Wa He Nɛ Maa Be Ngɛ Fiɛɛmi Ní Tsumi ɔ Mi—Mo Susu Nihi A He

Nɔ́ He Je Nɛ E He Hia: Yesu susu nihi a he, nɛ e pee we níhi nɛ maa hao mɛ. Kaa nɔ hyɛmi nɔ́ ɔ, a ngɔ nyumu ko nɛ e tue nui nɔ́ kɛ ba Yesu ngɔ konɛ e tsa lɛ, se benɛ Yesu na kaa zo ngɛ nyumu ɔ pee ɔ, e kɛ lɛ je ni ɔmɛ a kpɛti kɛ ya he ko banee, nɛ e ya tsa lɛ. (Mar. 7:31-35) E susu e kaseli ɔmɛ a he, nɛ e de we mɛ níhi fuu ejakaa e le kaa a be nyɛe maa pɛtɛ lɛ tsuo he. (Yoh. 16:12) E ngɛ mi kaa Yesu ngɛ hiɔwe mohu lɛɛ, se e yaa nɔ nɛ e susuɔ adesahi a he. (2 Tim. 4:17) Akɛnɛ wa ji Kristo se nyɛɛli he je ɔ, wa suɔ nɛ waa kase lɛ. (1 Pet. 2:21; 1 Yoh. 3:16, 18) Ke wa susu wetsɛ ɔ he, nɛ wa yɔse níhi nɛ e bua jɔ he, kɛ níhi nɛ haoɔ lɛ ɔ, wa fiɛɛmi ní tsumi ɔ maa wo yiblii babauu. Ke nɔ ɔ na kaa e he hia wɔ pe wa womi ɔmɛ loo sɛ gbi nɛ waa kɛ ma lɛ hami ɔ, lɔ ɔ ma ha nɛ e maa suɔ kaa e maa bu wɔ tue.