Mɛnɔmɛ Nɛ A Bua Maa Jɔ Enɛ ɔ He?
1. Ke wa kane Hwɔɔmi Mɔ ɔ loo Awake! ɔ, mɛni he e sa nɛ wa susu, nɛ mɛni heje?
1 A pee Hwɔɔmi Mɔ ɔ kɛ Awake! womi tɛtlɛɛ ɔmɛ konɛ a ye bua nihi ngɛ je kɛ wɛ. Enɛ ɔ he ɔ, a sɛsɛɔ sane slɔɔtohi a he ngɛ a mi. Ke wa ngɛ a mi munyu ɔmɛ kanee ɔ, e sa nɛ wa susu nihi nɛ a bua maa jɔ he ɔ a he, konɛ waa bɔ mɔde nɛ waa ngɔ kɛ ya ha mɛ.
2. Mɛni munyu komɛ nɛ a jeɔ kpo ngɛ wa womi tɛtlɛɛ ɔmɛ a mi nɛ nihi a bua ma nyɛ maa jɔ a he?
2 Anɛ Hwɔɔmi Mɔ ɔ nɛ ba lingmi nɛ ɔ tu Baiblo ɔ mi munyu ko nɛ o kɛ nɔ ko nɛ ngɛ o nítsumi he ɔ sɛɛ he ní be ko nɛ be ɔ lo? Anɛ weku si himi he munyu ngɛ mi nɛ e ma nyɛ maa ye bua o wekuno ko lo? Anɛ o le nɔ ko nɛ e ngɛ blɔ nya toe kaa e maa hia blɔ kɛ ya ma ko nɛ a ngma e he sane ngɛ Awake! ɔ mi ɔ nɔ lo? Anɛ amlaalo nítsumi he komɛ ngɛ o zugba kpɔ ɔ mi nɛ a bua maa jɔ womi tɛtlɛɛ ɔ eko he lo? Kaa nɔ hyɛmi nɔ́ ɔ, nihi nɛ a tsuɔ ní ngɛ hiɔ tsami hehi a bua maa jɔ womi tɛtlɛɛ nɛ tu nɔmlɔ tso mi he wami nami he munyu he wawɛɛ. Nihi nɛ a tsuɔ ní ngɛ nítsumi hehi nɛ woɔ mlaa mi he wami hu a bua ma nyɛ maa jɔ womi tɛtlɛɛ nɛ tu awi yemi he munyu ɔ he.
3. Mo de níhi a si kpami ko nɛ tsɔɔ se nami nɛ ngɛ he kaa waa kɛ womi tɛtlɛɛ pɔtɛɛ komɛ ma ha nihi nɛ wa susu kaa a bua maa jɔ he ɔ.
3 Nɔ́ Nɛ Je Mi Kɛ Ba: Benɛ nyumu ko kɛ e yo nɛ a ngɛ South Africa nine su October 2011 Awake! nɛ e tu “How to Raise Responsible Children,” (Bɔnɛ O Ma Tsɔse Bimɛ Saminya Ha) a he munyu ɔ nɔ ɔ, a tsɛ sukuuhi 25 ngɛ a zugba kpɔ ɔ mi ɔ ngɛ tɛlifoo nɔ. Sukuu 22 kplɛɛ womi ɔ nɔ nɛ a gba kɛ ha a sukuubi ɔmɛ. Nyɛmi nyumu kpa kɛ e yo nɛ mɛ hu a ngɛ jamɛ a ma a mi ɔ ná juɛmi nɛ ɔ nɔuu nɛ a ya ha sukuuhi nɛ ngɛ a zugba kpɔ ɔ mi ɔ womi ɔ eko. Sukuu nɛ ɔmɛ a kpɛti kake pee juɛmi po kaa e maa ngɔ womi tɛtlɛɛ ɔ kɛ tsɔɔ e sukuubi ɔmɛ ní kanemi nɛ́ jahanɛ se hu e kɛ tsɔɔ ni hehi nɛ a ba sukuu ɔ ní. Benɛ kpokpa nɔ hyɛlɔ ko nu a níhi a si kpami ɔ, e wo asafohi nɛ a ngɛ e kpokpa a mi ɔ he wami konɛ a fiɛɛ ngɛ sukuuhi nɛ ngɛ a zugba kpɔ ɔmɛ a mi ɔ. Asafo ɔ nítsumi he kɔni ɔ nine su womi nɔ kaa nihi fuu ngɛ womi tɛtlɛɛ ɔ eko hlae, lɔɔ he ɔ a kpale fia womi tɛtlɛɛ nɛ ɔ eko kɛ piɛɛ he!
4. Mɛni heje nɛ wa suɔ kaa wa gba womi tɛtlɛɛ ɔmɛ kɛ ha nihi babauu ɔ?
4 A sɛsɛɔ bɔnɛ níhi nɛ a ngɛ nɔ yae ngɛ je ɔ mi mwɔnɛ ɔ tsɔɔ tutuutu ha a he nɛ a gblaa juɛmi kɛ baa Mawu Matsɛ Yemi ɔ nɔ. Womi tɛtlɛɛ nɛ ɔmɛ pɛ ji womihi nɛ a “fiɛɛɔ yi wami hemi” he sane ngɛ zugba a nɔ. (Yes. 52:7, NW) Lɔɔ he ɔ, wa suɔ nɛ wa gba kɛ ha nihi babauu. Blɔ kpakpa nɛ wa ma nyɛ maa gu nɔ kɛ pee jã ji kaa wa ma susu sane bimi nɛ ji, ‘Mɛnɔmɛ nɛ a bua maa jɔ enɛ ɔ he?’ ɔ he.