Nine Fɔmi Womi Gbami Nɛ Woɔ Yibli
Ke e piɛ otsi etɛ nɛ a maa pee a kpe ɔ, asafohi maa gba nine fɔmi womi ɔ ekohu kɛ fɔ nihi nɛ a ngɛ munyu ɔ he bua jɔmi ngɛ zugba kpɔ ɔ mi ɔ nine nɛ a ya kpe ɔ. Yi mi tomi kpakpa heje nɛ daa jeha a wa gbaa nine fɔmi womi ɔ nɛ. Ke nihi nɛ a kplɛɛ nine fɔmi ɔ nɔ ɔ ba kpe ɔ, a bua jɔɔ Ngmami ɔ mi munyuhi nɛ a tuɔ, bɔnɛ a to nítsumihi a he blɔ nɔ nɛ nihi nɛ a ngɔ a he kɛ ha lɛ a tsuɔ a he ní, wa jemiba kpakpa kɛ kake peemi ngɛ wa kpɛti ɔ he. (La 110:3; 133:1; Yes. 65:13, 14) Se anɛ nine fɔmi womi ɔ nɛ wa gbaa a woɔ yibli, titli ɔ ngɛ hehi nɛ nihi nɛ a ngɛ munyu ɔ he bua jɔmi ɔ hiaa blɔ gagaa kɛ yaa kpe ɔ lo?
Benɛ a gbe 2011 kpe ngua a nya a, yo ko nɛ e na nine fɔmi womi ɔ ngɛ e sinya a sisi ɔ ngma womi kɛ mane asafo ɔ nítsumi he kɔni ɔ. Behi fuu ɔ, ke Yehowa Odasefoli ba si e sinya a, e ya laa e he. E ngma ke: “I ngɛ we fini, nɛ i ngɛ huno kpakpa, nɛ i susu kaa i ngɛ nɔ́ tsuaa nɔ́ nɛ ma ha ma ná bua jɔmi. Se aywilɛho sane ji kaa I be bua jɔmi, nɛ I be yi mi tomi ko ngɛ si himi mi. Enɛ ɔ he ɔ, I pee juɛmi kaa ma hɛɛ lɔle kɛ hia blɔ si tomi 200 kɛ ya kpe ɔ Hɔ ɔ.” E bua jɔ kpe ɔ he saminya nɛ enɛ ɔ ha nɛ e tsɛ e huno ɔ nɛ e de lɛ kaa e maa hwɔ konɛ e ya kpe ɔ Hɔgba hulɔ. “I bu munyu ɔmɛ tsuo tue, i kɛ Yehowa Odasefoli fuu kpe, nɛ i pee ye juɛmi kaa enɛ ɔ be nyagbe pee.” Benɛ e kpale kɛ ya we mi ɔ, e je nikasemi sisi nɛ ngɛ nyɔhiɔ eywiɛ se ɔ, e pee fiɛɛlɔ nɛ kpaako a maa baptisi lɛ. “I bua jɔ wawɛɛ kaa i na jamɛ a nine fɔmi womi ɔ ngɛ ye sinya a sisi ejakaa amlɔ nɛ ɔ, i ngɛ yi mi tomi nitsɛ ngɛ si himi mi!”
Nihi nɛ wa ha mɛ nine fɔmi womi ɔ a ti ni komɛ maa ya kpe ɔ. Enɛ ɔ he ɔ, mo gba nine fɔmi womi ɔ kɛ kã. Moo ngɔ nine fɔmi womi nɛ maa piɛ ɔ tsuo kɛ ya ma nɛ a maa pee kpe ɔ ngɛ mi ɔ mi nɛ o kɛ ye odase be mi nɛ o be fiɛɛmi mi.
[Daka ngɛ bafa 5]
Mɛni Blɔ Nɔ Wa Maa Gu Kɛ Gba Nine Fɔmi Womi ɔ?
Bɔnɛ pee nɛ wa nyɛ nɛ wa gba nine fɔmi womi ɔ ngɛ wa zugba kpɔ ɔ tsuo mi ɔ, e sa nɛ waa po wa munyu ɔ kpiti. Wa ma nyɛ ma de nɔ́ ko kaa kikɛ nɛ ɔ: “I kpa mo pɛɛ, wa ngɛ nine fɔmi womi nɛ ɔ gbae kɛ ngɛ nihi tsuo ngɛ je kɛ wɛ ɔ hae. O nɔ́ ji nɛ ɔ nɛ. A tsɔɔ níhi a mi fitsofitso ngɛ mi.” O kɛ gɛjɛmi nɛ gba nine fɔmi womi ɔ. Ke wa ngɛ nine fɔmi womi ɔ gbae Hɔ loo Hɔgba a, e sa nɛ wa ha womi tɛtlɛɛ ɔmɛ eko ngɛ be nɛ sa mi.