛ o maa kase ní ɔ.
Mo susu níhi nɛ maa ye bua mo konɛ o o nyɛ nɛ o ngɔ o juɛmi kɛ ma ní kasemi ɔ nɔ. Ni komɛ ngɛ nɛ a ma nyɛ maa kase ní be kɛkɛɛ nɛ pɔ be a he tɔe. Se ni komɛ lɛɛ a be nyɛe maa pee jã, enɛ ɔ he ɔ, a peeɔ lɛ bɔɔbɔɔbɔɔ. Moo hyɛ o si fɔfɔɛ ɔ nɛ o hla nɔ́ nɛ maa ye bua mo. Enɛ ɔ he ɔ, ke o ngɛ be nɛ o kɛ maa kase ní ɔ he blɔ nya toe ɔ, mo ha nɛ ní nɛ ɔmɛ nɛ hi o juɛmi mi. Ke be nɛ o to kaa o kɛ maa kase ní ɔ su, se o bua jɔɛ he kaa o maa kase ɔ, o ma nyɛ maa ngɔ hɛngmɛfia 10 pɛ kɛ kase ní ɔ. Ke o ngɔ be kpiti pɛ kɛ kase ní po ɔ, o ma nyɛ ma pue o yi mi tɛ ngɛ níhi fuu a he pe nɛ o be ní kasee kulaa. Ke o je sisi jã a, eko ɔ, lɔ ɔ ma ha nɛ o bua maa jɔ he kaa o kɛ be fuu maa kase ní ɔ.—Filip. 2:13.
Mo hla munyuyi nɛ o maa kase ɔ kɛ sɛ hlami. Ke e su be nɛ o maa kase ní loko o ngɛ nɔ́ nɛ o maa kase ɔ he susue ɔ, lɔ ɔ ma ha nɛ eko ɔ, o kɛ o be ɔ ‘be ní tsue ngɛ blɔ nɛ hi pe kulaa nɔ.’ (Efe. 5:16) Moo bɔ mɔde kaa o maa ngma munyu loo munyuyi nɛ o maa suɔ nɛ o kase ɔ kɛ fɔ si. Kaa nɔ hyɛmi nɔ́ ɔ, be fɛɛ be nɛ sane bimi ko maa ba o juɛmi mi ɔ, ngmaa kɛ fɔ si. Jehanɛ hu ɔ, be fɛɛ be nɛ o maa kase ní ta a, o ma nyɛ maa ngma ní kpahi kɛ piɛɛ níhi nɛ o ngma kɛ fɔ si momo kaa o ma kase ɔ he.
Koo pee kpɛii. E he hia wawɛɛ kaa o maa kase ní daa o tsi. Enɛ ɔ he ɔ, bɔ nɛ pee nɛ o nyɛ nɛ o pee jã a, o ma nyɛ ma tsake ligbi kɛ be nɛ o kɛ kaseɔ ní ɔ. O ma nyɛ ma tsake be abɔ nɛ o kɛ kaseɔ ní ɔ, kɛ nɔ́ nɛ o kaseɔ ɔ mi.
Ke wa kaseɔ ní be fɛɛ be ɔ, wa náa he se wawɛɛ nitsɛ. Wa hɛɛ kɛ suɔ Yehowa he, wa baa wa je mi saminya, nɛ wa si himi hu peeɔ kpakpa.—Yosh. 1:8