Munyu Ehehi Nɛ Waa Kɛ Maa Je Baiblo Mi Nikasemi Sisi
1. Mɛni munyu hehi lɛ a ma bɔni ngmami ngɛ Watchtower nɛ a pee kɛ ha mabi ɔ mi, nɛ a ngma konɛ wa kɛ pee mɛni?
1 Kɛ je nyɔhiɔ nɛ maa ba a nɔ kɛ yaa a, a ma bɔni munyu ehe komɛ ngmami ngɛ Watchtower nɛ a pee kɛ ha mabi ɔ mi nɛ́ maa ye bua wɔ konɛ waa kɛ nihi nɛ je Baiblo mi nikasemi sisi. Munyu ɔ yi ji, “Learn From God’s Word.” E ngɛ mi kaa ngɛ wa zugba kpɔ ɔmɛ a mi ɔ, ni komɛ a bua maa jɔ kaa a maa kane munyu nɛ ɔmɛ eko tsuaa eko nɛ maa ba a mohu lɛɛ, se a ngma munyu nɛ ɔmɛ konɛ waa kɛ nihi nɛ susu he.
2. Mɛni ji ní komɛ nɛ ngɛ munyu ehehi nɛ a ma bɔni ngmami ngɛ Watchtower nɛ a pee kɛ ha mabi ɔ mi ɔ mi?
2 Níhi Nɛ Ngɛ Mi: A ngma munyuyi ɔmɛ kɛ munyuyi nyafinyafi ɔmɛ kaa sanehi nɛ wa ma bi wetsɛ ɔ ke waa kɛ lɛ ngɛ ní sɛɛe. Bɔnɛ pee nɛ wetsɛ ɔ nɛ e na kaa Mawu Munyu ɔ lɛ e ngɛ kasee tɛ̃ɛ heje ɔ, a tsɛ ngmami titli ɔmɛ a se kɛkɛ, se a ngmɛ́ a mi munyu ɔmɛ. A ngma kuku ɔmɛ kpitikpiti bɔnɛ pee nɛ a nyɛ nɛ a kɛ wetsɛ ɔ nɛ kase ngɛ e sinya a nya. Munyu ɔ eko tsuaa eko tu Baiblo Tsɔɔmi womi ɔ he munyu konɛ ke e maa hi ɔ, o nyɛ nɛ o kɛ wetsɛ ɔ nɛ tsa nikasemi ɔ nɔ ngɛ mi.
3. Ke wa ngɛ fiɛɛe ngɛ wehi a mi ɔ, kɛ wa ma plɛ kɛ da Watchtower a mi munyu ehe ɔmɛ a nɔ kɛ je Baiblo mi nikasemi sisi ngɛ nihi a sinyahi a nya ha kɛɛ?
3 Bɔnɛ Waa Kɛ Ma Tsu Ní Ha: Ke o ngɛ nɔ ko womi tɛtlɛɛ ɔmɛ hae ɔ, o ma nyɛ ma bi lɛ sane ko nɛ kɔɔ munyuyi nɛ ngɛ womi ɔ mi ɔ he. Kaa nɔ hyɛmi nɔ́ ɔ, January 1 Watchtower a tu se nami nɛ ngɛ Baiblo ɔ he ɔ he munyu. O ma nyɛ ma bi wetsɛ ɔ ke: “Anɛ o buɔ Baiblo ɔ kaa e ji Mawu Munyu aloo o buɔ lɛ kaa e ji womi kpakpa ko kɛkɛ? [Ngmɛɛ lɛ blɔ nɛ e ha heto.] Moo hyɛ bua jɔmi munyu ko nɛ womi nɛ ɔ nɛ i hɛɛ ɔ tu kɛ kɔ Baiblo ɔ he.” Moo tsɔɔ lɛ kekleekle sane bimi ɔ, nɛ o kane kekleekle kuku ɔ kɛ ngmami ɔmɛ nɛ a tsɛ se ɔ. Moo kane sane bimi ɔ ekohu, nɛ o bi wetsɛ ɔ nɛ e de mo bɔnɛ e susu ngɛ he ha. Ke e maa hi ɔ, o kɛ lɛ nɛ susu sane bimihi nɛ a to a nya a fuu he. Loko o ma si lɛ ɔ, moo tsɔɔ lɛ sane bimi nɛ nyɛɛ se ɔ nɛ o to blɔ nya nɛ o ya slaa lɛ, konɛ ke o ya a, o kɛ lɛ nɛ susu jamɛ a sane bimi ɔ he. Moo kpale ya slaa lɛ daa otsi nɛ o kɛ lɛ nɛ susu sane bimi ɔmɛ nɛ piɛ ɔ a he kɛ ya si benɛ Watchtower a ekpa maa ba nɛ o ma ya ha lɛ. Ngɛ enɛ ɔ se hu ɔ, o ma nyɛ ma de wetsɛ ɔ tɛ̃ɛ kaa o suɔ nɛ o kɛ lɛ maa kase Baiblo ɔ. Lɔɔ se ɔ, moo ngɔ munyu nɛ ngɛ Watchtower a mi ɔ kɛ tsɔɔ lɛ bɔnɛ wa plɛɔ nɛ waa kɛ nihi kaseɔ Baiblo ɔ ha.
4. Kɛ wa ma plɛ kɛ ngɔ munyu ehehi nɛ a ngɛ Watchtower a mi ɔ kɛ tsu ní ha kɛɛ ke wa kpale kɛ ya slaa nihi?
4 O ma nyɛ maa ngɔ Watchtower a mi munyu ehe ɔmɛ kɛ tsu ní saminya kɛ ye bua nihi nɛ o haa mɛ womi tɛtlɛɛ ɔmɛ kɛ nihi nɛ o ya slaa mɛ ɔ hulɔ. O ma nyɛ ma de kɛkɛ ke: “A ngma munyu ehe ko ngɛ Watchtower a mi. Ma suɔ nɛ ma tsɔɔ mo bɔnɛ o kɛ ma tsu ní ha.” Wa ngɛ sɔlee konɛ munyu ehe nɛ ɔmɛ nɛ ye bua nimli fuu konɛ mɛ hu ‘a ba le anɔkuale ɔ.’—1 Tim. 2:4.