Ha Nyɛmimɛ Nɛ A Ye Bua Mo

Yehowa guɔ wa “nyɛmimɛ a kuu ɔ tsuo” nɔ kɛ yeɔ bua wɔ. (1Pe 5:9) A ma nyɛ maa ye bua wɔ nɛ waa da nyagbahi nɛ waa kɛ kpeɔ ngɛ fiɛɛmi ní tsumi ɔ mi ɔ nya konɛ waa ye manye. Kaa nɔ hyɛmi nɔ́ ɔ, bɔfo Paulo ná yemi kɛ buami nɛ Akuila kɛ Priskila, Sila, Timoteo kɛ ni kpahi kɛ ha lɛ ɔ he se.—Nít 18:1-5.

Kɛ fiɛɛli kpahi ma nyɛ maa ye bua mo ngɛ fiɛɛmi mi ha kɛɛ? A ma nyɛ maa tsɔɔ mo a juɛmi ngɛ bɔ nɛ o ma plɛ kɛ ye bua nɔ ko nɛ e kɛ mo kpa we gbi ngɛ fiɛɛmi mi, bɔ nɛ o maa pee kpale ya slaa ha, bɔ nɛ o kɛ nɔ ko maa je Baiblo mi ní kasemi sisi kɛ bɔ nɛ o maa pee Baiblo mi ní kasemi ha. Ke o le nɔ ko ngɛ o we asafo ɔ mi nɛ e ma nyɛ ma ha mo yemi kɛ buami nɛ o hia a, mo de lɛ nɛ e ye bua mo. Ke o pee jã a, o kɛ lɛ tsuo nyɛ ma ná he se, nɛ nyɛ bua maa jɔ.—Flp 1:25.

NYƐƐ HYƐ VIDEO NƐ JI, MO NÁ KASELƆ PEEMI NÍ TSUMI Ɔ MI BUA JƆMI—HA YEHOWA NƐ YE BUA MO—WA NYƐMIMƐ ƆMƐ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• 

  Mɛni blɔ nɔ Neeta gu kɛ wo Lily he wami konɛ e ya asafo mi kpe?

• 

  Mɛni he je nɛ e sa kaa wa ha nɛ fiɛɛli kpahi nɛ a piɛɛ wa he ke waa kɛ nɔ ko yaa kase Baiblo ɔ?

• 

  Mɛni nɛ Lily kɛ Abigay tsuo a bua jɔ he?

• Mɛni níhi nɛ́ ma nyɛ maa ye bua wɔ ngɛ fiɛɛmi mi nɛ ni kpahi ma nyɛ maa tsɔɔ wɔ?