Anɛ O Kɛ Kã Maa Fɔ Nihi Nine Lo?

1. Mɛni be nɛ wa maa je kpokpa nɔ kpe ɔ he nine fɔmi womi ɔ gbami sisi?

¹ Ke o ngɛ niye ní ngɔngɔɛ ko nɛ o ma puɛ be, kɛ sika fuu kɛ hoo he blɔ nya toe kɛ ha o weku li loo o huɛmɛ ɔ, atsinyɛ jemi ko be he kaa o kɛ bua jɔmi lɛ maa fɔ mɛ nine. Jã a kɛ̃ nɛ a ngɛ dengme gboe kɛ ngɛ mumi mi niye ní nɛ a ma ha wɔ ngɛ jeha nɛ ɔ kpokpa nɔ kpe ɔ sisi ɔ dlae. Ke e piɛ otsi etɛ nɛ wa maa ya kpe ɔ, Yehowa ma ha wɔ he blɔ konɛ waa fɔ nihi nine konɛ a ya kpe ɔ eko. Mɛni maa ye bua wɔ konɛ wa nyɛ nɛ waa pee jã?

2. Mɛni maa ye bua wɔ konɛ waa ngɔ wa he kɛ wo nine fɔmi womi ɔ gbami mi wawɛɛ?

² Ke wa susu bɔ nɛ wa náa blɔ tsɔɔmihi nɛ Yehowa kɛ haa wɔ ngɛ kpe nɛ ɔmɛ a sisi ɔ he se ɔ he ɔ, lɔ ɔ maa wo wɔ kã nɛ waa kɛ bua jɔmi maa fɔ nihi nine. (Yes. 65:13, 14) E sa nɛ wa kai hu kaa nihi nɛ wa fɔɔ mɛ nine daa jeha a woɔ yiblii. (Hyɛ daka nɛ ji, “E Woɔ Yiblii.”) Nihi nɛ wa maa fɔ mɛ nine ɔ a kpɛti ni komɛ maa ba kpe ɔ, nɛ ni komɛ hu a be bae. Se ke nihi fuu maa ba jio, a be bae jio ɔ, nine nɛ wa maa fɔ mɛ ɔ kɛ yi jemi ma ha Yehowa, nɛ e maa tsɔɔ kaa e mi mi hi.—La 145:3, 7; Kpoj. 22:17.

3. Mɛni blɔ nɔ wa maa gu kɛ gba nine fɔmi womi ɔ?

³ E sa kaa nikɔtɔmahi a kuu ɔ nɛ susu bɔ nɛ fiɛɛli maa pee ha kɛ gba nine fɔmi womi ɔ fuu ɔ he. Kaa nɔ hyɛmi nɔ́ ɔ, a ma nyɛ maa hyɛ ke ji kaa e maa hi nɛ fiɛɛli nɛ a ngɔ nine fɔmi womi ɔ eko kɛ wo nihi nɛ a be we mi ɔ a sinyahi a sisi aloo a ma gba nine fɔmi womi ɔ ngɛ ma nɔ ngɛ a zugba kpɔ ɔ mi. Ke wa ngɛ womi ɔ gbae ngɛ Hɔ kɛ Hɔgba nɔ nɛ e maa hi ɔ, wa ma nyɛ maa ngɔ nine fɔmi womi ɔ kɛ piɛɛ womi tɛtlɛɛ ɔmɛ a he kɛ ha. Ke nine fɔmi womi ɔ gbami ba nyagbe ɔ, hyɛ bɔ nɛ wa bua maa jɔ ha kaa wa fɔ nihi babauu nine kaa a ba piɛɛ wa he kɛ ye mumi mi niye ní nɛ Yehowa to he blɔ nya kɛ ha wɔ ɔ!

E Woɔ Yiblii

Benɛ nyɛmiyo ko ngɛ nine fɔmi womihi gbae jeha komɛ nɛ be ɔ, e susu kaa eko ɔ, nihi be kpe ɔ yae. E de ngɛ e yi mi ke, ‘Anɛ ni ɔmɛ maa ba kpe ɔ po lɛɛ?’ Hɔ mɔtu benɛ e ya su kpe ɔ sisi ɔ, e na niheyo ko nɛ e ji Sikh nɛ ji India bi a jami ko mi no ngɛ kpe ɔ sisi. E nga lɛ nɛ e kɛ lɛ sɛɛ ní bɔɔ. Niheyo ɔ tsɔɔ kaa a ha lɛ nine fɔmi womi ɔ eko, nɛ lɔ ɔ he je nɛ e ba kpe ɔ nɛ. Niheyo ɔ bi sanehi fuu nɛ nyɛmiyo ɔ ha lɛ heto. E tsɔɔ kaa e bua jɔ kpe ɔ he, nɛ e bua jɔ bɔ nɛ nyɛmimɛ ɔmɛ dla a he ha, kɛ bɔ nɛ a pee a ní ha a he wawɛɛ. Jamɛ a ligbi ɔ nɔuu ɔ, nyɛmiyo ɔ kɛ nyumu ko kɛ e yo nɛ a hi si ngɛ e kasa nya hu sɛɛ ní. Mɛ hu a tsɔɔ kaa nɔ ko lɛ fɔ mɛ nine kɛ ba kpe ɔ. Nyumu ɔ kɛ e yo ɔ a bua jɔ níhi nɛ ya nɔ ngɛ kpe ɔ sisi ɔ he wawɛɛ nɛ a to kaa a maa ba kpe ɔ Hɔgba hulɔ. Enɛ ɔ ha nɛ nyɛmiyo ɔ na kaa se nami ngɛ nine fɔmi womihi nɛ wa gbaa daa jeha a he.
Ngɛ kpokpa nɔ kpe ɔ eko nɛ wa pee lingmi nɛ ɔ sisi ɔ, nyɛminyumu ko kɛ e yo nɛ a ji blɔ gbali kɛ nyumu nɔkɔtɔma ko kɛ e yo sɛɛ ní ngɛ kpe ɔ sisi. Nyumu ɔ kɛ e yo ɔ tsɔɔ kaa a kekleekle kpe nɛ a ya ji lɔ ɔ nɛ. Blɔ gbali ɔmɛ bi mɛ ke: “Mɛnɔ lɛ fɔ nyɛ nine?” A he nɔ ke: “Ligbi ko benɛ wa ba we mi ɔ, wa ba na nine fɔmi womi ɔ nɛ hɔɔ si ngɛ wa sinya a sisi.” A kane womi ɔ, nɛ a ngma ngɛ blɔ he nɛ ngɛ nine fɔmi womi ɔ se ɔ nɔ kaa a suɔ nɛ nɔ ko kɛ mɛ nɛ ba kase Baiblo ɔ. Nyɛmimɛ ɔmɛ ekomɛ ha mɛ niye ní benɛ a kpa mɔtu kpe ɔ. Nyumu ɔ kɛ e yo ɔ a bua jɔ kpe ɔ he saminya, lɔ ɔ he ɔ, a ma nya si kaa a maa kpale kɛ ba e nɔ jena a hulɔ. Nyɛmimɛ ɔmɛ a to blɔ nya konɛ a ya slaa mɛ nɛ a ye bua mɛ.