Anɛ O Ngɛ Audio Bible ɔ He Se Náe Lo?

Mɛni ji audio Bible ɔ? Audio Bible ɔ ji New World Translation Baiblo ɔ nɛ a tsɔɔ sisi ngɛ 2013 ɔ nɛ a kane kɛ fɔ klama nɔ. A ngɛ Audio Bible nɛ ɔ kpo jee bɔɔbɔɔbɔɔ ngɛ gbihi fuu a mi. Nɔ́ kake nɛ sa kadimi ngɛ audio Bible ɔ he ji kaa, a kɛ gbi slɔɔtoslɔɔtohi tsu ní kɛ da si ha nihi nɛ a tu a he munyu ngɛ Baiblo ɔ mi ɔ. A kɛ he numi kaneɔ munyu ɔmɛ nɛ a maa otihi nɛ a ngɛ mi ɔ nɔ mi konɛ e kɛ si fɔfɔɛhi nɛ a ngɛ a he munyu tue ɔ nɛ kɔ.

Kɛ ni komɛ ngɛ audio Bible ɔ he se náe ha kɛɛ? Nihi babauu nɛ a pɔɔ audio Bible ɔ tue bumi ɔ bua jɔ he wawɛɛ, ejakaa e haa nɛ a naa Mawu Munyu ɔ kaa nɔ́ nɛ ngɛ nitsɛnitsɛ. Nɛ ke a nu nɛ nimli slɔɔtoslɔɔtohi ngɛ Baiblo ɔ kanee ɔ, e haa nɛ a nyɛɔ poɔ níhi nɛ ya nɔ ngɛ Baiblo ɔ mi ɔ he foni, nɛ jehanɛ se hu a nuɔ nɔ́ nɛ a ngmaa sisi saminya. (Abɛ 4:5) Nihi babauu hu ba yɔse kaa ke a hao nɛ a bu audio Bible ɔ tue ɔ, e haa nɛ a tsui nɔɔ a mi.​—La 94:19.

Ke a kane Mawu Munyu ɔ nɛ wa nu ɔ, e náa wa si himi nɔ he wami wawɛɛ nitsɛ. (2Kron 34:19-21) Ke a pee audio Bible ɔ fã ko aloo mluku ɔ tsuo ngɛ gbi nɛ o tuɔ ɔ mi ɔ, anɛ o kɛ ma nyɛ maa pee oti ngɛ o si himi mi kaa o maa bu tue be fɛɛ be lo?

NYƐƐ HYƐ VIDEO NƐ JI, BƆ NƐ A PEE AUDIO BIBLE Ɔ HA​—FÃ KO. LƆ Ɔ SE Ɔ, NYƐ HA SANE BIMI NƐ NYƐƐ SE NƐ Ɔ HETO:

Mɛni lɛ o bua jɔ he ngɛ bɔ nɛ a pee audio Bible ɔ haa a he?