Ha Nɛ Suɔmi Nɛ Wo Mo He Wami Nɛ O Ya Nɔ Nɛ O Fiɛɛ!

1. Mɛni wa kase ngɛ jeha 2023 daa jeha kpe ɔ mi?

NGƐ jeha 2023 daa jeha kpe ɔa sisi ɔ, a pee tsakemi komɛ ngɛ bɔ nɛ wa nu ní komɛ a sisi ha a he, nɛ a fia adafi ko nɛ sa kadimi kɛ kɔ wa fiɛɛmi ní tsumi ɔ he. Kaa nɔ hyɛmi nɔ́ ɔ, a ha nɛ wa le kaa ke a kpata Babilon Ngua a hɛ mi se ɔ, ni komɛ ma ná he blɔ kɛ ba piɛɛ Mawu we bi a he. Jehanɛ hu ɔ, a ha nɛ wa le kaa kɛ je November 2023 nɛ be ɔ, fiɛɛli be ngmlɛfia, womihi abɔ nɛ a kɛ ha, kɛ kpale ya slaa nɛ a pee ɔ he akɔtaa bue hu. Anɛ tsakemi nɛ ɔmɛ tsɔɔ kaa wa fiɛɛmi ní tsumi ɔ he hia we hu lo? Dɛbi kulaa!

2. Mɛni he je nɛ e sa kaa waa kɛ hɛdɔ nɛ tsu fiɛɛmi ní tsumi ɔ daa ligbi ɔ? (Maako 13:10)

² Daa ligbi ɔ, e sa nɛ wa ha nɛ fiɛɛmi ní tsumi ɔ he nɛ hia wɔ wawɛɛ. Mɛni he je? Ejakaa be nɛ e piɛ nɛ nyagbe ɔ maa ba a pi kulaa. Mo susu nɔ́ nɛ Yesu de kɛ kɔ fiɛɛmi ní tsumi ɔ he ngɛ nyagbe ligbi ɔmɛ a mi ɔ he nɛ o hyɛ. (Kane Maako 13:10.) Ngɛ Mateo womi ɔ mi ɔ, Yesu tsɔɔ kaa a maa fiɛɛ sane kpakpa a ngɛ je ɔ mi hehi tsuo nɛ nimli ngɛ ɔ loko “nyagbe ɔ” maa ba. (Mat. 24:14) Munyu nɛ ji “nyagbe ɔ” tsɔɔ be nɛ a kɛ ma kpata Satan je yaya nɛ ɔ hɛ mi. Yehowa to ‘ligbi kɛ ngmlɛfia’ kɛ ha níhi nɛ e be kɛe nɛ maa ya nɔ ɔ. (Mat. 24:36; 25:13; Níts. 1:7) Daa jenanɛɛ ɔ, wa hɛɔ kɛ suɔ jamɛ a be ɔ he. (Rom. 13:11) Se ngɛ lɔ ɔ tsuo se ɔ, e sa nɛ waa ya nɔ nɛ wa tsu fiɛɛmi ní tsumi ɔ kɛ ya si be nɛ nyagbe ɔ maa ba.

3. Mɛni woɔ wɔ he wami nɛ wa tsuɔ fiɛɛmi ní tsumi ɔ?

³ Ke wa ngɛ fiɛɛmi ní tsumi ɔ he susue ɔ, e sa nɛ wa bi wa he sane nɛ he hia nɛ ɔ: Mɛni he je nɛ wa fiɛɛɔ sane kpakpa a? Ngɛ anɔkuale mi ɔ, suɔmi lɛ haa nɛ wa fiɛɛɔ. Ke wa tsuɔ fiɛɛmi ní tsumi ɔ, lɔ ɔ tsɔɔ kaa wa bua jɔ sane kpakpa a he, wa suɔ nimli, nɛ nɔ́ nɛ pe kulaa a, wa suɔ Yehowa kɛ e biɛ ɔ. Nyɛ ha nɛ wa susu ní nɛ ɔmɛ a he kakaaka.

WA FIƐƐƆ EJAKAA WA BUA JƆ SANE KPAKPA A HE

4. Ke wa nu sane kpakpa ko ɔ, kɛ wa peeɔ wa ní ha kɛɛ?

⁴ Anɛ o kai bɔ nɛ o nu he ha benɛ o nu sane kpakpa ko ɔ lo? Eko ɔ, o weku ɔ mi no ko fɔ loo o nine su ní tsumi ko nɛ o ngɛ hlae ɔ nɔ. Atsinyɛ jemi ko be he kaa o bua jɔ wawɛɛ nɛ o kɛ oya yemi tu he munyu kɛ tsɔɔ o weku li kpahi kɛ o huɛmɛ. Anɛ jã nɔuu nɛ o nu he benɛ o nu Mawu Matsɛ Yemi ɔ he sɛ gbi nɛ ji sane kpakpa nɛ pe kulaa a lo?

5. Kekleekle be nɛ o kase anɔkualehi nɛ ngɛ Mawu Munyu ɔ mi ɔ, kɛ o nu he ha kɛɛ? (Hyɛ foni ɔmɛ hulɔ.)

⁵ Kekleekle be nɛ o nu anɔkualehi nɛ ngɛ Mawu Munyu ɔ mi ɔ, kɛ o nu he ha kɛɛ? Kaa nɔ hyɛmi nɔ́ ɔ, o ba kase kaa o hiɔwe Tsɛ ɔ suɔ mo wawɛɛ, nɛ e suɔ nɛ o ba piɛɛ e weku ɔ he. Jehanɛ hu ɔ, o ba na kaa Mawu wo si kaa e ma je nɔ́ yeyee kɛ nɔ́ nami kɛ je, nɛ o maa na o suɔli nɛ a gbo ɔ ekohu ngɛ je ehe ɔ mi. (Maak. 10:​29, 30; Yoh. 5:​28, 29; Rom. 8:​38, 39; Kpoj. 21:​3, 4) Anɔkuale nɛ ɔmɛ nɛ o kase ɔ ha nɛ o tsui nɔ o mi. (Luka 24:32) O bua jɔ níhi nɛ o ngɛ kasee ɔ he, nɛ o suɔ kaa o maa tu he munyu kɛ tsɔɔ nɔ fɛɛ nɔ!—Kɛ to Yeremia 20:9 ɔ he.

6. Mɛni o kase ngɛ Ernest kɛ Rose a níhi a si kpami ɔ mi?

⁶ Mo susu níhi a si kpami nɛ ɔ he nɛ o hyɛ. Nyɛminyumu ko nɛ a tsɛɛ lɛ ke Ernestb ɔ papaa gbo benɛ e ye jeha nyɔngma. Ernest de ke: “I bi ye he ke: ‘Anɛ ye papaa ho hiɔwe ya lo? Aloo e laa nɛ i be lɛ nae hu gblegbleegble lo?’ Ke i na jokuɛwi kpahi nɛ a tsɛmɛ ngɛ wami mi ɔ, e haa nɛ i yeɔ aywilɛho.” Be fɛɛ be ɔ, Ernest yaa gɔ ɔ mi nɛ e ya kplãa si ngɛ he nɛ a pu e papaa ngɛ ɔ nɛ e sɔleɔ ke: “Ao Mawu, i kpa mo pɛɛ, i suɔ nɛ ma le he nɛ ye papaa ngɛ.” Benɛ Ernest papaa gbo jeha 17 se ɔ, e bɔni Baiblo ɔ kasemi. E ba kase kaa nihi nɛ a gbo ɔ ngɛ kaa nihi nɛ a hwɔ mahe nɛ a li nɔ́ ko nɔ́ ko. Jehanɛ hu ɔ, e ba kase kaa Mawu ma tle nihi nɛ a gbo ɔ si kɛ ba wami mi ekohu. Enɛ ɔ ha nɛ e bua jɔ wawɛɛ. (Fiɛɛ. 9:​5, 10; Níts. 24:15) Nyagbenyagbe ɔ, Ernest ná hetohi kɛ ha sane bimihi nɛ hao lɛ jehahi babauu ɔ! Ernest bua jɔ anɔkualehi nɛ e ngɛ kasee ngɛ Baiblo ɔ mi ɔ he wawɛɛ. E yo nɛ a tsɛɛ lɛ ke Rose ɔ hu ba piɛɛ e he kɛ kase Baiblo ɔ, nɛ lɛ hu e bua jɔ nɔ́ nɛ e kase ɔ he wawɛɛ. Ngɛ jeha 1978 ɔ mi ɔ, a baptisi mɛ ni enyɔ ɔmɛ tsuo. A kɛ kã fiɛɛ sane kpakpa a kɛ tsɔɔ a weku li, a huɛmɛ kɛ ni kpahi. Enɛ ɔ nɛ Ernest kɛ Rose pee he je ɔ, a nyɛ nɛ a ye bua nihi 70 nɛ a baptisi mɛ.

7. Ke wa bua jɔ Baiblo ɔ mi anɔkuale ɔ he ɔ, kɛ wa peeɔ wa ní ha kɛɛ? (Luka 6:45)

⁷ Ngɛ anɔkuale mi ɔ, ke wa bua jɔ Baiblo ɔ mi anɔkuale ɔmɛ a he ɔ, wa suɔ nɛ wa de ni kpahi. (Kane Luka 6:45.) Wa nuɔ he kaa bɔ nɛ Yesu kaseli ɔmɛ nu he ɔ. A de ke: “Wa be nyɛe ma kpa níhi nɛ wa na kɛ níhi nɛ wa nu ɔ he munyu tumi.” (Níts. 4:20) Akɛnɛ wa suɔ anɔkuale ɔ wawɛɛ he je ɔ, wa suɔ nɛ waa kɛ nihi fuu nɛ sɛɛ he ní.

WA FIƐƐƆ EJAKAA WA SUƆ NIMLI

8. Mɛni he je nɛ wa suɔ nɛ waa fiɛɛ sane kpakpa a kɛ tsɔɔ ni kpahi ɔ? (Hyɛ daka nɛ ji, “Moo Suɔ Nihi​—Moo Pee Mɛ Kaseli.”) (Hyɛ foni ɔ hulɔ.)

⁸ Akɛnɛ Yehowa kɛ e Bi ɔ suɔ nimli he je ɔ, wɔ hu wa suɔ nimli. (Abɛ 8:31; Yoh. 3:16) Wa mi mi sãa wɔ wawɛɛ ngɛ nihi nɛ a ‘li Mawu,’ nɛ a “be hɛ kɛ nɔ fɔmi” ko ɔ a he. (Efe. 2:12) A kɛ nyagbahi fuu ngɛ kpee, enɛ ɔ he ɔ, a ma nyɛ maa nu he kaa a ngɛ muɔ voo ko mi. Se wa ngɛ kpã nɛ waa kɛ ma nyɛ maa gbla mɛ kɛ je kpo ngɛ muɔ ɔ mi. Lɔ ɔ ji Mawu Matsɛ Yemi ɔ he sane kpakpa a nɛ. Akɛnɛ wa suɔ mɛ nɛ wa mi mi sãa wɔ ngɛ a he he je ɔ, wa peeɔ nɔ́ fɛɛ nɔ́ nɛ wa ma nyɛ konɛ waa fiɛɛ sane kpakpa a kɛ tsɔɔ mɛ. Ke a nu sane kpakpa nɛ ɔ, a ma ná hɛ nɔ kami, nɛ lɔ ɔ maa ye bua mɛ konɛ a ná bua jɔmi amlɔ nɛ ɔ. Jehanɛ hu ɔ, hwɔɔ se ɔ, lɔ ɔ maa ye bua mɛ konɛ a nine nɛ su “wami nitsɛnitsɛ ɔ” nɔ ngɛ Mawu je ehe ɔ mi.—1 Tim. 6:19.

9. Mɛni kɔkɔ nɛ wa bɔɔ nihi kɛ kɔɔ hwɔɔ se he, nɛ mɛni he je? (Ezekiel 33:​7, 8)

⁹ Suɔmi nɛ wa ngɛ ha nihi ɔ hu woɔ wɔ he wami nɛ wa bɔɔ mɛ kɔkɔ kaa e be kɛe nɛ a ma kpata je yaya nɛ ɔ hɛ mi. (Kane Ezekiel 33:​7, 8.) Wa mi mi sãa wɔ ngɛ adesahi tsuo a he, nɛ wa weku li nɛ a sɔmɔ we Yehowa a hu piɛ he. Daa ligbi ɔ, a ti nihi fuu tsuɔ a hiami níhi a he ní, nɛ a li kaa ‘amanehlu ngua ko maa ba nɛ́ eko kaa jã bɛ hyɛ kɛ je je ɔ sisije kɛ ba si amlɔ nɛ ɔ, nɛ eko hu be bae gblegbleegble.’ (Mat. 24:21) Wa suɔ nɛ wa de mɛ nɛ a le nɔ́ nɛ maa ba ngɛ jamɛ a be ɔ mi. Wa suɔ nɛ a le kaa a ma kpata lakpa jami hɛ mi, nɛ lɔ ɔ se ɔ, a ma kpata je yaya nɛ ɔ tsuo hɛ mi ngɛ Harmagedon. (Kpoj. 16:​14, 16; 17:​16, 17; 19:​11, 19, 20) Wa sɔlemi ji kaa a maa bu kɔkɔ bɔmi nɛ ɔ tue konɛ a ba piɛɛ wa he kɛ sɔmɔ Yehowa. Se nihi kaa wa weku li nɛ wa suɔ mɛ nɛ a be kɔkɔ bɔmi nɛ ɔ tue bue ngɛ jamɛ a be ɔ mi ɔ hu nɛɛ?

10. Mɛni he je nɛ e sa nɛ waa kɛ hɛdɔ nɛ fiɛɛ nɛ waa bɔ nihi kɔkɔ ɔ?

¹⁰ Kaa bɔ nɛ wa na ngɛ ní kasemi nɛ sɛ hlami ɔ mi ɔ, ke nihi na kaa a kpata Babilon Ngua a hɛ mi ɔ, eko ɔ, a maa pee tsakemi nɛ Yehowa ma he a yi wami. Ke jã a, lɛɛ e sa nɛ wɔ tsuo waa kɛ hɛdɔ nɛ fiɛɛ nɛ waa bɔ nihi kɔkɔ. Mo susu he nɛ o hyɛ: Níhi nɛ wa deɔ nihi mwɔnɛ ɔ ma nyɛ ma ha nɛ a kai nɔ́ ko ngɛ jamɛ a be mi. (Kɛ to Ezekiel 33:33 ɔ he.) Eko ɔ, a ma kai kɔkɔ nɛ wa bɔ mɛ be ko nɛ be ɔ, nɛ lɔ ɔ ma ha nɛ a ba piɛɛ wa he kɛ sɔmɔ Yehowa loko bi nɛ su gbongu mi. Benɛ “zugba mimiɛɛmi nɛ e nya wa ko” ya nɔ se ɔ, nɔ nɛ e hyɛɔ nihi nɛ a wo mɛ tsu ɔ a nɔ ngɛ Filipi ɔ tsake e tsui. Eko ɔ, jã kɛ̃ nɛ ni komɛ nɛ a bui wɔ tue mwɔnɛ ɔ hu maa pee ke a na kaa a kpata Babilon Ngua a hɛ mi.—Níts. 16:​25-34.

WA FIƐƐƆ EJAKAA WA SUƆ YEHOWA KƐ E BIƐ Ɔ

11. Mɛni blɔ nɔ nɛ wa ngɔɔ hɛ mi nyami, bumi, kɛ he wami kɛ haa Yehowa? (Kpo Jemi 4:11) (Hyɛ foni ɔmɛ hulɔ.)

¹¹ Yi mi tomi titli he je nɛ wa fiɛɛɔ sane kpakpa a ji kaa wa suɔ Yehowa Mawu kɛ e biɛ klɔuklɔu ɔ. Wa naa fiɛɛmi ní tsumi ɔ kaa e ji he blɔ nɛ wa náa kɛ jeɔ Mawu nɛ wa suɔ lɛ ɔ yi. (Kane Kpo Jemi 4:11.) Wa le kaa Yehowa ji Mawu nɛ e sa kaa a ngɔ hɛ mi nyami, bumi, kɛ he wami kɛ ha lɛ. Wa ngɔɔ hɛ mi nyami kɛ bumi kɛ haa Yehowa ke wa fiɛɛɔ ha ni kpahi nɛ wa tsɔɔ mɛ odasehi nɛ maa nɔ mi kaa Yehowa lɛ “bɔ níhi tsuo,” nɛ e he je nɛ wa ngɛ wami mi. Jehanɛ hu ɔ, ke wa ngɔ wa be kɛ wa nyɛmi tsuo kɛ tsu fiɛɛmi ní tsumi ɔ, nɛ wa ngɔ níhi nɛ wa ngɛ ɔ kɛ fĩ se ɔ, lɔ ɔ tsɔɔ kaa wa ngɔɔ he wami kɛ haa Yehowa. (Mat. 6:33; Luka 13:24; Kol. 3:23) Ngɛ anɔkuale mi ɔ, wa suɔ nɛ waa kɛ nihi nɛ sɛɛ wa Mawu ɔ nɛ wa suɔ lɛ ɔ he ní. Jehanɛ hu ɔ, wa suɔ kaa waa kɛ ni kpahi maa sɛɛ Mawu biɛ ɔ kɛ nɔ tutuutu nɛ e ji ɔ he ní. Mɛni he je?

12. Mɛni wa peeɔ kɛ tsɔɔ kaa wa ngɛ Yehowa biɛ ɔ he tsɔe ngɛ fiɛɛmi mi?

¹² Suɔmi nɛ wa ngɛ kɛ ha Yehowa a woɔ wɔ he wami nɛ wa tsɔɔ e biɛ ɔ he. (Mat. 6:9) Akɛnɛ Satan gbe Yehowa biɛ ɔ he guɛ he je ɔ, wa suɔ nɛ wa de nihi kaa nɔ́ nɛ Satan de ɔ ji lakpa. (1 Mose 3:​1-5; Hiob 2:4; Yoh. 8:44) Ke wa ngɛ fiɛɛe ɔ, wa peeɔ klaalo kaa wa ma fã wa Mawu ɔ he, nɛ waa tsɔɔ nihi tsuo nɛ a suɔ nɛ a bu wɔ tue ɔ anɔkualehi nɛ kɔɔ e he. Wa suɔ nɛ nɔ fɛɛ nɔ nɛ le kaa Mawu su nɛ pe kulaa ji suɔmi, nɛ blɔ nɔ nɛ e guɔ kɛ yeɔ nɔ ɔ da, nɛ e se be kulaa. Jehanɛ hu ɔ, wa suɔ nɛ a le kaa e be kɛe nɛ e Matsɛ Yemi ɔ maa po nɔ́ nami se, nɛ adesahi tsuo ma ná tue mi jɔmi kɛ bua jɔmi nitsɛnitsɛ. (La 37:​10, 11, 29; 1 Yoh. 4:8) Ke wa fã Yehowa he ngɛ fiɛɛmi mi ɔ, lɔ ɔ tsɔɔ kaa wa ngɛ e biɛ ɔ he tsɔe. Jehanɛ hu ɔ, e haa nɛ wa bua jɔɔ ejakaa wa le kaa wa ngɛ nɔ́ nɛ Yehowa suɔ nɛ waa pee kaa e we Odasefohi ɔ pee. Ngɛ mɛni blɔ nɔ?

13. Mɛni he je nɛ wa bua jɔ kaa a tsɛɛ wɔ ke Yehowa Odasefohi? (Yesaya 43:​10-12)

¹³ Yehowa hla wɔ kaa e we ‘Odasefohi.’ (Kane Yesaya 43:​10-12.) Jeha komɛ nɛ be ɔ, sɛ womi ko nɛ je Blɔ Tsɔɔmi Ajla Toli ɔmɛ a ngɔ ɔ de ke: “He blɔ nɛ se be nɛ wa kpɛti nɔ ko ma nyɛ ma ná ji kaa a ma tsɛ lɛ ke Yehowa Odasefo no.”c Mɛni he je? Mo susu nɔ́ he tomi nɔ́ nɛ ɔ he nɛ o hyɛ. Ke o ngɛ hlae nɛ nɔ ko nɛ ye odase ha mo ngɛ kojomi he ɔ, anɛ o maa hla nɔ ko nɛ o he we lɛ yi lo? Ngɛ anɔkuale mi ɔ, o be jã pee kulaa. E ngɛ heii kaa o maa hla nɔ ko nɛ o le lɛ saminya nɛ o he lɛ ye, nɛ e ngɛ biɛ kpakpa ngɛ nihi a hɛ mi. Akɛnɛ Yehowa hla wɔ kaa e we Odasefohi he je ɔ, lɔ ɔ tsɔɔ kaa Yehowa le wɔ saminya, nɛ e ngɛ hɛ kɛ nɔ fɔmi ngɛ wa mi kaa ma nyɛ maa ye e he odase kaa lɛ ji anɔkuale Mawu ɔ nɛ. E ji he blɔ ngua nɛ wa ná kaa wa ji e we Odasefohi. Enɛ ɔ he ɔ, nyɛ ha nɛ waa ngɔ he blɔ fɛɛ he blɔ nɛ wa ma ná a kɛ tsɔɔ nihi Mawu biɛ ɔ, nɛ a na kaa níhi tsuo nɛ Satan de ngɛ e he ɔ ji lakpa. Ke wa pee jã a, lɔ ɔ tsɔɔ kaa wa ngɛ biɛ nɛ fɔɔ si ngɛ wa nɔ, nɛ ji Yehowa Odasefohi ɔ nya ní tsue!—La 83:18; Rom. 10:​13-15.

WA MAA YA NƆ MAA FIƐƐ KƐ YA SI BENƐ NYAGBE Ɔ MAA BA

14. Mɛni ji ní komɛ nɛ a ngɛ bua jɔmi nɛ ngɛ wa hɛ mi kɛ ma?

¹⁴ Wa bua jɔ saminya kaa ní kpakpahi ngɛ wa hɛ mi kɛ ma! Ngɛ anɔkuale mi ɔ, wa blɔ hyɛmi ji kaa Yehowa maa ye bua nihi fuu nɛ a ba kplɛɛ anɔkuale ɔ nɔ loko amanehlu ngua a nɛ je sisi. Jehanɛ hu ɔ, e ngɛ mi kaa níhi a mi maa wa wawɛɛ ngɛ amanehlu ngua a mi mohu lɛɛ, se bua jɔmi sane ji kaa nihi ma nyɛ maa je Satan je yaya nɛ ɔ mi nɛ a ba piɛɛ wa he kɛ je Yehowa yi!—Níts. 13:48.

15-16. Mɛni nɛ e sa nɛ waa ya nɔ nɛ waa pee, nɛ kɛ ya si mɛni be?

¹⁵ Se amlɔ nɛ ɔ, wa ngɛ ní tsumi ko nɛ he hia nɛ e sa kaa wa tsu, nɛ e be kɛe nɛ ní tsumi nɛ ɔ maa ba nyagbe. E ji he blɔ ngua nɛ wa ná kaa wa ngɛ Mawu Matsɛ Yemi ɔ he sɛ gbi ɔ fiɛɛe ngɛ je kɛ wɛ. Se kɛ̃ ɔ, e sa nɛ waa ya nɔ nɛ waa bɔ nihi kɔkɔ ngɛ nɔ́ nɛ e be kɛe nɛ e maa ba a he. E sa nɛ wa ha nɛ nihi nɛ a le kaa e be kɛe nɛ Satan je yaya nɛ ɔ maa ba nyagbe. Kɛkɛ ɔ, ke be su nɛ Mawu maa kojo nihi ɔ, a maa le kaa sɛ gbi nɛ wa fiɛɛ kɛ tsɔɔ mɛ ɔ je Yehowa Mawu ngɔ niinɛ.—Ezek. 38:23.

¹⁶ Ke jã a, lɛɛ mɛni e sa nɛ waa fia wa pɛɛ si kaa wa maa pee? E sa nɛ wa ha nɛ suɔmi nɛ wa ngɛ kɛ ha anɔkuale ɔ kɛ nimli, kɛ nɔ́ nɛ pe kulaa a, suɔmi nɛ wa ngɛ kɛ ha Yehowa Mawu kɛ e biɛ ɔ nɛ wo wɔ he wami nɛ waa kɛ hɛdɔ kɛ kã nɛ tsu fiɛɛmi ní tsumi ɔ kɛ ya si benɛ Yehowa ma de ke, “E hi!”