Muɔ Hɛlii Ko He Je!

YIHEWI enyɔ komɛ ngɛ nyɛɛe ngɛ he ko nɛ nihi pɔɔ bemi wawɛɛ ngɛ ngɛ Baguio City ngɛ Philippines. A na atsɛ̃se ko nɛ a kɛ ngɛ odase yee, se a yɛ atsɛ̃se ɔ he. Nyɛmiyo ɔ nɛ e daa si ngɛ atsɛ̃se ɔ he nɛ a tsɛɛ lɛ ke Helen ɔ muɔ hɛlii kɛ tsɔɔ mɛ. E ngɛ mi kaa yihewi ɔmɛ da we si mohu lɛɛ, se a bua jɔ bɔ nɛ Helen muɔ hɛlii kɛ tsɔɔ mɛ ha a he.

Pee se ɔ, benɛ yihewi ɔmɛ ngɛ lɔle mi kɛ yaa we mi ɔ, a na Matsɛ Yemi Asa ko nɛ jw.org okadi agbo ko ngɛ he. A kai kaa jamɛ a okadi ɔ nɔuu nɛ a na ngɛ atsɛ̃se ɔ he ɔ nɛ. Mɛ tsuo a kple si ngɛ lɔle ɔ mi nɛ a nyɛɛ kɛ ho Matsɛ Yemi Asa a he ya. A na be nɛ asafo ɔmɛ tsuo kɛ kpeɔ ngɛ Matsɛ Yemi Asa a nɔ ɔ.

Yihewi ɔmɛ ya kpehi nɛ a to he blɔ nya a a kpɛti kake. Benɛ a su Matsɛ Yemi Asa a nɔ ɔ, a na Helen, nɛ enɛ ɔ pee mɛ nyakpɛ wawɛɛ! Amlɔ nɔuu nɛ a kai kaa lɛ ji nɔ nɛ e muɔ hɛlii ngɛ e nya he ɔ nɛ. Helen de ke: “Benɛ ni ɔmɛ ngɛ nyɛɛe kɛ ma ye ngɔ ɔ, ye tsui po bɔɔ. I susu kaa eko ɔ, i pee nɔ́ ko.” Se yihewi ɔmɛ de Helen kaa a na lɛ ngɛ atsɛ̃se ɔ he hyɛ.

Yihewi ɔmɛ a bua jɔ kpe ɔ he, nɛ a bua jɔ hu kaa a ngɛ nyɛmimɛ ɔmɛ a kpɛti. Benɛ a na nɛ nyɛmimɛ ɔmɛ ngɛ Matsɛ Yemi Asa a nɔ dlae ɔ, a de mɛ kaa a suɔ nɛ a ye kɛ bua. Yihewi ɔmɛ a kpɛti nɔ kake be ma a mi hu, se nɔ kake ɔ baa a asafo mi kpe nɛ e ha nɛ a kɛ lɛ bɔni Baiblo ɔ kasemi. Enɛ ɔ ba mi ngɛ muɔ hɛlii ko he je!