Wa He Nɛ Maa Be Ngɛ Fiɛɛmi Ní Tsumi ɔ Mi​—Bɔ Nɛ O Kɛ JW.ORG Ma Tsu Ní Ha

NƆ́ HE JE NƐ E HE HIA: Womihi nɛ a ngɛ wa Ní Tsɔɔmi Ní Ɔmɛ a mi ɔ tsuo gblaa nihi a juɛmi kɛ yaa jw.org ɔ nɔ. Ngɛ anɔkuale mi ɔ, yi mi tomi titli nɛ kɛ a pee jw.org kaadi ɔ, kɛ dɛ womi nɛ ji Jije Wa Maa Na Sane Bimihi Nɛ A He Hia Amɛ A Heto Ngɛ? ɔ ji kaa e tsɔɔ nihi blɔ kɛ ya wɛbsaiti ɔ nɔ. O ma nyɛ maa ngɔ wa Ní Tsɔɔmi Níhi nɛ ngɛ jw.org ɔ nɔ ɔ eko kɛ mane nɔ ko kɛ gu e-mail nɔ, aloo o ma nyɛ ma ha nɔ ɔ link konɛ e nyɛ nɛ e na womi ɔ loo video ɔ. Enɛ ɔ yeɔ bua wawɛɛ, titli ke o ngɛ fiɛɛe ha nɔ ko nɛ e tuɔ gbi kpa. Jehanɛ se hu nihi ma nyɛ ma bi wɔ sane komɛ nɛ a heto ɔmɛ be wa Ní Tsɔɔmi Ní Ɔmɛ a mi. Ke wa le wɛbsaiti ɔ kɛ ní tsumi saminya a, e ma ha wa he maa be ngɛ fiɛɛmi ní tsumi mi ɔ mi wawɛɛ.

BLƆ NƆ NƐ O MAA GU KƐ PEE:

• 

  Ngɔɔ “BAIBLO TSƆƆMIHI” blɔ he ɔ kɛ tsu ní. Ngɔɔ lɛ kaa o ngɛ fiɛɛe ha fɔlɔ ko, nɛ e suɔ nɛ e kase babauu kɛ kɔ bimɛ a tsɔsemi he. Yaa BAIBLO TSƆƆMIHI > GBA SI HIMI & WEKU SI HIMI.

• Ngɔɔ “BAIBLO KASEMI NÍHI” blɔ he ɔ kɛ tsu ní. Ngɔɔ lɛ kaa o ngɛ odase yee ngɛ sukuu be mi nɛ o be fiɛɛmi mi, nɛ o suɔ nɛ o tsɔɔ sukuu bi ɔ eko nɔ́ ko ngɛ Sanehi 10 Nɛ Nihewi Kɛ Yihewi Biɔ ɔ A Hetohi womiyo ɔ mi. Yaa BAIBLO KASEMI NÍHI > WOMIHI & WOMIYOHI.

• Ngɔɔ “WA HE SANEHI” blɔ he ɔ kɛ tsu ní. Ngɔɔ lɛ kaa o ngɛ nɔ ko nɛ o kɛ lɛ tsuɔ ní ɔ odase yee, nɛ e maa suɔ nɛ e kane mi tsɔɔmi kpiti nɛ a ha kɛ kɔ níhi nɛ wa heɔ yeɔ ɔmɛ a he. Yaa WA HE SANEHI > SANEHI NƐ NIHI PƆƆ BIMI.

HYƐ VIDEO NƐ JI BƆ NƐ O KƐ JW.ORG MA TSU NÍ HA, NƐ O HYƐ KAA JIJE O MAA YA NGƐ WƐBSAITI Ɔ NƆ KONƐ O NYƐ NƐ O YE BUA:

• nɔ ko nɛ he we yi kaa Mawu ngɛ

• nɔ ko nɛ haomi ba e nɔ lingmi nɛ ɔ pɛ

• nyɛminyumu loo nyɛmiyo ko nɛ e kpa fiɛɛmi yami

• nɔ ko nɛ o kpale ya slaa lɛ nɛ suɔ nɛ e le blɔ nɔ nɛ wa guɔ kɛ náa sika kɛ hyɛɔ wa fiɛɛmi ní tsumi ɔ nɔ

• nɔ ko nɛ e je ma se nɛ e suɔ nɛ e le he nɛ e maa ya Kristofohi a kpe ngɛ ke e kpale kɛ ya e ma a mi