Bɔ Nɛ O Kɛ Ní Sɛɛmi He Nɔ Hyɛmi Ní Ɔmɛ Ma Tsu Ní Ha

Kɛ je January jeha 2018 ɔ mi ɔ, wa naa ní sɛɛmi he nɔ hyɛmi níhi ngɛ Kristofohi A Si Himi Kɛ A Sɔmɔmi Ní Tsumi ɔ​—Ní Kasemi Womi ɔ hɛ mi. Kɛ o kɛ ma tsu ní ha kɛɛ?

Ke A Ha Mo Sukuu Ní Tsumi: E sa nɛ o ngɔ sane bimi ɔ, ngmami ɔ, kɛ sane bimi nɛ a ma susu he pee se nɛ ngɛ ní sɛɛmi he nɔ hyɛmi nɔ́ ɔ mi ɔ kɛ tsu ní. Se kɛ̃ ɔ, enɛ ɔ tsɔɔ we kaa e sa nɛ o ngɔ munyunguhi nɛ a kɛ tsu ní ngɛ ní sɛɛmi he nɔ hyɛmi nɔ́ he video ɔ mi ɔ nɔuu kɛ tsu ní. O ma nyɛ ma tsake bɔ nɛ o ma tsu o ní peemi ɔ he ní ha a hɛ mi, o ma nyɛ maa gu blɔ kpa nɔ kɛ je o munyu ɔ sisi, aloo nyɛ ma nyɛ ma susu munyu ɔ he ngɛ blɔ kpa nɔ, kɛ ekpahi. Ke blɔ tsɔɔmi be o ní peemi ɔ he nɛ́ tsɔɔ kaa o ngɔ Wa Ní Tsɔɔmi Ga Dade Ɔmɛ eko kɛ ha wetsɛ ɔ po ɔ, o ma nyɛ ma ha lɛ eko.

Ke O Ngɛ Fiɛɛmi Mi: Níhi fuu ngɛ ní sɛɛmi he nɔ hyɛmi ní ɔmɛ a mi nɛ maa ye bua wɔ. Ke o kɛ nɔ ko ngɛ ní sɛɛe nɛ o na kaa nɔ ɔ bua jɔ munyu ɔ he nɛ e suɔ nɛ e le níhi fuu ɔ, o kɛ lɛ ma nyɛ ma tsa ní sɛɛmi ɔ nɔ. O ma nyɛ maa ngɔ munyuhi nɛ ngɛ kpale ya slaa a eko mi kɛ tsu ní. O ma nyɛ maa pee tsakemi bɔɔ ngɛ ní sɛɛmi he nɔ hyɛmi nɔ́ ɔ mi, aloo o ma nyɛ maa ngɔ munyu kpa ko kɛ tsu ní. Anɛ ní sɛɛmi he nɔ hyɛmi nɔ́ ɔ eko nɛ́ a kɛ tsu ní nyɔhiɔ nɛ be ɔ mohu lɛ nihi a bua maa jɔ he, aloo ngmami kpa ko ngɛ nɛ nihi a bua jɔɔ he ngɛ nyɛ zugba kpɔ ɔ mi lo? Anɛ munyu ko aloo nɔ́ ko nɛ ya nɔ lingmi nɛ ɔ lɛ nihi a bua maa jɔ he lo? Ngɛ blɔ nɔ nɛ o maa gu nɛ o kɛ ní sɛɛmi he nɔ hyɛmi ní ɔmɛ ma tsu ní ha a tsuo se ɔ, oti nɛ waa kɛ ma wa hɛ mi ji kaa wa maa ‘pee níhi tsuo ngɛ sane kpakpa a he je, konɛ waa fiɛɛ kɛ ha ni kpahi.’​—1Ko 9:22, 23.