Blɔ Nɔ Nɛ A Maa Gu Kɛ Pee Fiɛɛmi Yami Kpe Nɛ Maa Nu Tso

Fiɛɛmi yami kpehi nɛ wa peeɔ ɔ ji blɔ nya nɛ Yehowa to konɛ e kɛ ha nɛ wa nɔ gbagba nɛ te kɛ ha suɔmi kɛ ní tsumi kpakpahi kaa bɔ nɛ e ji ngɛ asafo mi kpehi a blɔ fa mi ɔ. (Heb 10:24, 25) E sa nɛ fiɛɛmi yami kpe ɔ, kɛ nyɛmimɛ nɛ a ma gba mɛ, zugba kpɔ nɛ a kɛ ma ha nyɛmimɛ kɛ sɔlemi nɛ a maa sɔle ɔ tsuo nɛ ye hɛngmɛfia enuɔ kɛ ya si hɛngmɛfia kpaago. (Ke a maa pee fiɛɛmi yami kpe ɔ benɛ a kpa asafo mi kpe ɔ, lɛɛ e sa nɛ a gbɔ be ɔ nɔ.) E sa nɛ nɔ nɛ maa hyɛ fiɛɛmi yami kpe ɔ nɔ ɔ nɛ dla e he kɛ munyu nɛ maa ye bua nihi nɛ a maa ya fiɛɛmi jamɛ a ligbi ɔ. Kaa nɔ hyɛmi nɔ́ ɔ, ke nihi fuu nɛ́ a ba fiɛɛmi Hɔ ɔ nyɛ we nɛ a kɛ a he nɛ wo fiɛɛmi mi otsi nɛ be ɔ, e he maa hia nɛ a susu nɔ́ nɛ ke a ya na wetsɛ ko ɔ, a kɛ lɛ ma susu he ɔ pɛ he. Mɛni ji munyu komɛ nɛ maa ye bua nyɛmimɛ nɛ a ma nyɛ ma susu he ngɛ fiɛɛmi yami kpe ɔ mi?

• Ní sɛɛmi he nɔ hyɛmi nɔ́ nɛ ngɛ Kristofohi A Si Himi Kɛ A Sɔmɔmi Ní Tsumi ɔ—Ní Kasemi Womi ɔ mi

• Blɔ nɔ nɛ a maa gu nɛ a kɛ nɔ́ ko nɛ ngɛ nɔ yae aloo amaniɛ bɔmi ko maa je ní sɛɛmi sisi

• Blɔ nɔ nɛ a maa gu nɛ a kɛ nɔ ko maa sɛɛ ní ke e ngɛ hlae maa tsi munyu ɔ nya

• Blɔ nɔ nɛ a maa gu nɛ a kɛ nɔ ko nɛ e he we yi kaa Mawu ngɛ, nɔ ko nɛ e he ye kaa níhi bile, nɔ ko nɛ e tuɔ gbi kpa, aloo nɔ ko nɛ e ngɛ jami ko nɛ be a zugba kpɔ ɔ mi ɔ maa sɛɛ ní ha

• Bɔ nɛ a kɛ níhi nɛ ngɛ jw.org wɛbsaiti ɔ nɔ ɔ kɛ JW Library^® app ɔ nɔ ɔ eko ma tsu ní ha aloo bɔ nɛ a kɛ Baiblo ɔ ma tsu ní ha

• Bɔ nɛ a kɛ Ní Tsɔɔmi Ga Dade ɔmɛ eko ma tsu ní ha

• Blɔ nɔ nɛ a maa gu kɛ tsu fiɛɛmi ní tsumi ɔ fã slɔɔto ɔmɛ eko ha, nɛ ji tɛlifoo nɔ odase yemi, sɛ womi ngmami, magbɛ nɔ odase yemi, kpale ya slaa aloo bɔ nɛ a maa pee Baiblo mi ní kasemi ha

• Kaimihi nɛ kɔɔ he piɛ pomi he, a he nɛ a ma tsake kɛ wo si fɔfɔɛhi nɛ a kɛ maa kpe ɔ mi, bɔ nɛ a maa pee a ní ha ke a ya fiɛɛmi, juɛmi nɛ da nɛ a ma ná kɛ ní kpahi kaa jã

• Nɔ́ ko nɛ a kase loo video ko nɛ a hyɛ ngɛ Yaa O Hɛ Mi Ngɛ Ní Kanemi Kɛ Ní Tsɔɔmi womiyo ɔ mi ɔ mi

• Blɔ nɔ nɛ a maa gu kɛ wo nihi nɛ a kɛ mɛ ya fiɛɛmi ɔ he wami nɛ a ye bua mɛ

• Ngmami nɛ kɔɔ fiɛɛmi ní tsumi ɔ he aloo níhi a si kpami ko nɛ woɔ nɔ he wami nɛ kɔɔ fiɛɛmi ní tsumi ɔ he