Anɛ ‘O Pee Klaalo Kaa O Maa Bu Tue’ Lo?

1. Mɛni he je nɛ e he ma nyɛ maa wa ha wɔ kaa wa maa bu tue ɔ?

ANƐ be komɛ ɔ, e he waa ha mo kaa o maa bu tue lo? Jã nɛ e ji ngɛ Matsɛ David blɔ fa mi. Enɛ ɔ he je ɔ, e sɔle nɛ e de Mawu ke: “Ha nɛ ma bu mo tue daa.” (La 51:12) David suɔ Yehowa. Se be komɛ ɔ, e he waa kɛ haa lɛ kaa e maa bu lɛ tue, nɛ jã nɛ e ji ngɛ wɔ hu wa blɔ fa mi. Mɛni he je? Kekleekle nɔ́ ji kaa Adam ngɔ yayami kɛ sã wɔ, enɛ ɔ he ɔ, e he waa kɛ haa wɔ kaa wa maa bu Mawu tue. Enyɔne, Satan ngɛ mɔde bɔe be fɛɛ be kaa e ma ha nɛ wa tsɔ atua kaa bɔ nɛ lɛ hu e pee ɔ. (2 Kor. 11:3) Etɛne, “mumi ɔ nɛ amlɔ nɛ ɔ, e ngɛ ní tsue ngɛ tue gbomi bimɛ ɔmɛ a mi ɔ,” haa nɛ nihi nɛ a bɔle wɔ ɔ tsɔɔ atua be fɛɛ be. (Efe. 2:2) Enɛ ɔ he ɔ, e sa nɛ waa bɔ mɔde wawɛɛ nɛ waa hwu kɛ si wa gbɔjɔmihi, nɛ wa ko ha nɛ Abosiami kɛ je nɛ ɔ nɛ ha nɛ wa gbo Yehowa nɔ tue. E sa nɛ waa bɔ mɔde nɛ waa bu Yehowa kɛ nihi nɛ e hla nɛ e ngɔ he blɔ kɛ wo a dɛ ɔ tue.

2. Ke a ke waa ‘pee klaalo kaa wa maa bu tue’ ɔ, mɛni e tsɔɔ? (Yakobo 3:17)

² Kane Yakobo 3:17. Mawu mumi ɔ wo Yakobo he wami nɛ e ngma kaa nihi nɛ a ngɛ nile ɔ ‘pee klaalo kaa a maa bu tue.’ Mo susu nɔ́ nɛ enɛ ɔ tsɔɔ ɔ he nɛ o hyɛ. E sa nɛ waa je wa tsui mi nɛ waa bu nihi nɛ Yehowa ha mɛ he blɔ komɛ ɔ tue. Se ngɛ anɔkuale mi ɔ, ke nɔ ko ngɛ hlae nɛ wa gbo Yehowa nɔ tue ɔ, Yehowa hyɛ we blɔ kaa waa bu jamɛ a nɔ ɔ tue.—Níts. 4:​18-20.

3. Mɛni he je nɛ Yehowa suɔ kaa waa bu nihi nɛ a ngɛ blɔ nya a tue ɔ?

³ Eko ɔ, wa maa suɔ kaa wa maa bu Yehowa tue mohu pe adesahi, ejakaa be fɛɛ be ɔ, Yehowa mlaa amɛ hi kɛ pi si. (La 19:7) Se adesahi nɛ a hɛɛ blɔ nya a yi mluku. Se kɛ̃ ɔ, wa hiɔwe Tsɛ ɔ ngɔ blɔ nya komɛ kɛ wo fɔli, amlaalohi kɛ asafo mi nikɔtɔmahi a dɛ. (Abɛ 6:20; 1 Tɛs. 5:12; 1 Pet. 2:​13, 14) Ke wa bu nimli nɛ ɔmɛ tue ɔ, lɔ ɔ tsɔɔ kaa wa ngɛ Yehowa tue bue. Ke a wo wɔ mlaa ko, nɛ waa kɛ mɛ kpa we gbi loo wa sume nɛ wa kɛ tsu ní po ɔ, e sa nɛ waa bu mɛ tue. Nyɛ ha nɛ waa hyɛ blɔ nɔ nɛ wa maa gu kɛ pee jã.

MOO BU O FƆLI TUE

4. Mɛni he je nɛ bimɛ fuu bui a fɔli ɔ?

⁴ Nihewi kɛ yihewi “nɛ a bui a fɔli” ɔ bɔle nihewi kɛ yihewi nɛ a ngɛ Yehowa sɔmɔe ɔ. (2 Tim. 3:​1, 2) Mɛni he je nɛ nihi fuu bui a fɔli ɔ? A ti ni komɛ susu kaa a fɔli ɔmɛ ji osatotsɛmɛ. Fɔli komɛ hyɛɔ blɔ kaa a bimɛ nɛ a pee nɔ́ nɛ mɛɛ a nyɛ we nɛ a pee ɔ. Ni kpahi hu naa ga womihi nɛ a fɔli ɔmɛ kɛ haa mɛ ɔ kaa a be be aloo a he hia we, nɛ a ngɛ kpɛii tsɔ. Ke o ji niheyo loo yiheyo ɔ, anɛ jã nɛ o nuɔ he lo? Yehowa de ke: “Bimɛ, nyɛɛ bu nyɛ fɔli ɔmɛ tue ngɛ Nyɔmtsɛ ɔ mi, ejakaa enɛ ɔ da.” E he wa ha nihi fuu kaa a maa bu fami nɛ ɔ tue. (Efe. 6:1) Mɛni maa ye bua mo konɛ o nyɛ nɛ o pee jã?

5. Mɛni he je nɛ e sa kadimi wawɛɛ kaa Yesu bu e fɔli ɔmɛ tue kaa bɔ nɛ a tsɔɔ ngɛ Luka 2:​46-52 ɔ?

⁵ O ma nyɛ maa kase tue bumi he nɔ hyɛmi nɔ́ nɛ se be nɛ Yesu pee ɔ. (1 Pet. 2:​21-24) Yesu ji nɔ ko nɛ e ye mluku, se e fɔli ɔmɛ lɛɛ a yi mluku. Se kɛ̃ ɔ, ke Yesu fɔli ɔmɛ tɔ̃ tɔmi ko loo a nui lɛ sisi be komɛ po ɔ, e buɔ mɛ be fɛɛ be. (2 Mose 20:12) Mo susu nɔ́ nɛ ya nɔ benɛ Yesu ye jeha 12 ɔ he nɛ o hyɛ. (Kane Luka 2:​46-52.) E fɔli ɔmɛ je e he ngɛ Yerusalem. E ji Yosef kɛ Maria a blɔ nya ní tsumi kaa a maa hyɛ kaa a bimɛ ɔmɛ tsuo piɛɛ a he kɛ yaa we mi benɛ a ye gbijlɔ ɔ ta a. Benɛ Yosef kɛ Maria na Yesu ɔ, Maria pia Yesu kaa e ha nɛ a hao! Jinɛ Yesu ko nyɛ de mɛ ke e sɛ nɛ a pia lɛ, se e pee we jã. Mohu ɔ, e je bumi mi kɛ ha e fɔli ɔmɛ heto kpiti. E ngɛ mi kaa Yosef kɛ Maria “nui nɔ́ nɛ e ngɛ mɛ dee ɔ sisi” mohu lɛɛ, se loloolo ɔ, Yesu “ya nɔ nɛ e ba e he si ha mɛ.”

6-7. Mɛni ma nyɛ maa ye bua nihewi kɛ yihewi konɛ a bu a fɔli tue?

⁶ Nihewi kɛ yihewi, anɛ e he waa ha nyɛ kaa nyɛ maa bu nyɛ fɔli ɔmɛ tue ke a tɔ̃ tɔmi ko aloo a nui nyɛ sisi lo? Ke e ba jã a, mɛni ma nyɛ maa ye bua nyɛ? Kekleekle ɔ, nyɛ susu bɔ nɛ Yehowa nuɔ he ha a he. Baiblo ɔ tsɔɔ kaa ke nyɛ bu nyɛ fɔli tue ɔ, e “saa Nyɔmtsɛ ɔ hɛ mi saminya.” (Kol. 3:20) Ngɛ anɔkuale mi ɔ, Yehowa le kaa be komɛ ɔ, nyɛ fɔli ɔmɛ nui nyɛ sisi, aloo be komɛ ɔ, a woɔ nyɛ mlaahi nɛ e he waa ha nyɛ kaa nyɛ maa ye nɔ. Se ke nyɛ bɔ mɔde kaa nyɛ maa bu mɛ tue ɔ, Yehowa bua maa jɔ wawɛɛ.

⁷ Enyɔne, mo susu bɔ nɛ o fɔli ɔmɛ nuɔ he ha a he nɛ o hyɛ. Ke o buɔ o fɔli tue ɔ, e haa nɛ a bua jɔɔ nɛ a náa hɛ kɛ nɔ fɔmi ngɛ o mi. (Abɛ 23:​22-25) Jehanɛ hu ɔ, e ma nyɛ ma ha nɛ o hɛ kɛ su a he wawɛɛ. Nyɛminyumu ko nɛ a tsɛɛ lɛ ke Alexandre nɛ e je Belgium ɔ de ke, “Benɛ i bɔni ye fɔli ɔmɛ tue bumi ɔ, lɔ ɔ ha nɛ huɛ bɔmi nɛ ngɛ i kɛ mɛ wa kpɛti ɔ tsake kulaa. Lɔ ɔ ha nɛ i hɛ kɛ su a he wawɛɛ, nɛ wa ngɛ bua jɔmi.”b Etɛne, mo susu bɔ nɛ o fɔli ɔmɛ tue nɛ o maa bu ɔ maa ye bua mo pee se ha a he. Paulo nɛ e ngɛ Brazil ɔ de ke, “Ye fɔli ɔmɛ tue nɛ i bu ɔ ye bua mi nɛ i nyɛɔ nɛ i buɔ Yehowa kɛ ni kpahi nɛ a ngɛ blɔ nya a tue.” Mawu Munyu ɔ tsɔɔ nɔ́ he je nɛ e he hia wawɛɛ kaa o maa bu o fɔli tue. E de ke: “Konɛ e hi ha mo nɛ o se nɛ kɛ ngɛ zugba a nɔ.”—Efe. 6:​2, 3.

8. Mɛni he je nɛ nihewi kɛ yihewi komɛ buɔ a fɔli tue ɔ?

⁸ Nihewi kɛ yihewi fuu na kaa ke a bu a fɔli tue ɔ, níhi yaa nɔ ha mɛ saminya. Sisije ɔ, Luiza nɛ e je Brazil ɔ nui sisi kaa e fɔli ɔmɛ ngmɛ́ lɛ blɔ nɛ e hɛɛ fon kɛ ya si be ko. E tsɔɔ kaa e juami bimɛ fuu ngɛ fon. Se pee se ɔ, e ba yɔse kaa mamoo ɔ, e fɔli ɔmɛ ngɛ e he piɛ poe niinɛ. Amlɔ nɛ ɔ, e de ke: “Ye fɔli ɔmɛ tue nɛ i bu ɔ ha nɛ i na kaa a ga womi ɔmɛ be kpɛii tsɔ, nɛ lɔ ɔ ji nɔ́ tutuutu nɛ i hia.” Loloolo ɔ, e he waa ha yiheyo wayoo ko nɛ a tsɛɛ lɛ ke Elizabeth nɛ e ngɛ United States ɔ kaa e maa bu e fɔli tue be komɛ. E de ke: “Ke i nui nɔ́ he je nɛ ye fɔli ɔmɛ wo mi mlaa ko sisi ɔ, i susuɔ bɔ nɛ mlaahi nɛ a wo mi be ko nɛ be ɔ po ye he piɛ ha a he.” Monica nɛ e ngɛ Armenia a tsɔɔ kaa ke e bu e fɔli tue be fɛɛ be ɔ, níhi yaa nɔ ha lɛ saminya mohu pe nɛ e ma gbo a nɔ tue.

NYƐƐ BU ‘NIHI NƐ A NGƐ BLƆ NYAHI NƐ A NƆ KUƆ’ Ɔ

9. Kɛ nihi fuu nuɔ he ngɛ mlaahi nɛ a kɛ ma tsu ní ɔ he ha kɛɛ?

⁹ Nihi fuu kplɛɛ nɔ kaa wa hia ma nɔ yeli. A tsɔɔ hu kaa ke ‘nihi nɛ a ngɛ blɔ nyahi nɛ a nɔ kuɔ’ ɔ wo mlaahi ɔ, e sa nɛ waa kɛ ekomɛ nɛ tsu ní. (Rom. 13:1) Se ke amlaalo ɔ wo mlaa ko nɛ nimli nɛ ɔmɛ a bua jɔɛ he ɔ, a sume nɛ a yeɔ nɔ, ejakaa a nuɔ he kaa amlaalo ɔ yi dami sane. Kaa nɔ hyɛmi nɔ́ ɔ, mo susu tohi nɛ e sa kaa ma bi nɛ a wo ɔ he nɛ o hyɛ. Ngɛ Yuropa ma ko nɔ ɔ, “ke nɔ ko nu he kaa e sɛ nɛ e wo to ɔ, e ma nyɛ ma de ke e be woe.” Enɛ ɔ he ɔ, ma a mi bi ɔmɛ wui tohi nɛ e sa kaa a wo kɛ ha amlaalo ɔ.

10. Ke a wo mlaahi nɛ wa bua jɔɛ he po ɔ, mɛni he je nɛ wa buɔ tue ɔ?

¹⁰ Baiblo ɔ tsɔɔ kaa e be kɛe nɛ a ma kpata adesa nɔ yemihi nɛ ha nɛ wa ngɛ nɔ́ nae ngɛ Satan kudɔmi sisi ɔ hɛ mi. (La 110:​5, 6; Fiɛɛ. 8:9; Luka 4:​5, 6) Jehanɛ hu ɔ, Baiblo ɔ tsɔɔ kaa “nɔ fɛɛ nɔ nɛ e teɔ si kɛ woɔ blɔ nya a, e teɔ si kɛ siɔ Mawu blɔ nya tomi ɔ.” Amlɔ nɛ ɔ, Yehowa ngmɛ nɔ yeli ɔmɛ blɔ konɛ a ye nɔ kɛ ya si be ko, bɔ nɛ pee nɛ a to níhi a blɔ nya, nɛ e hyɛɔ blɔ kaa wa maa bu mɛ tue. Enɛ ɔ he ɔ, e sa nɛ waa ba wa he si kɛ ha mɛ, nɛ ‘nɔ́ nɛ sa mɛ tsuo ɔ, waa ngɔ kɛ ha mɛ.’ E sa nɛ waa wo tohi, waa bu mɛ, nɛ waa kɛ a blɔ tsɔɔmi nɛ tsu ní. (Rom. 13:​1-7) Ke nɔ yeli ɔmɛ wo mlaa ko ɔ, wa ma nyɛ maa nu he kaa mlaa a he wa tsɔ, a yi wɔ dami sane, loo a ngɛ hlae nɛ waa wo sika ngua ko kɛ ha mɛ. Se ke mlaahi nɛ nɔ yeli ɔmɛ wo ɔ ti si kɛ wui Yehowa mlaahi ɔ, wa buɔ mɛ tue ejakaa Yehowa lɛ de wɔ kaa waa pee jã.—Níts. 5:29.

11-12. Kaa bɔ nɛ Luka 2:​1-6 tsɔɔ ɔ, mɛni Yosef kɛ Maria pee nɛ tsɔɔ kaa a bu blɔ tsɔɔmi ko nɛ he wa ha mɛ ɔ tue, nɛ mɛni je mi kɛ ba? (Hyɛ foni ɔmɛ hulɔ.)

¹¹ Wa ma nyɛ maa kase Yosef kɛ Maria a nɔ hyɛmi nɔ́ ɔ. E ngɛ mi kaa mlaahi nɛ amlaalo ɔ wo ɔ he wa ha mɛ mohu lɛɛ, se a pee klaalo kaa a maa bu tue. (Kane Luka 2:​1-6.) Benɛ Maria hɛɛ hɔ maa pee nyɔhiɔ nɛɛ ɔ, nɔ yeli ɔmɛ wo mlaa ko nɛ e ma bi nɛ Yosef kɛ Maria nɛ a pee nɔ́ ko nɛ he wa wawɛɛ. Augusto nɛ lɛ nɛ e ngɛ Roma Kpokpa a nɔ yee ɔ tsɔɔ kaa nɔ fɛɛ nɔ nɛ ya e ma mi konɛ a kane lɛ. Enɛ ɔ he ɔ, e ma bi nɛ Yosef kɛ Maria nɛ a hia blɔ kɛ ya Betlehem. A maa hia blɔ maa pee si tomi 93 kɛ gu yokuhi a nɔ kɛ dɔgbahi a mi. A be blɔ hiami nɛ ɔ náe gbɔjɔɔ, titli ɔ, Maria. Eko ɔ, Yosef kɛ Maria maa hao ngɛ a bi nɛ a fɔ we lɛ lolo ɔ kɛ Maria nitsɛ he. Ke Maria nu kɔɔmi ngɛ blɔ ɔ nɔ ɔ, kɛ a maa pee kɛɛ? Bi nɛ ngɛ Maria mi mi ɔ ji nɔ nɛ ma ba pee Mesia a nɛ. Anɛ lɔ ɔ maa tsi a nya konɛ a ko bu amlaalo ɔ tue lo?

¹² Yosef kɛ Maria de we ke a be mlaa nɛ amlaalo ɔ wo ɔ nɔ yee ngɛ nyagba nɛ ɔmɛ a he je. Ngɛ anɔkuale mi ɔ, Yehowa jɔɔ mɛ akɛnɛ a bu tue ɔ he je. Maria ya su Betlehem ngɛ tue mi jɔmi mi, nɛ e fɔ bi nɛ ngɛ nɔmlɔ tso mi he wami kpakpa, nɛ enɛ ɔ ha nɛ Baiblo gbami ba mi.—Mika 5:2.

13. Ke wa bu blɔ tsɔɔmihi tue ɔ, kɛ wa nyɛmimɛ ɔmɛ ma ná he se ha kɛɛ?

¹³ Ke wa buɔ nihi nɛ a hɛɛ blɔ nyahi nɛ a nɔ kuɔ ɔ tue ɔ, wɔ nitsɛmɛ wa náa he se, nɛ ni kpahi hu náa he se. Ngɛ mɛni blɔ nɔ? Nɔ́ kake ji kaa ke a ngɛ nihi nɛ a gboɔ tue ɔ a tue gblae ɔ, wa piɛɛ we he. (Rom. 13:4) Ke wa bu nɔ yeli ɔmɛ tue ɔ, e haa nɛ a náa juɛmi nɛ da ngɛ Yehowa Odasefohi a he. Kaa nɔ hyɛmi nɔ́ ɔ, ngɛ jeha komɛ nɛ be ɔ mi ɔ, ta buli komɛ ya sɛ Matsɛ Yemi Asa ko nɔ ngɛ Nigeria be mi nɛ asafo mi kpe ngɛ nɔ yae, nɛ a tsɔɔ kaa a ngɛ nihi nɛ a tsɔɔ atua nɛ a wui tohi ɔ hlae. Nɔ nɛ nyɛɛɔ hɛ mi kɛ ngɔɔ to ɔ de ta buli ɔmɛ kaa a je Matsɛ Yemi Asa a nɔ, nɛ e de ke, “Yehowa Odasefo ɔmɛ woɔ to be fɛɛ be.” Be fɛɛ be nɛ wa maa bu mlaahi nɛ amlaalo ɔ wo ɔ tue ɔ, e haa nɛ wa náa biɛ kpakpa, nɛ e yeɔ bua kɛ poɔ wa nyɛmimɛ ɔmɛ a he piɛ pee se.—Mat. 5:16.

14. Mɛni ye bua nyɛmiyo ko nɛ e “pee klaalo” kaa e maa bu nɔ yeli ɔmɛ tue?

¹⁴ Eko ɔ, tsa pi be fɛɛ be nɛ wa maa suɔ kaa wa maa bu nɔ yeli ɔmɛ tue. Nyɛmiyo ko nɛ e ngɛ United States nɛ a tsɛɛ lɛ ke Joanna a de ke: “E he waa ha mi wawɛɛ kaa ma bu nɔ yeli ɔmɛ tue, ejakaa a ye ye weku mi bimɛ ɔmɛ a kpɛti ni komɛ sane yaya.” Se Joanna bɔ mɔde wawɛɛ kaa e maa pee tsakemi ngɛ bɔ nɛ e susuɔ níhi a he ha a he. Kekleekle nɔ́ nɛ e pee ji kaa e kpa níhi nɛ e kaneɔ ngɛ Intanɛti ɔ nɔ nɛ haa nɛ e náa juɛmi yaya ngɛ nɔ yeli ɔmɛ a he ɔ kanemi. (Abɛ 20:3) Enyɔne ɔ, e sɔle ha Yehowa konɛ e ye bua lɛ nɛ e ná hɛ kɛ nɔ fɔmi ngɛ e mi, mohu pe nɛ e ma susu kaa a tsake jamɛ a nɔ yemi ɔ. (La 9:​9, 10) Etɛne ɔ, e kane bɔ nɛ e ma plɛ kɛ yu e he ngɛ ma kudɔmi sanehi a he ɔ he ní ngɛ wa womi ɔmɛ a mi. (Yoh. 17:16) Amlɔ nɛ ɔ, Joanna tsɔɔ kaa akɛnɛ e buɔ nɔ yeli ɔmɛ a blɔ tsɔɔmi tue nɛ e kɛ tsuɔ ní he je ɔ, lɔ ɔ ha nɛ e ná tue mi jɔmi nɛ e ngɛ bua jɔmi wawɛɛ.

MOO BU BLƆ TSƆƆMIHI NƐ YEHOWA ASAFO Ɔ KƐ HAA A TUE

15. Mɛni he je nɛ e he ma nyɛ maa wa ha wɔ kaa wa maa bu blɔ tsɔɔmihi nɛ Yehowa asafo ɔ kɛ haa wɔ ɔ tue?

¹⁵ Yehowa de wɔ ke waa “bu ni nɛmɛ nɛ a ngɛ hɛ mi nyɛɛe” ngɛ asafo ɔ mi ɔ tue. (Heb. 13:17) E ngɛ mi kaa wa Hɛ Mi Nyɛɛlɔ nɛ ji Yesu ɔ ye mluku mohu lɛɛ, se nihi nɛ e guɔ a nɔ kɛ nyɛɛɔ asafo ɔ hɛ mi ngɛ zugba a nɔ ɔ yi mluku. Enɛ ɔ he ɔ, e he ma nyɛ maa wa ha wɔ kaa wa maa bu mɛ tue, titli ɔ, ke a de wɔ ke waa pee nɔ́ ko nɛ wa sume kaa wa maa pee. Be ko ɔ, e he wa kɛ ha bɔfo Petro kaa e maa bu tue. Benɛ bɔfo ko de Petro kaa e ye lohwe komɛ nɛ a he tsɔ we ngɛ Mose Mlaa a nya a, e kua, pi si kake, se si etɛ sɔuu! (Níts. 10:​9-16) Mɛni he je? Ejakaa e nui blɔ tsɔɔmi ehe nɛ a kɛ ha lɛ ɔ sisi. Nɔ́ nɛ bɔfo ɔ de lɛ ke e pee ɔ ji nɔ́ ko nɛ e pee we hyɛ gblegbleegble ngɛ e si himi mi. Ke e he wa ha Petro kaa e maa bu blɔ tsɔɔmi nɛ bɔfo ɔ kɛ ha lɛ ɔ tue ɔ, lɛɛ e he ma nyɛ maa wa kɛ ha wɔ kaa wa maa bu nihi nɛ a yi mluku nɛ a kɛ blɔ tsɔɔmi haa wɔ ɔ tue.

16. E ngɛ mi kaa bɔfo Paulo ko nyɛ susu kaa nile be blɔ tsɔɔmi nɛ a kɛ ha lɛ ɔ mi mohu lɛɛ, se mɛni e pee? (Ní Tsumi 21:​23, 24, 26)

¹⁶ Benɛ a kɛ blɔ tsɔɔmi ha bɔfo Paulo nɛ e pee lɛ kaa nɔ́ nɛ sisi numi be he po ɔ, “e pee klaalo kaa e maa bu tue.” Yuda bi nɛ a ji Kristofohi ɔ nu lakpa munyuhi kɛ kɔ Paulo he. A tsɔɔ kaa Paulo ngɛ nihi tsɔɔe kaa “a kua Mose,” nɛ e kɛ Mose Mlaa a hu tsu we ní. (Níts. 21:21) Nyumu nikɔtɔmahi nɛ a ji Kristofohi nɛ a ngɛ Yerusalem ɔ de Paulo kaa e ngɔ nyumuhi eywiɛ kɛ piɛɛ e he kɛ ya sɔlemi we ɔ, nɛ e tsu e he ngɛ Mlaa a nya konɛ e kɛ tsɔɔ kaa nɔ́ nɛ a ngɛ dee ngɛ e he ɔ be mi. Se Paulo le kaa Kristofohi be Mlaa a sisi hu, nɛ e pee we nɔ́ yaya ko hulɔ, se kɛ̃ ɔ, Paulo bu tue oya nɔuu. Paulo “ngɔ nyumu ɔmɛ nɛ e kɛ mɛ ya tsukɔ a he ngɛ kusumi nya.” (Kane Ní Tsumi 21:​23, 24, 26.) Akɛnɛ Paulo bu tue he je ɔ, lɔ ɔ ngɔ kake peemi kɛ ba nyɛmimɛ ɔmɛ a kpɛti.—Rom. 14:​19, 21.

17. Mɛni o kase ngɛ Stephanie níhi a si kpami ɔ mi?

¹⁷ E he wa kɛ ha Stephanie kaa e maa bu blɔ tsɔɔmi nɛ nihi nɛ a ngɛ asafo ɔ hɛ mi nyɛɛe ngɛ e ma a mi ɔ kɛ ha a tue. E kɛ e huno ɔ ngɛ sɔmɔe ngɛ kuu ko nɛ a tuɔ gbi kpa ngɛ mi ɔ mi, nɛ a ngɛ bua jɔmi wawɛɛ. Kɛkɛ nɛ asafo ɔ ní tsumi kɔni ɔ gu jamɛ a kuu ɔ. Enɛ ɔ ma bi nɛ a kpale kɛ ho asafo nɛ a tuɔ a je gbi ngɛ mi ɔ mi ya ekohu. Stephanie de ke: “Ye bua jɔɛ kulaa. I he we yi kaa fiɛɛli fuu a he hia ngɛ asafo nɛ wa je mi ɔ mi.” Se ngɛ lɔ ɔ tsuo mi ɔ, e mwɔ e yi mi kpɔ kaa e kɛ blɔ tsɔɔmi ehe ɔ ma tsu ní. E de ke: “Pee se ɔ, i ba na kaa nile ngɛ yi mi kpɔ nɛ nyɛmimɛ ɔmɛ mwɔ ɔ mi. Ngɛ anɔkuale mi ɔ, wa ba pee kaa fɔli kɛ ha nyɛmimɛ fuu nɛ a ngɛ asafo ɔ mi ejakaa nyɛmimɛ nɛ ɔmɛ a weku li be anɔkuale ɔ mi. I kɛ nyɛmiyo ko nɛ e bɔni fiɛɛmi yami ekohu ɔ kaseɔ ní, nɛ i náa be fuu kɛ kaseɔ ní ngɛ imi nitsɛ ye dɛ he.” E de kɛ piɛɛ he ke, “Amlɔ nɛ ɔ, i ngɛ he nile kpakpa ejakaa i le kaa i pee nɔ́ fɛɛ nɔ́ nɛ ma nyɛ konɛ ma bu blɔ tsɔɔmi tue.”

18. Ke wa buɔ tue ɔ, kɛ wa náa he se ha kɛɛ?

¹⁸ Wɔ hu wa ma nyɛ maa bu tue. Yesu “kase tue bumi kɛ je amanehluhi nɛ e na a mi.” (Heb. 5:8) Kaa bɔ nɛ Yesu pee ɔ, behi fuu ɔ, wɔ hu wa kaseɔ tue bumi ngɛ si fɔfɔɛhi nɛ a mi wa mi. Kaa nɔ hyɛmi nɔ́ ɔ, benɛ COVID-19 hiɔ ɔ gbɛ fĩa je ɔ mi pɛ ɔ, a tsi wa nya kaa wa ko kpe ngɛ wa Matsɛ Yemi Asa amɛ a nɔ, nɛ wa ko ya fiɛɛmi ngɛ wehi a mi hulɔ. Anɛ e he wa ha mo kaa o maa bu blɔ tsɔɔmi nɛ ɔ tue lo? Akɛnɛ o bu tue he je ɔ, e po o he piɛ, nɛ e ha nɛ kake peemi ngɛ o kɛ nyɛmimɛ ɔmɛ a kpɛti, nɛ Yehowa hu bua jɔ. Amlɔ nɛ ɔ, wɔ tsuo wa dla wa he kɛ to kaa wa maa bu blɔ tsɔɔmihi nɛ a kɛ ma ha wɔ ngɛ amanehlu ngua a mi ɔ tue, ejakaa wa wami daa si ngɛ nɔ!—Hiob 36:11.

19. Mɛni he je nɛ o suɔ nɛ o bu tue ɔ?

¹⁹ Wa kase kaa tue bumi ngɔɔ jɔɔmi babauu kɛ baa. Se nɔ́ titli nɛ haa nɛ wa buɔ Yehowa tue ji kaa wa suɔ lɛ, nɛ wa suɔ kaa waa sa e hɛ mi. (1 Yoh. 5:3) Wa be nyɛe maa wo Yehowa hiɔ ngɛ níhi tsuo nɛ e pee kɛ ha wɔ ɔ he kɔkɔɔkɔ. (La 116:12) Se wa ma nyɛ maa bu Yehowa kɛ nihi nɛ e ngɔ blɔ nya kɛ wo a dɛ ɔ tue. Ke wa pee jã a, lɔ ɔ tsɔɔ kaa wa le ní, nɛ nihi nɛ a le ní ɔ haa nɛ Yehowa bua jɔɔ.—Abɛ 27:11.