Wa He Nɛ Maa Be Ngɛ Fiɛɛmi Ní Tsumi ɔ Mi​—Moo Fiɛɛ Ha Hɛ Yuyuili

NƆ́ HE JE NƐ E HE HIA: Nihi babauu nɛ a ji hɛ yuyuili ɔ bua jɔɛ kaa a kɛ nibwɔhi maa sɛɛ ní. Enɛ ɔ he ɔ, ja waa kɛ ga tsu ní wawɛɛ loko wa ma nyɛ maa ye mɛ odase. Yehowa susuɔ hɛ yuyuili a he wawɛɛ nitsɛ. (3Mo 19:14) Ke wa bɔ mɔde nɛ wa ye bua hɛ yuyuili konɛ a kase Yehowa he ní ɔ, lɔ ɔ tsɔɔ kaa wa ngɛ Yehowa kasee.

BƆ NƐ O MAA PEE LƐ HA:

• Mo “hla” hɛ yuyuili ɔmɛ a se blɔ. (Mat 10:11) Anɛ o le nɔ ko nɛ hɛ yuyuilɔ ko ngɛ e weku ɔ mi lo? Anɛ hɛ yuyuili a sukuu loo ní tsumi he ko ngɛ o zugba kpɔ ɔ mi nɛ a yeɔ bua nihi nɛ a hɛngmɛ yu loo a hyɛɛ a nɔ, nɛ́ a maa suɔ kaa a ha mɛ womihi nɛ a pee kɛ ha hɛ yuyuili ɔ eko lo?

• Ha nɛ a na kaa o susuɔ a he. Ke o je huɛ bɔmi su kpo nɛ o ha nɛ a na kaa o susuɔ a he ɔ, lɔ ɔ ma ha nɛ a tsui maa nɔ a mi. O kɛ mɛ nɛ je ní sɛɛmi sisi kɛ munyu ko nɛ a bua jɔɔ he ngɛ nyɛ kpɔ ɔ mi ɔ

• Moo ye bua mɛ nɛ a kase Yehowa he ní. Yehowa asafo ɔ pee womihi kɛ ní kpahi nɛ maa ye bua nihi nɛ a hyɛ we nɔ́ ɔ. Ke hɛ yuyuilɔ ko loo nɔ ko nɛ e hyɛ we nɔ́ saminya a suɔ kaa a sɛ womi ko ha lɛ ɔ, mo bi lɛ nɛ e tsɔɔ nɔ́ nɛ e suɔ kaa e maa kase. E sa nɛ sɔmɔmi ní tsumi nɔ hyɛlɔ ɔ nɛ hyɛ konɛ womi nɔ hyɛlɔ ɔ nɛ sɛ womi nɛ hɛ yuyuilɔ ko maa suɔ ɔ kɛ ha lɛ