Munyuhi Nɛ Maa Ye Bua Wɔ Ngɛ Wa Fiɛɛmi Nítsumi ɔ Mi
1. Mɛni yi mi tomi enyɔ heje nɛ a ngma munyu nɛ e yi ji, “A Conversation With a Neighbor” (Wetsɛ Ko Kɛ Ní Sɛɛmi) nɛ ngɛ Blɛfo gbi Hwɔɔmi Mɔ nɛ a pee ha mabi ɔ mi ɔ?
1 Ngɛ be komɛ a mi ɔ, a ngmaa munyu nɛ e yi ji, “A Conversation With a Neighbor” (Wetsɛ Ko Kɛ Ní Sɛɛmi) ngɛ Blɛfo gbi Hwɔɔmi Mɔ nɛ a pee ha mabi ɔ mi. A ngma munyu nɛ ɔ ngɛ yi mi tomi enyɔ ko heje. Kekleekle ɔ, e tsɔɔ Baiblo ɔ mi ngɛ blɔ nɛ nihi a bua maa jɔ he nɔ, nɛ jehanɛ hu, e tsɔɔ wɔ ga blɔ nɛ wa ma nyɛ maa gu nɔ konɛ waa kɛ nihi nɛ susu Baiblo mi munyuyi komɛ a he. (1 Pet. 3:15) Mɛni blɔ nɔ wa maa gu konɛ waa ngɔ munyu nɛ ɔmɛ kɛ tsu ní saminya?
2. Mɛni blɔ nɔ wa ma nyɛ maa ngɔ munyu nɛ ɔmɛ kɛ tsu ní ngɛ wa fiɛɛmi nítsumi ɔ mi?
2 Mo Kɛ Tsu Ní Ngɛ Fiɛɛmi Mi: O ma nyɛ maa ngɔ Hwɔɔmi Mɔ nɛ munyu nɛ ɔ eko ngɛ mi ɔ kɛ to. Ke wetsɛ ko, loo nɔ ko nɛ ngɛ munyu ɔ he bua jɔmi, loo Baiblo mi níkaselɔ ko bi sane ko nɛ a ha heto ngɛ Hwɔɔmi Mɔ ɔ eko mi ɔ, mo ha lɛ jamɛ a womi tɛtlɛɛ ɔ kake konɛ o kɛ lɛ nɛ susu he. Ke o be womi tɛtlɛɛ ɔ nɛ ha sane bimi ɔ heto ɔ eko ɔ, o ma nyɛ maa gbla ngɛ wa Internet nítsumi he ɔ nɔ ngɛ jw.org.
3. Mɛni blɔ nɔ wa ma nyɛ nɛ waa kɛ wetsɛ ko nɛ sɛɛ womi tɛtlɛɛ ɔ mi munyu ɔ eko he ní?
3 Mɛni blɔ nɔ o ma nyɛ maa gu nɛ o kɛ nɔ ko nɛ susu munyu nɛ ɔmɛ eko he? Nɔ́ nɛ fiɛɛli komɛ peeɔ ji, a haa nɛ nɔ ɔ kaneɔ wetsɛ ɔ munyu ɔmɛ, nɛ fiɛɛlɔ ɔ hu kaneɔ Odasefono ɔ munyu ɔmɛ. Ní sɛɛmi nɛ a ngma ngɛ womi ɔ mi nɛ a kɛ wetsɛ ko maa kane ɔ nuɔ tso ejakaa e haa nɛ wetsɛ ɔ hlaa wa hemi kɛ yemihi a mi ngɛ blɔ nɛ yi nɔ.—5 Mose 32:2.
4. Mɛni blɔ nɔ wa ma nyɛ maa ngɔ womi tɛtlɛɛ ɔ mi munyu nɛ ɔ kɛ tsɔse wa he ngɛ?
4 Mo Tsɔse O He Kɛ Ni Kpahi Hulɔ: Ke o ngɛ munyu nɛ ɔmɛ kanee ɔ, moo to bɔnɛ a kɛ ngmamihi kɛ nɔ́ he tomi níhi tsu ní ha, kɛ bɔnɛ a kɛ nɔ ɔ susu níhi a he ha a he hɛ. Mo kadi munyuhi nɛ a kɛ tsu ní ngɛ ní sɛɛmi ɔ mi ɔ. Lɔɔ se ɔ, mo kɛ tsu ní ngɛ fiɛɛmi mi. (Abɛ 1:5; 9:9) Nyɛmiyo ko de ke, “Ke i ngɛ munyu nɛ ɔmɛ kanee ɔ, e ngɛ kaa nɔ́ nɛ i kɛ blɔ gbalɔ ko nɛ e ‘he be’ nɛ e le nɔ́ tutuutu nɛ e ma de be tsuaa be ɔ ya fiɛɛmi, nɛ i ngɛ ní kasee ngɛ e ngɔ!”
5. Mɛni blɔ nɔ wa ma nyɛ maa ye bua wa Baiblo mi nikaseli konɛ a dla a he kɛ ha fiɛɛmi nítsumi ɔ?
5 O ma nyɛ maa ngɔ ní sɛɛmi he nɔ́ hyɛmi níhi nɛ a ngma nɛ ɔmɛ kɛ ye bua o Baiblo mi nikaseli hulɔ konɛ a dla a he kɛ ha fiɛɛmi nítsumi ɔ. Nyɛ bla kɛ kane munyu ɔ, nɛ́ o ha nɛ Baiblo mi nikaselɔ ɔ nɛ e pee fiɛɛlɔ nɛ ngɛ munyu nɛ a ngma a mi ɔ. Kɛ gu blɔ nɛ ɔ nɔ ɔ, Baiblo mi nikaseli ma nyɛ maa kase bɔnɛ a ma plɛ kɛ tsɔɔ a hemi kɛ yemi ɔ nya ha ngɛ ga blɔ nɔ. (Kol. 4:6) Ngɛ anɔkuale mi ɔ, munyu nɛ ɔmɛ nɛ a ngmaa ngɛ Hwɔɔmi Mɔ ɔ mi ɔ ji blɔhi nɛ Yehowa guu nɔ kɛ yeɔ bua wɔ konɛ waa ‘gbe wa sɔmɔmi nítsumi ɔ nya’ a a kpɛti kake.—2 Tim. 4:5.