Suɔmi woɔ wɔ he wami nɛ wa susuɔ ni kpahi a hiami níhi a he kekle
Nɔ́ Nɛ Wa Maa Pee Kɛ Je Suɔmi Kpo Kɛ Tsɔɔ Wa Nyɛmi Nɔmlɔ
Akɛnɛ Adam sisi bimɛ ji wɔ tsuo he je ɔ, wɔ tsuo wa ji weku kake mi bimɛ. E ngɛ mi kaa a hyɛɛ blɔ kaa nihi nɛ a ngɛ weku mi ɔ ma je suɔmi kɛ bumi kpo kɛ tsɔɔ a sibi mohu lɛɛ, se mwɔnɛ ɔ, e he wa kaa o maa na jamɛ a suɔmi ɔ ngɛ weku mi bimɛ a kpɛti. Wa Mawu nɛ ngɛ suɔmi ɔ sume kaa níhi nɛ ya nɔ jã.
NƆ́ NƐ NGMAMI KLƆUKLƆU ƆMƐ DE NGƐ SUƆMI HE
“Moo suɔ o nyɛmi nɔmlɔ kaa bɔ nɛ o suɔ mo nitsɛ o he ɔ.”—3 MOSE 19:18.
“Nyɛɛ ya nɔ nɛ nyɛɛ suɔ nyɛ he nyɛli.”—MATEO 5:44.
NƆ́ NƐ WA NYƐMI NƆMLƆ NƐ WA MAA SUƆ Ɔ TSƆƆ
Mo kadi bɔ nɛ Mawu kale suɔmi ha ngɛ e Munyu ɔ mi ngɛ 1 Korinto Bi 13:4-7:
“Suɔmi toɔ e tsui si, nɛ e mi mi hi.”
Mo susu he nɛ o hyɛ: Ke nihi to a tsui si ha mo nɛ a je mi mi jɔmi kpo kɛ tsɔɔ mo, nɛ a mi mi fu we mo ke o pee nɔ́ ko nɛ dɛ ɔ, kɛ o nuɔ he ha kɛɛ?
“Suɔmi ji hunga.”
Mo susu he nɛ o hyɛ: Ke nihi a yi mi tɛ̃ mɛ ngɛ o he aloo a jeɔ o he hunga a, kɛ o nuɔ he ha kɛɛ?
Suɔmi “fo we lɛ pɛ e nɔ́ mi.”
Mo susu he nɛ o hyɛ: Ke o je o juɛmi kpo nɛ nihi bu mo tue, nɛ a kɛ a susumihi nyɛ we o nɔ ɔ, kɛ o nuɔ he ha kɛɛ?
Suɔmi “kɛ tɔmi wui e mi.”
Mo susu he nɛ o hyɛ: Ke nihi tɔ̃ Mawu nɔ nɛ a tsake a tsui ɔ, e kɛ keɔ mɛ. “E hɛɛ we pɛ munyu kake mi kpamisa. Ke e mi mi fu ɔ, e kɛ we kulaa kɛkɛ e tsui he jɔ ekohu.” (La 103:9) Ke wa tɔ̃ nɔ ko nɔ nɛ e kɛ ke wɔ ɔ, wa bua jɔɔ wawɛɛ. Enɛ ɔ he ɔ, wɔ hu e sa kaa ke nihi tɔ̃ wa nɔ ɔ, wa kɛ ke mɛ.—La 86:5.
Suɔmi “nya we ngɛ nɔ́ nɛ dɛ he.”
Mo susu he nɛ o hyɛ: Ke amanehlu ko ba wa nɔ ɔ, wa sume nɛ nihi nɛ nya ngɛ nɔ́ nɛ ba wa nɔ ɔ he. Enɛ ɔ he ɔ, ke nihi ngɛ nɔ́ nae ɔ, wa nya we, ke a pee wɔ nɔ́ yayami po.
Loko wa ma ná Mawu dɛ mi jɔɔmi ɔ, e sa nɛ waa suɔ nɔ fɛɛ nɔ ko nɛ́ wa ko hyɛ jeha nɛ a ye, ma nɛ a je mi, aloo jami mi nɛ a ngɛ. Blɔ kake nɛ wa ma nyɛ maa gu nɔ kɛ je suɔmi kpo ji kaa, wa maa ye bua nihi nɛ e fĩ mɛ ɔ.